Read Chokri Naga PETER KÜNAO 1 Bible Online

PETER KÜNAO 1 - Chokri Naga bible

PETER KÜNAO 1

¹Simon Peter, cetamipü mu Jisu Khrista apostle mipü sübi kemelü püma kerü ngo yi ketako, therüo kemezi yolü mu uko kelakeyi Jisu Khrista lü ketako cekesü.

²Ngokemezhe mu kezükeve po kro kehü keyi thi bate Jihova mhaselü Jisu uko Niepoo zalü.

³Mhaselü uko cüpü zapozale mu kevekene lüsü keyi.

⁴Sülü zho kehükeyi mu jü khakesü reshu püma kerü sheri pü utsü, size kesülü upo sheri thopü kemetazho khipü zhürhü thiyi ve ketola, mha kemeho kataketo cejülü zhoko thera keyilü.

⁵Sülü ba keyi, kemenu tho metülü, n kemelü la kevekene khipü basayi; mu kemenulü mhase.

⁶Mu mhaselü ukethükerü, mu kethükerü keyilü sügüsühe sayi, mu sügüsühe keyilü kemesa kehü sayi.

⁷Mu kemesa kehülü sazüjüra tsüli veyi, mu sazüjüra yo tsüli ve keyilü mhapü miketsü kekhrü püsayi.

⁸Mhace mhahiko neyo ta lize mu ba meveyi lize, no nse kedi methu keta thi taho, uko Niepoo Jisu Khrista yolü (mhaselü)

⁹Vele mha hiko kedio pü mhücemi pü tazo, mu mhango mechoyi mo tato; mu hi mhüjülü pü kephomako va kesü pü rekra mo tate.

¹⁰Süla asazüjüra neko neko menu de nekecü mu ne kedakeyi thi menu ta lize; mu mhace ne mhahiko thimu züyi lize, neko mhapüceri retu taho.

¹¹Uko Niepoo mu kelakeyi Jisu Khrista kechothe kede kethi lü neko la nenü shuzo keti yitho khri netsüto.

¹²Mhasüko la nekopo rekra süta ketolü I neko thipü sizi keto I asalü mota mozo, nekori seba vele neko thipü tsüdo ketholü süyi te.

¹³Ile, süo pütü zoleti akelüce lübale; I kereshücelü kebathe, uko Niepoo Jisu Khrista thapü ameka kesüla.

¹⁴Mechokemolü areshüce hio khava to, uko Niepoo Jisu Khrista a mesekesübi; I süo sebate.

¹⁵Süpi sheri I nekopo thisü kenyü sü, asü salü nekopo mhahiko rekrazo tanyü.

¹⁶Kekrelamori uko theju kethokemo udokevelü tho kesüko mejitamo, hako uko Niepoo Jisu Khrista kevori mu pü keku keba thipü neko ce süte, mu neko se bate, vele umhü sheri ketekhri kethi ngo kesü zhopo ba.

¹⁷Kekrelamori pü Jihova celü uko po celü thechu therho mu zapozale ngoyi, füphra pü zapozale verekri zoti vori, “Hiohi anu Puleo, akhrüo, I püngo anüphi ketio.”

¹⁸Thefü hiohi tülü kiri ti hako se, hako püzü cejütu kemesao yolü kebace.

¹⁹Hako setü keba prophecy (sajujü) kethozo ti neko khimenu tate, tü keve kezülü mhava meve kesü bi, pütü süo vori kemothe, tüsozho süo thenyü pübi neko melülü ve süri te.

²⁰Se keba therao hio, sajukepo jü lesi kekrelü thopü kemeta, chozulaco uco kepo pümo.

²¹Kekrelamori saju kepo thajütho thüma celü kevorijü, thüma medo lümo; vele thüma kemesa Jihova celü kevoriko posü, Kemesa Rüpü ukoyo melü kesülü.