Read Chokri Naga PETER KÜNAO 2 Bible Online

PETER KÜNAO 2 - Chokri Naga bible

PETER KÜNAO 2

¹Vele kemeda saju kepo thüma dülü tazo, kecejü kemetha sheri tati bi, neko dolü kemekhrülü vajo keva kemelü pü vorito, Niepoo uko khri keyi sheri mela vato, mu rekri shutilü ka keta khipü utho ukoyo vori tato.

²Mu mikekro uregürezhü meji vo tato, süko la mi kethoco po mesu tato.

³Mhakemholü uko kethera ketijüko khi neko pü hethoheli thi tato, uko sheco gümecho ba mo tato tsühi sheri mu uko mejova ketolü zü relü mote.

⁴Kekrelamori mhace Jihova tüyochoyimiko kephoma thikeva mehasü mota lize, uko khapü mezalü süva, mu uko khapü kezülü ropha pha metava, uko khapü uko jünyo sheco ketolü mezü metate.

⁵Mu cejü kevüo sheri meha sü mote, vele Noah uko mi tütha, kemezi zhopo kethi mipü, mesakemo kola jüde khapü cejülü süta.

⁶Sodom mu Gomorrah napü nadeni thüpü megünyo thiva, unithi medipü thaka thipü hisa laco kehü mipo mesakemo kehü seta ketola.

⁷Lot mehasü, keretsemiko rethi (jüpojüli) püthi pü pülü kebü methi ketao.

⁸Kekrelamori kemezi thüma süo uko dolü hüyo tila, pü uko ngo mu uko füko sepü pü kerhüro thi kemezhe sü uko thezho kemo kethiko la tüsonha pülü kemezhe.

⁹Niepoo medokephiko lü sheri kemesami merhü sü keto pü seba, mu matho kemoko khapü shecolü sazho khasü keto sheri.

¹⁰Vele uthi upho mesakemo kemeho kemenyülü ketako meku de mu Sorkari rhokemo mila, utho ukelülü uko umedothi tayo, uko mha kesu kepo methi yomo; keve sheri pomesu tayo.

¹¹Tüyochoyimi zo sheri, zhoku, kekuneku Niepoo celü kemeli kemejo, metsu ti jüko khipüvo poyomo.

¹²Vele hiko khonu hülü menu kesüko uko mekava ketola mehükesüko, uko lüyi kemo mhakesuko potayo mu ukotho uko kesulü kekakemhü thitato.

¹³Mezi kemo zhokhro ngoyito, kehelü mhakebü kesü unüunyü thi ketako; uko theku kene, thece kene mishu mikedo tipü uko rezhü kethi uko neko züde hi (thenyenye) keba dolü,

¹⁴Uko mhülü kekhrükezüti chupü ta, uko kephoma kethilü la mozo, ukethümozo; ukerhüro resürelü kemo uhü thimekre pü umelü lü mhakemehoko thi dojü, natsimiko rephri tayo.

¹⁵Uko chode kemezi rekramo te, vajo te, kera mote, Bosor nu Balaam chode meji tate, pü mezi kemo zhokhro pünü tate.

¹⁶Vele pü mesa kemola pü lekhu süve, jüpoyo kemo gada sheri thüma fübi saju kepoo kemelo va khata.

¹⁷Hikohi jüfülü jü kediko, kemhütürü kedi bi, thüma hikola kechothe kezü revü metate;

¹⁸Kekrelamori uko kemethu kemerü reme kezü jü kezho kepoce, uko uthi upho menyüko khi mishu mi ketse tayo; uko utinyü ukranyü kekrota, kemesamiko süko kekri keti kehülü keta therü theratate.

¹⁹Uko he kesü jüphra süce ukotho keka ceta thita, kekrelamori thüma süphra pü prari kesüo, uko süo pülü thejü thi keropü phava.

²⁰Mhace uthi merho keta cejülü zhü therü tayi ta lize, Niepoo Jisu Khrista mhaselü la, uko khi sala püvo ukopo thelü ketsakhu zü ketü (sala) mori ve; uko sala ta lize pü thelalü shudü ceri suku tato.

²¹Kemezi chode sekemo ukola veku ta zoto, uko süo sesü jükhakesü kemesako sesü de regü sala tsüsa ketace sheri.

²²Vele ketho jüve (mhsejü) po keta sü ukoyo kute, süo poti, “Teshü (tehi) utho umerü ti sala tayo; thevo jülü pükhrü kemesa (relo) sü sheri sala talü nyobalü reyu tayo.” Sübiti thite.