Read Chokri Naga PETER KÜNAO 3 Bible Online

PETER KÜNAO 3 - Chokri Naga bible

PETER KÜNAO 3

¹A kekhrümiko, I tsühi lesitho kesü kenao khapü neko ce sü züho, I nekolü kemesa nekopo rekra sala sü ketola.

²Nekopo hi mhüjü saju kepo kemesa jüko lü menu ba ketola, mu apostle kethi hako jükha kesü Niepoo kelakeyio.

³Neko semo kesu thera thoo thelaco mha krünyü zoti kropü utho ukemenyü lü tavo tato.

⁴Uko po keta, Pü sala vori keto jükhakesü dipü ceba? Kekrelamori uponeko züzü ketako, cejü thi keyi lüvo tha ketso mha metüko sizi tazo.

⁵Kekrelamori uko utho umedolü mhasemo tate, Jihova la tüko thajütho lazo, cejü sheri jüpi mu jükhro tha lazo.

⁶Sizi ketala jüde po sütüce mha mekava.

⁷Tüko mu cejü tsü keba hiko jüsüo po meka va ketola meshu pü kemeta melü thüva ketola;

⁸Vele akekhrüko, mhapüla neko mhasemo bata hite, tüsozho pü u Niepoo la tetse thenye bi, mu tetse thenye tüsozho pünha bizo.

⁹Niepo metsü tamozo pü jü kha kesü kola, humi kelü metsü ba keta bi sheri, vele uko la sügü sühe mecho kebazo, kehopü po sheri kata nyü kemola, vele metü po sheri thelü rede keyi kemenyü la.

¹⁰Vele Niepoo kevori tüsozho sü tüzülü keregomi kevori bi zoto; süce tüko ufü kemere thide di tato, mu mha sülü ketako lü thiri ketala zho tato, mu cejü sheri mu mhatho sülü keba khü thü vato.

¹¹Mha hiko metü zü dita keto seba ketabi, thüma mipü dipü thiti mesü sheri uzho urele ujüpo ujüli (rethifü) kemesa mu ukehü mesade hü keyi.

¹²Pe meri keba Niepoo kevori tüsozho kerekrilü, tüko melilü zü di tato, mu mha sülü kebako lüri ketala zho tato, süopo vori mezeta keto fü bame?

¹³Sizosheri pü popü kemeta jü uko tü kesa mu cejü kesa füba sülü kemezimi hü ketola.

¹⁴Süla akekhrümiko, neko mhasüko meri keba bi menu de bate püponeko kezüve keba ngoyi ketola, thece kedi mu theku ne kemo.

¹⁵U Niepoo pülü cho keba sü kelakeyi zo, uko sazüjürao Paul mhase khapü ketsü bi pü lesi thopü neko tsüsü te.

¹⁶Pü lesitho kesü metülü pü mha hiko po, sükolü mhahu seyi kerü ba, mhasekemoko la, mu ulü krokrü kemokola, uko lesitho kesü kekreko yo sheri sübi tayo, uko tho umeka ve.

¹⁷Ne akekhrümiko, neko hi mhüjü mha hiko semu lü bate, uceri tate molize neko sheri keretseko po ne ketse pü tata ri ve tila, kekritilü vo keta, ne kemelü kethothi kebalü retu tari semo tila.

¹⁸Vele ngokemezhelü mema bate, u Niepoo Jisu Khrista mhaselü; püpo tsühi zapozale kethi mu kecho sheri kenenilü thite, Amen.