Read Chokri Naga JOHN KÜRAO 4 Bible Online

JOHN KÜRAO 4 - Chokri Naga bible

JOHN KÜRAO 4

¹Kükhrüko, neko ropü kühopührei mülüta mole ropüsüko Jihova celüvo memosiküti ra münuyite; Kükrelamole kücejü sadzu kükro pra cejüo lüta küta la.

²Neko hi kümha de Jihova Ropüo seyite, ropü kühopührei Jisu Khrista yisü püthipümo thipü de vo zo leküti phrayo küzho khwü Jihova celü vozo.

³Mu ropü kühopührei Jisu phrayo kümo khwü Jihova celü vo mo zo, musüosü Khrista ngomuo ropü zo, süo vo zoto leküti neko püdzu seyitazo, mu pu tsürei vo cejüo lütate.

⁴Neko Jihova celü vo zo, A nune kütsüko, mu süko mho kuyite. Kükrelamole neko lü baküta-oe cejü lü bakütao ce zhokuküti la.

⁵Ukoe cejüo mi zo, süla uko cejüo mi kümha dzüpoyo, mu cejüoe ukokhwü rünyiyo.

⁶U Jihova ceyotazo, thüma kühopührei Jihova seyoküzhomi u khwürünyiyo, Jihova ceyo kümomi u khwü rünyiyo mo. Süyo sülü, u kütho ropü-omu kükriküta ropü se kükreyiyo.

⁷Kükhrüko, uko hunehu khrüyi khe, kükrelamole kükhrüe Jihova celü pazoküti la, silizo mikhrüyoküzho khwü Jihova yolü u münuyita zo; mu Jihova seyo.

⁸Mi khrüyokümomi Jihova seyo mo, kükrelamole Jihova kükhrüyo zo kütila.

⁹U po püla rhüyito de Jihova pünu puleyo kütsüpü cejü lü süküti süyolü Jihova celü küpa kükhrüyo pü u lülü u müse müngo süvata zo.

¹⁰U Jihova khrüyi mole pütho u khrüküta zo, side u küphomako la u rütho thiva tole nnhannhalü kütsüsü zo, süo kükhrüyo zo.

¹¹Kükhrüko, mhanuü Jihova u khrüpü hithüdü thisü lizo, u rei hunehu khrüyizü.

¹²Mipührei mhapücerei Jihova ngo mo, u hunehu khrüyo lizo, Jihova u lü bayo mu pu celü küpa kükhrüyo u lülü tsüyiyo.

¹³U pü lülü bayoküzho mu pürei u lülü bayoküzho seküyi kükrelamole pü pü ropü kha u tsüvaküta la zo.

¹⁴Mu cejüo Külaküyio thito le Jihova pünu kütsüsü küti ukoe ngori zomu süo zhopo thi tayo zo.

¹⁵Thüma kühopürei Jisue Jihova Nuo zoleküti phrayo küzhomi Jihova süo lü bayo, mu süo rei Jihova lübayo.

¹⁶Mu Jihova u Khrüyoküti u se bata zo, mu mülü ri batazo; Jihova kükhrüyo zo mu thüma kühopührei kükhrüyo lü bayoküzhomi Jihova lübayo, mu Jihova rei pü lü bayo.

¹⁷Kütsoküti nha u po thüpuyiküto la süyo lü kükhrüo u cheyotsüte; Kükrelamole pü kümha u rei hio lü ba zo toküti la.

¹⁸Kükhrüo lü u kümüprüh pührei di, sikütio mole kükhrü tsüküyio pütho kümüprüh whuvayo; kükrelamole kümüprüh-e pü sazho baküti la. Silizo thüma küpührei müprühyoküzhomi kükhrüyo lü tsüyiyo mo.

¹⁹U rei pü khrüyo kükrelamole pü u khrüraküti la.

²⁰Mhanuü mipüh-e “I Jihova Khrüyo” isi de pü sazüdzürami rütsüyo lizo, thüma süo kücejümi zo. Kütho zo thüma kühopühri püe ngoküba pü sazüdzürami khrüyokümomi püe ngokümo Jihova khrüküyi di zo.

²¹Mu thüma kühopühri Jihova khrüyo küzhoo pü sazüdzürami rei khrüyimoo süküti dzü hio u Poo celü ngoite.