Read Chokri Naga JOHN KÜRAO 5 Bible Online

JOHN KÜRAO 5 - Chokri Naga bible

JOHN KÜRAO 5

¹Thüma kühopührei Jisu-e Khristao zoleküti mülüküzhomi Jihova yolü pü münuyita zo; silizo thüma kühopührei mi münusüyoküzho-o khrüyoküzhomi pü lülü münu pakütio rei khrüyo.

²U Jihova Khrü mu pü dzü khaküsüko thi mu züyo lizo, süyolüsü u Jihova nuneko khrüyoküti u seyiyo.

³Silizo u Jihova khrüyoküti püco, u pü dzü khaküsüko züyo küzhoo zo, mu pü dzü kha küsüko rüh mo zo.

⁴Silizo mhakühopührei Jihova yolü münu parikütao cejüo ce kuyiyo; mu Jihova cejüo ce kuyikütao süo u kümülü zo.

⁵Tsoo Jisu Jihova Nuo zoküti mülüküzhoo sa cejüo ce kuyiyo küzhomi somi ra?

⁶Dzü mu thüza zü küvoo Jisu Khristae süyosü zo; dzü lübi zo mole dzü rei sa mu thüza rei sa.

⁷Süo tüyolü zhopo süh hiko thopüh bayo, Poo, Dzüo mu Kümüsa Ropü süh hiko püh zo.

⁸Mu cejü lü rei zhopo süh hiko thiyo Ropü mu Dzüo mu thüza-o mu süh hiko külürhü püh thiyo.

⁹Mhanuü u thüma zhopo tho züyo lizo, Jihova zhopoe süo ce zhoku; Jihova zhopo sü hiohi zo pü lü zhopo thiküsüyo zo küti.

¹⁰Thüma kühopührei Jihova Nuo mülüküzhomi zhopo süo pülü bata zo. Thüma kühopührei Jihova mülüyokümomi Jihova püsü kümüdao thivate. Kükrelamole thüma süo Jihova pü Nu dzü zhopo thiküsüyo mülü moküta la.

¹¹Mu zhopo süo Jihova küchothe kürhüro khapü u tsüvate. Mu kürhüro süosü pu Nuo lü bayokütio zo.

¹²Thüma kühopührei Nu süo ngoikütami kürhüro süo nete, thüma kühopühri Jihova Nuo ngoikümomi kürhüro süo ba mo.

¹³Mhahiko la I thopüh neko ce süzü ho, Nepo Jihova Nu Jisu mülüyikütola, süo küchothe kürhü ngoyiküta, mu Nepo Jihova Nu Jisu zalü mülütayi kütola.

¹⁴Mu u püyolü u küthüpu ba kütayo, sü hiohi zo. U pünü pü müdo kümhade mhakühopühri choyo lizo pü u khwü rünyiyo.

¹⁵Mu mhanuü pü u khwü rünyiyo küti seyolizo, U pücelü choküsüko ngoitaküti seyitayo.

¹⁶Mhanuü thüma kühopühri pü sazüdzürami sataküsü küphoma kümopüh thivaküta ngo lizo, püpo choyi, silizo Jihova sata küsü küphoma zokümo thiküvako la kürhüro khapü pütsüto, sata küsü küphomari nezo; I mi po chonokütio süo po bamo.

¹⁷Mathokümo kühopührei küphoma zo;

¹⁸Mu sataküsü zokümo küphoma kühopührei Jihova yolü münuyi kütami phoma yomo. Sirei Jihova yolü münuyi kütao münuyi tatayo. Süla kürüzhüo pü dzü yilho.

¹⁹U Jihova cechoyo zoküti se bate mu cejü mütüe kürüzhüo khreikhrotayo.

²⁰Mu Jihova Nuo vo de u po kütho zo kütio seyiküto la mhaküse kha utsü vaküti u se bate, Süo sü kütho zoküti pü pü Nu Jisu Khrista lü bate, Hiokütho Jihova zoküti Jihova Nuo mu küchothe kürhüroo süo zo.

²¹A nune kütsüko neko thürümarhe rüsüyoküzhoko thürai zote. Amen.