Read Chokri Naga MÜNGOKESÜ 10 Bible Online

MÜNGOKESÜ 10 - Chokri Naga bible

MÜNGOKESÜ 10

¹Akengo, tüyochoyimi kekupü tüyo vori, kemhü pü pü rütsothi; füsü püpiyota, püzü nace kevebi, püphezini sü meto kebabi.

²M pübelü lesida ketsüpü hapüba; puphe püzacopü jükezholüsü, püvecopü cejü kedü püba.

³Pü se meto de, losha kerüfü bi; pü sekesü sa tüsüfü thüna prari.

⁴M tüsü thünako ufü thi kesüsa, I süko thoto lesü, I füphrapü tüyo ace pode, mohor vüpü mbade tüsü thünako, tsüko tho hite.

⁵Tüyochoyi I ngokeba püphepü jü mu cejü niyo thade pübe chopü tü peba.

⁶M rhü keta kechotheo ce reshu, tü thikesüo mha sülü keba metü, cejü m mha sülü keba metü, mu jükezho mha sülü keta metü pütüko bacho samo keta la.

⁷Veli tüsozhoko tüyochoyi thünao thecü füsüketo, Jihova mhakekhri ketsü, thitsü tso süzü, pü choyi kethimi mu saju kepoko ce popü kemeta bi.

⁸Füphrapü tüyo ace jüpode, “Taphe lesida ketsüo püyite, hapü mba tsüo, tüyochoyio belü, jü mu cejü ni lütha kethao.”

⁹I ta tüyochoyio ce phede püce poti, lesida ketsüo kha atsü süte. Siri pü pode, Püyite, deti süte; tsüo tikeyi san vade khu mezü tato, veli n talü nyü pü mefijü kenyü thi tato.

¹⁰I lesida süo tüyochoyio belü püyi, de süo ti sü süo, nyü pü mefijü kenyü bita a mülü; süo ti mu Metha a vadelü khumezü ta.

¹¹Pü ace pode, sajü posalato thüma kekro mhüjü, shuyeko mhüjülü, ujü kekre ketsüko mhüjülü mu kedemiko mhüjülü.