Read Chokri Naga MÜNGOKESÜ 11 Bible Online

MÜNGOKESÜ 11 - Chokri Naga bible

MÜNGOKESÜ 11

¹Tekhrü thegi bi tsü pü kha atsü sü, tüyochoyio acepode, ‘Tosü de Jihova kereshüce mede süte. Mu kereshüba sülü reshüthi kebako ri.’

²Veli jüngo keti tsü ba khü chozuko kereshüce sa mede hite; kemesa nade mipo tükhri 42 kedü vato.

³I keku pü a zhopomi kena tsü süto, de uni zho 1260 saju poto, uni gakhrofü beto.

⁴Hini olive sü kena mu metosü cejülü rüo mhüjülü thatha.

⁵Mhace thüma kehopüri süko meshulize mi püta lü prari ta, de pü ngomumiko mezota; ma nthace thüma humi süko meka methi to lize hihi bide süko dokhri vata.

⁶Uni tü kha va keve keku ba, uni saju po keba ce türü mota keto, m uni keku jü pü thüza thi va keve, mu thüso (tüsa) pü cejü methi keto tsü kenu thiva keve uni keku ba.

⁷Uni zhopo tso ketasa khonu uthüla kedice lü paride unizü theri thito, uni meni vato de dokhri vato.

⁸Uni mo khapü nadeo lü chodelü zütato, rüpü lü zatho Sodom mu Egypt, hethi sülü uko Nie-o ri vüva.

⁹Thüma kekrekre ketsü, shuye kekrekre keti, ujü kekre ketiko, kedekekre ketiko zhosü m pütsü, uni mo ngoto, uni mo pü mhakhre lü khrü vato.

¹⁰M cejülü kehümiko unüphito unila, m ukenüla mhakhapü ketsü kezato; kekrelamori unila cejülü kehümiko kemezhe totila.

¹¹Zhosü sa Jihova Rüpü kerhü uniyo lü tade uni tosü uphepü thata; kemüche kezho thüma sükengoko yo voto.

¹²Uni tüyo mafüpü seti, “Hice khorite” M uni kemhüyo ta tüyo khota; uni ngomumiko süo ngo.

¹³Bavüdo sülü cece sü mezho shuta, nade zakeri zapü retuta, cece sütsü thüma nyethüna sata; müha küyiko mpe shuta, de tüyo keta Jihova zapo zale tho chu ta.

¹⁴Lüzhe kenao vota ri hihe lüzhe süo mhai zi vorita.

¹⁵Tüyochoyi thünao thecü füsü; süce tüyo mhafü kekro seta, poti, cejülü kedekosü u niepoo kederüve thite, pü Khrista ri; pü kechothe detato.

¹⁶Mehimi 24 ko uzü nyekü tsü pü reshü ta uko bayi bade, Jihova mhüjü lü.

¹⁷Uko pode, “Hako kemüza khapü ntsü süzü we O! Niepoo Jihova kekuo, tsü kebao, hijü vo ketao mu hisa vori ketoo; kekrelamori no keku püyite m kede thite.”

¹⁸M kedekekre tsüko unü mota, n lekhu vorite, kesamiko ne keti keto bate, no zhokhro pü n saju kepo miko tsü keto, kemesami kori, nza meprü ketakori, kezho ketsü metü; cejü müka ketoko mekava ketola.

¹⁹Tüyo Jihova kereshüce khrisü, kereshücelü jütsü jükho fü ringo; sülü methoko kri, füphrako, tüsüko m cece sü tsüko süsa phrü kri tsü koba.