Read Chokri Naga MÜNGOKESÜ 18 Bible Online

MÜNGOKESÜ 18 - Chokri Naga bible

MÜNGOKESÜ 18

¹Hisao lü tüyochoyimi kekrepü tüyo kiri I ngo, pü keku neshu; pü zapozale la cejü thi müve sü.

²Pü füphra kemeco pü füphra meto shu sü, Babylon kezhoo sü retu te, rüpü mesakemo, mera mesakemo ngokemetsü pü thite.

³Cejü shüye metü pü keregü kerezhü kra mezü de lekhu ngoi, cejülü kedeko metü püzü regü rezhü, cejülü hetho helimi pü ketikekra keveko la mhaneyi.

⁴Tüyomhafü kekrepü se, poti Thenopü celü tatate, neko pü kephomako thi mo keto la, size ne pü kethiko neko yo voho.

⁵Pü kephomako tasü tü ketso khote, Jihova pü kephomako (pükerhoko) rükra bate.

⁶Nekoyo zhokhro kha kesübi püzhokhro kha pü tsü süte, pü mhathoko zhokhro zakene kha pütsü süte, pü he sü chu kesüko zakena süpü pü tsüte.

⁷Kedithedü püthopüthipü kethürho sheli m hüpü pünüpünyü thi sheli, pü melü lü pü lü keti, I kedepü, balüba, thenosame mo, thelü keshü zü kesüho.

⁸Kekrelamori tüsa zho pülü ta vori tato, kesa, thekri, thekre, de mepü thenopü thü khri vato, Niepo Jihova pü neketi ketsüo ku keti la.

⁹Cejü kedeko püzü mhakesu kethiko hü kethevü shu kebako püla uko lü shü shuta to, de pü kri to, uko pü kethü mekho ngoto.

¹⁰Pü kemethi pe mepri de vokemecuco tha ba tato depoti, Alas, Alas, Babylon nade keku kene rüna? Bavüdo pülü n kemüjo vorite.

¹¹Hethoheli kethimiko pu krikrato, kekrelamori mipüri uko he kekhri basamo ketala.

¹²Tühetheli suna, raka, m ketsü uma kerü, pearls, sapütsafü, merezütsü kelo, mereshoro, sü pü kethi urü, kethenyüko, prü huko, sü uma kerüko, pitol (mesüthi) thegi, marble.

¹³Süthi, mharü keveko, ukenhü ketiko, utsakethiko hezo, tir, kemenücoko, ata, khonu, teko, gura, gura gari, thejümi, thüma kerhüroko,

¹⁴Use kethi uthiupho kemenyüko ncelü tata to, mhakeveko mu kezüveko ri tata to; no süko mhapü ceri ngo sa mota to.

¹⁵Tehekethimi mha hiko pü thi mene sü, pükemezhe (pümethi) ketsü ngo sü uko meche ketala kemecuco thata to, de kra m the kri thi bata to.

¹⁶Uko pode, alas, alas, nade tsüo le, linen fü keveko, merezü tsüko, mere vekrü tsüko, m suna, ketsü umakerüko, pearlsko pü pü retso kethi kole.

¹⁷Kekrelamori cene kezho süko bavüdo pülü mhapüri ba mote, rulü kezhomiko, ru kebamiko, ru kethomiri, jükezholü tühe kethimiri, rapeco bata.

¹⁸Uko krade, mekha to keba süo ngo kesüce poti, nade dipü ce nade hio bi kha!

¹⁹M uko nyopha pü ukopi kezapü bata, de kra, thekri thi ulü shü to, de poti, Alas, Alas nade tsüo le, ruyo mhama kerü jükezho lü pü vo ri pü thi mene kesüko, bavüdo pülü di mesate.

²⁰Neko püla nenüyite, ne apostle kemesako, sajü kepoko; Jihova neko khüpo thipü püyo süsüte.

²¹Tüyochoyimi kekupü ketsü mhakegü tsü kezho bi tsü bi kehüpü jükezholü sü, de poti, Babylon nadekezho-o khakemo kezho thipü jü kezholü sü ve, pü ngo sa yi hote.

²²Thefü, harp kefüko, tsale kethimiko, lu-ü kefüko, thecükefüko, ncelü sesa mota to; kemedu ketako ngosa motato; mhagü ketsü füko sesa motato.

²³Mefibü meto ketsü kevoko ngosa motato; zhosami m zhosapüko fü sesa motato; hethoheli kethi n thümako celü kezhomi n ra thenyü ketsü la cejü shüyeko metü kedo tayo.

²⁴Zhopokethimi, sajükepoko, kemesako za, kemesami dokhri kevako metü ncelü ngoi yo.