Read Chokri Naga MÜNGOKESÜ 19 Bible Online

MÜNGOKESÜ 19 - Chokri Naga bible

MÜNGOKESÜ 19

¹Hisao lü I tüyo thüma kekrofü kerekrü pü se, pode Haleluya; kelakeyi, zapozale, therho, kemeco u Niepoo zhü;

²Kekrelamori pü theco thepe kemezio zo; thenotekhrüpü mejo süte, pü keregü kerezhüko pü cejüo merho süte, pü belü choyikethiko za khü po thisüte.

³Uko posala de Haleluya, pü mekho to süketa-o kechothe batato.

⁴Pethi mehi 24 ko, m khonu 4 ko zürütsü Jihova reshü ta kedebalü kebao, uko pode “Haleluya”

⁵Thefüpü kedebalü paride “Jihova thsu te pü yithomi metü, pü kemeprükhü, kezho keni metüko.

⁶Thüma kekrofü bi tsüpü I se, jü kekro fü bi, tüsüfü kezhopü bi, pode, Haleluya; Niepo Jihova keku metü püzhü tsüo kedethite.

⁷Unü m ujü ve yi khe, therhopü pü tsükhe, tekonu nolü sü vorite, pücemi thi ketoo sü dojü pü bate.

⁸Füne kemenü kemeva pü pü retso thi nosü, mesa m mega ti; fü kemenü (Linen) sü kemathomi retsozo.”

⁹M pü ace poti thoyite, tekonu nolü lü cü kesüko ruko thoko; Ase pü posade, kepo hiko kethozo Jihova jü.

¹⁰I zürütsü pü phece pü reshü to le sü, veli pü ace pode, tsizi hite; I ri n bi ketsü yithomi pü zo, n sazüjüra, Jisu zhopo kethi mi Jihova reshüte, Jisu zhopo kethi sü sajü kepo rüpü zo.

¹¹M tü khri kesü I ngo, siri hihe, gura kemegapü pari m püyo ketao za Kemelü Keveo m kethoo, pü kemezi lü thecothepe thi m mizü theri thi.

¹²Pü mhüni metokeba meli bizo, püpiyo kede piraketu ta; pü thüzapü tho pü ta, mikremi süo se mo pü lebi zo kemosa.

¹³Püfüne thüzalüsa püta, püzacüpü, Jihova jü.

¹⁴Tüyo paheko gura kemega yo püsa mejita, linen fü kemesa, keve, mega m mesa tsü khita.

¹⁵Pütalü zechoyi keve ta prata, süo pü shuye metü meni ketola; pü thegi khi süko pi kekhato: pü hezo thü ketho thi therü kekuo lekhu pü kedüto.

¹⁶Pü bolayo m püdoyo theza pü tho pü ta, “Kedeko pi kedeo, Niepo pi Niepo.”

¹⁷Tüyochoyi pü naceyo thade I ngo; püphra metode seba, tüyo keta merako, prüketa metü, neko vori kengu yite, Jihova hü kezholü hite;

¹⁸Neko kedeko thiti ketola, thipahe kezhoko thi ti ketola, kekumiko thi ti ketola, gurayo keta thümako thi ti keto la, thüma metüko thiti ketola, mijü kethimiri thikemomiri, kezho ketsü metü.

¹⁹I kengo, khonu, cejülü kedemiko, uko paheko, uko gurayo ketao zü de theri thito tha püsajiko rizüde.

²⁰Khonuo m celü sajü kepoo, ungo mhathoko thi kesüo süko khi thüma shuketso ketao, khonuo zasi thopü ketako, m pü merhe kereshüko, uko tüpü merhü meza tosü keba metso lü süva.

²¹Gurayo ketao zechopü mesho kebako dokhri tsü va, zecho pü ta lü kepario m türako metü süko tipü ukechu thii.