Read Chokri Naga MÜNGOKESÜ 22 Bible Online

MÜNGOKESÜ 22 - Chokri Naga bible

MÜNGOKESÜ 22

¹Pü kerü jü kemesa kerhü jü tha a meka, mesa pü khriva kemetse bi, Jihova kedebayo tekonu celü vori.

²Chopü metsulü kerükhü lucohico kerhü sübo pü ba, süse kekreketsü 12 zhüyiyo, tekhri metsü use zhü süyo, uniko shuye thi kemenü süyo.

³Reshu keva basa ho; thürü-o kedeba m tekonu sülü ba to; pü choyimiko sülü pü reyibato;

⁴Uko püzü ngoto; m uko tükhayo püza bato.

⁵Tüzü sülü ba saho; uko libü ri ba ho, nace ri baho, kekrelamori Jihova Niepoo kevepü uko tsüto; uko kechothe püzü kede thi ta to.

⁶Pü ace pode, “Kepohiko ketho m kemelü; saju kepo kemesako Niepo Jihova tüyochoyimi ketsüpü yithomi ce mhathi vori mhai ta ketoko pü meka sü.

⁷Hihe, I mhai zi voritazü; saju jü hiko thopü kemeta lesi hikozüyi ketimi thejo kepütho.

⁸I, John mha hiko ngo, m se; mhahiko pü a mese mengo kesü tüyochoyimi mhüjülü I zürütsü pü reshü to lisü.”

⁹Pü ace po, “tsizihite; I ri n bi mi choyi mizo, nsazüjüra m prüo lipüko jü hiko thi m zü ketakomizo, Jihova reshü m pü jü zü ketamizo.”

¹⁰Pü ace pode, saju kepo lesidao mohor vüva hi te; pütü meno shu bate.

¹¹Pü mezi kemoo po mezimo bazote; mesa kemoo po mesamo bazole; kemezio po meziba zo te; mesakeba-o po mesa bazote.

¹²Hihe, I mhaizi vori ta ze; zhokhro püta, themako utho umhatho ce sü thi khasü tsü to.

¹³I Apha m Omega, therao m kekhao, shüdü-o m thelao rizo.

¹⁴Somi pü khakesüjüko thi m züyi sheli thejo kepütho, kerhü sü yo umezi nete, kharüko lü ta nade lü lü ta to.

¹⁵Kekrelamori chozuco teshüko ba, thenyümiko, keregü kerezhümiko, kedokhrimiko, marhe kereshümiko, kecejü kemeda unüketsümiko ri sülü ba to.

¹⁶I, Jisu tüyo a choyimi ketsüpü kehükoce mhahiko po mesesü; I David meo m püyo keprario, keshu tüvepü thenyü keveo.

¹⁷Pü rüpüo m zhosapü pode, “Tavori te, sekeyi mi po ri tavori posü, theri keta miko pori vori kerhüjü methu püyi te.

¹⁸Kekrelamori I lesida hi lü saju jü kese koce zhopo kha süyo, mhaceno thüma hu mhahiko pi sa sülize Jihova tüsako thopü kemetako pü pü tsü sa sü to.

¹⁹M thümahu mhace, saju jüko lesida hilü kebako püva lize, Jihova kerhü lesida lü pu mesüko khivato, kemesa nadeo lüri, m lesida hilü thopü kemeta kolü no.”

²⁰Pü mhahiko kepoo pode, I vorizo ketho to mhai de, Amen, sizizoto, vorite, Niepo Jisu.

²¹Niepoo Jisu Khrista Kekhrü po ne metüko zü vo keyi thi te. Amen.