Read Chol Genesis 14 Bible Online

Genesis 14 - Chol bible

Genesis 14

¹Che' ti' yorajlel Amrafel jini rey ti Sinar, yic'ot Arioc rey ti Elasar, yic'ot Quedorlaomer rey ti Elam, yic'ot Tidal rey ti Goim, ili reyob tsi' cha'leyob guerra ti' contra Bera, jini rey ti Sodoma, yic'ot Birsa rey ti Gomorra, yic'ot Sinab rey ti Adma, yic'ot Semeber rey ti Zeboim, yic'ot jini rey ti Bela, jiñʌch Zoar.

³Ti pejtelelob tsi' tempayob i bʌ ti joctʌl i c'aba' Sidim. Wʌle ya'ix an ñajb am bʌ i yʌts'mil.

⁴Mach chʌn yomobix i yumañob Quedorlaomer. Lajchʌmp'ejl (12) jab tsi' yumayob. Ti yuxlujump'ejlel (13) jab tsi' cʌyʌ i yumañob.

⁵Ti' chʌnlujump'ejlel (14) jab Quedorlaomer yic'ot jini uxtiquil reyob tsi' tempayob i bʌ ti guerra. Tsa' mʌjli i cha'añob ti' contra jini refajob ti Astarot Karnaim yic'ot jini zuzajob ti Ham yic'ot jini emijob ti Save Quiriataim,

⁶yic'ot jini horeojob ti wits i c'aba' Seir. Tsi' chocoyob majlel c'ʌlʌl ti Parán, ya' ti' ti' colem bʌ i tiquiñal pañimil.

⁷Tsa' sujtiyob. Tsa' c'otiyob ti Enmispat, jiñʌch Cades. Tsi' jisayob majlel i lumal amalecob yic'ot amorreojob chumulo' bʌ ti Hazezón Tamar.

⁸Tsa' loq'ui i rey Sodoma yic'ot i rey Gomorra yic'ot i rey Adma yic'ot i rey Zeboim yic'ot i rey Bela, jiñʌch Zoar. Ya' ti joctʌl i c'aba' Sidim tsa' caji' techob guerra ti' contra Quedorlaomer, i rey Elam yic'ot ti' contra Tidal, i rey Goim, yic'ot ti' contra Amrafel, i rey Sinar, yic'ot ti' contra Arioc, i rey Elasar. An chʌntiquil reyob ti' contra jo'tiquil reyob.

¹⁰But'ul jini joctʌl i c'aba' Sidim ti' yajñib tac asfalto. Che' bʌ tsa' puts'iyob i rey Sodoma yic'ot i rey Gomorra, tsa' ochiyob lamital i winicob ti' yajñib tac asfalto tsa' bʌ i ts'u'uyob ochel. Yaño' bʌ tsa' puts'iyob majlel ti wits.

¹¹Jini xcontrajob tsa' ochiyob ti Sodoma yic'ot ti Gomorra. Tsi' laj chilbeyob i chubʌ'an yic'ot pejtelel i bʌl i ñʌc'. Tsi' ch'ʌmʌyob majlel.

¹²Tsi' pʌyʌyob majlel Lot ja'el, jini chumul bʌ ti Sodoma. Jiñʌch i yalobil i yeran Abram. Tsi' laj chilbeyob i chubʌ'an. Tsa' majliyob.

¹³Juntiquil tsa' bʌ puts'i tsa' tili i suben Abram chuqui tsa' ujti. Hebreojʌch* Abram. Ya'ʌch chumul ba' cabʌl c'olol te' i cha'an Mamre. Amorreojʌch Mamre. I yijts'iñʌch Escol yic'ot Aner. Ti yuxticlel tsi' coltayob Abram.

¹⁴Che' bʌ tsi' yubi Abram chucbilix majlel i yalobil i yʌscun, tsi' pʌyʌ majlel i winicob chajpʌbilo' bʌ i cha'an, tsa' bʌ i yilayob pañimil ti' yotot. Jo'lujunc'al yic'ot waxʌclujuntiquilob (318). Tsi' yajñesayob majlel i contrajob c'ʌlʌl ti Dan.

¹⁵Ya' tsi' t'oxo i winicob. Tsi' tajayob ti guerra che' ti ac'ʌlʌl. Tsa' mʌjli i cha'an. Tsi' yajñesayob majlel ti Hoba, ti' ts'ejtʌl Damasco.

¹⁶Abram tsi' cha' chilbeyob pejtel i xujch'. Tsi' cha' pʌyʌ tilel ja'el Lot i yalobil i yeran, yic'ot i chubʌ'an, yic'ot x'ixicob yic'ot yaño' bʌ winicob.

¹⁷Tsa' sujti Abram che' bʌ tsi' t'uchta Quedorlaomer yic'ot jini reyob tsa' bʌ i pi'leyob ti guerra. Tsa' tili i rey Sodoma cha'an mi' taj Abram ti joctʌl i c'aba' Save, i Joctʌl Rey.

¹⁸Melquisedec, jini rey ti Salem, tsi' yʌq'ue waj yic'ot vino. I motomajʌch jini C'ax Ñuc bʌ Dios.

¹⁹Melquisedec tsi' yʌq'ue i yutslel i t'an Abram. Tsi' yʌlʌ: La' aq'uentic Abram i yutslel i t'an jini C'ax Ñuc bʌ Dios, tsa' bʌ i mele panchan yic'ot pañimil.

²⁰La' subentic i ñuclel Dios jini C'ax Ñuc Bʌ tsa' bʌ i yʌq'ueyet a t'uchtan a contrajob, che'en Melquisedec. Abram tsi' yʌq'ue Melquisedec i diezmojlel pejtelel i chubʌ'an.

²¹Jini i rey Sodoma tsi' sube Abram: Aq'ueñon jini winicob x'ixicob, pero jini chubʌ'añʌl ch'ʌmʌ jatet, che'en.

²²Abram tsi' sube: Tsac letsa j c'ʌb che' bʌ tsa cʌc'ʌ c t'an ti' tojlel c Yum, jini Cojach bʌ Dios Am bʌ i Ñuclel, jini tsa' bʌ i mele panchan yic'ot pañimil.

²³Ma'anic chuqui mi caj c ch'ʌm ti a c'ʌb mi junt'ujmic puy, mi i ch'ajñal xʌñʌb, mi yan tac bʌ a cha'an ame a wʌl: “Tsa cʌq'ue i chubʌ'an Abram; jini cha'an wen chumul”, ame che'iquet, che'en.

²⁴Jini jach mic ch'ʌm lojon chuqui tsi' c'uxuyob ch'itoñob yic'ot winicob tsajniyo' bʌ quic'ot. La' i ch'ʌmob Aner yic'ot Escol yic'ot Mamre chuqui tac yom ma' t'oxbeñob. Che' tsi' yʌlʌ Abram.