Read Chol Genesis 16 Bible Online

Genesis 16 - Chol bible

Genesis 16

¹Ma'anic i yalobil Sarai, i yijñam Abram. An i criada i c'aba' Agar, ch'oyol bʌ ti Egipto.

²Sarai tsi' sube Abram: Awilan, lac Yum tsi' yotsayon ti to'ol wa'al jach bʌ x'ixic. Yom ma' pi'len jini criada c cha'an. Tic'ʌl mi mejlel c taj calobil ti Agar. Che' tsi' yʌlʌ Sarai. Abram tsi' jac'be i t'an Sarai.

³Lujump'ejlix jab ya' chumul Abram ti' lumal Canaán. Sarai, i yijñam Abram, tsi' pʌyʌ Agar jini i criada ch'oyol bʌ ti Egipto. Sarai tsi' yʌq'ue Abram cha'an i pi'ʌl.

⁴Abram tsi' pi'le Agar. Tsa' caji i cʌntan i yalobil. Che' bʌ tsi' ña'ta woli' cʌntan i yalobil, tsa' caji' ts'a'len jini Sarai i co'.

⁵Sarai tsi' sube Abram: La' ochic ti a wenta ili wocol woli bʌ cubin. Tsa cʌq'ueyet Agar jini criada cha'an ma' pi'len. Che' bʌ tsi' q'uele cʌntʌbilix i yalobil, tsa' caji' ts'a'leñon. La' i melonla lac Yum, che'en Sarai.

⁶Abram tsi' sube Sarai: Awilan, a criadajʌch. Añʌch ti a wenta. Melben chuqui a wom, che'en Abram. Tsʌts tsi' pejca Sarai. Tsi' yʌc'ʌ ti wocol. Agar tsa' puts'i loq'uel ti' tojlel Sarai.

⁷I yángel lac Yum tsi' taja Agar ba'an cuxul bʌ ja' ti jochol bʌ lum, jini cuxul bʌ ja' am bʌ ti' bijlel Shur.

⁸Tsi' yʌlʌ: Agar, i criada Sarai, ¿baqui tsa' tiliyet? ¿Baqui ma' majlel? che'en. Agar tsi' yʌlʌ: Wolic puts'tan j co' Sarai, che'en.

⁹I yángel lac Yum tsi' sube: Cha' cucu ba'an a co'. Ac'ʌ a bʌ ti' wenta. Mi caj c wen p'ojlesan a walobil c'ʌlʌl mach tsicbilic cha'an cabʌlob, che'en.

¹¹I yángel lac Yum tsi' sube ja'el: Awilan, cʌntʌbil a walobil. Mi caj a wʌc' ti pañimil ch'iton. Mi caj a wotsʌben i c'aba' Ismael, come lac Yum tsi' q'uele a wocol.

¹²Ch'ejl che' bajche' ch'ejl bʌ burro mi caj i pʌs i bʌ ili winic. Mi caj i contrajin pejtel winicob. Pejtel winicob mi caj i contrajiñob ja'el. Tʌts'ʌl ba'an i pi'ʌlob mi' caj ti chumtʌl. Che' tsi' yʌlʌ i yángel lac Yum.

¹³Agar tsi' yotsʌbe i c'aba' lac Yum tsa' bʌ i pejca: Dios Yujil bʌ Q'uelojel, che'en, come tsi' yʌlʌ: Joñon ja'el tsaj q'uele Dios, che'en.

¹⁴Jini cha'an tsi' yotsʌbe i c'aba' jini pozo Jini Cuxul Bʌ Mu' bʌ i Q'uelon. Xinlʌpʌl an ti ojlil Cades yic'ot Bered.

¹⁵Agar tsi' yʌq'ue Abram ch'iton bʌ i yalobil. Abram tsi' yotsʌbe i c'aba' Ismael.

¹⁶Wʌcp'ejlix i jo'c'al (86) i jabil Abram che' bʌ tsi' yila pañimil Ismael i yalobil Abram yic'ot Agar.