Read Chol Genesis 17 Bible Online

Genesis 17 - Chol bible

Genesis 17

¹Che' lujump'ejlix yic'ot bolomp'ejl i jo'c'al (99) i jabilel Abram, lac Yum tsi' pʌsbe i bʌ Abram. Tsi' sube: Joñon P'ʌtʌl bʌ Dioson. Yom ma' wajñel tic tojlel. Ts'ʌcʌl yom i wenlel a pusic'al ti pejtelel ora. Ts'ʌcʌl yom i yuts'atlel a pusic'al.

²Mi caj c wa'chocon xuc'ul bʌ c t'an a wic'ot. Mi caj cʌq'ueñet cabʌl a p'olbal. Mi caj a wochel ti' tat winicob x'ixicob ti mojt ti mojt ti cabʌl lum, che'en Dios. Abram tsi' pʌcchoco i bʌ.

⁵Dios tsi' chʌn sube: Ma'anix mi caj a chʌn pejcʌntel ti Abram, “Ñuc bʌ tatʌl”. Mi caj a pejcʌntel ti Abraham, “I tat cabʌlob”, come tsa'ix cotsayet ti' tat winicob x'ixicob ti cabʌl lum.

⁶Mi caj cʌq'ueñet cabʌl a p'olbal. Mi caj c p'ojlesan a p'olbal ti cabʌl lum. An mu' bʌ caj i yochelob ti rey.

⁷Mi caj c wa'chocon xuc'ul bʌ c t'an quic'otet quic'ot a p'olbal ti pejtelel ora. Jiñʌch xuc'ul* bʌ c t'an: Joñon a Dioson, i Dioson a p'olbalob.

⁸Mi caj cʌq'ueñet yic'ot a p'olbal pejtel i lumal Canaán ba' woliyet ti ñumel majlel. La' cha'añʌch ti pejtelel ora, come Dioson, che'en.

⁹Dios tsi' cha' sube Abraham: An ti a wenta cha'an mi la' jac' jini xuc'ul bʌ c t'an jatet yic'ot a p'olbal ti pejtelel ora.

¹⁰Jiñʌch trato bʌ c t'an quic'otet yic'ot pejtel a p'olbal mu' bʌ caj i tilel. Wersa mi caj la' jac'. Mi caj i tsepbentel i pʌchʌlel jujuntiquil ch'iton ti la' tojlel.

¹¹Mi caj i tsepbentel la' pʌchʌlel. I yejtalʌch xuc'ul bʌ c t'an tsa' bʌ c wa'choco quic'otet.

¹²La' tsepbentic i pʌchʌlel pejtel ch'iton bʌ a p'olbal am bʌ waxʌcp'ejl q'uin. Che'ʌch yom mi' yujtel c'ʌlʌ ti pejtelel ora. La' tsepbentic i pʌchʌlel jini mu' bʌ i q'uel pañimil ti a wotot yic'ot jini mʌmbilo' bʌ a cha'an ti' tojlel yaño' bʌ, mach bʌ a p'olbalic.

¹³Jini mu' bʌ i q'uel pañimil ti a wotot yic'ot jini mu' bʌ a mʌn ti a taq'uin mi caj i tsepbentel i pʌchʌlel. Ya' ti la' bʌc'tal mi caj i tsictiyel xuc'ul bʌ c t'an ti pejtelel ora.

¹⁴Mi an juntiquil winic mach bʌ anic tsa' tsepbenti i pʌchʌlel i bʌc'tal, mi caj i chojquel loq'uel ti' tojlel i pi'ʌlob cha'an tsi' ñusa jini xuc'ul bʌ c t'an. Che' tsi' yʌlʌ Dios.

¹⁵Dios tsi' sube: Jixcu Sarai a wijñam, ma'anix mi caj a pejcan ti Sarai. I c'aba'ʌch Sara, “I yixic'al rey”.

¹⁶Mi caj cʌq'uen Sara i yutslel c t'an. Mi caj cʌq'ueñet yic'ot Sara ch'iton bʌ la' walobil. Isujm mi caj cʌq'uen Sara i yutslel c t'an. Mi caj i pejcʌntel ti' ña' winicob ti cabʌl lum. An mu' bʌ caj i yochelob ti rey. Che' tsi' yʌlʌ Dios.

¹⁷Abraham tsi' pʌcchoco i bʌ. Tsi' cha'le tse'ñal. Tsi' yʌlʌ ti' pusic'al: ¿Mejl ba i tilel calobil che' anix jo'c'al c jabilel? ¿Mejl ba i tilel i yalobil Sara che' anix lujump'ejl i jo'c'al i jabilel? Che'ʌch tsi' ña'ta.

¹⁸Abraham tsi' sube Dios: La' tajlec i wenlel Ismael ti a tojlel, che'en.

¹⁹Dios tsi' yʌlʌ: Mach jinic i yalobil a wijñam. Sara a wijñam mi caj i yʌq'ueñet ch'iton bʌ a walobil. Mi caj a wotsʌben i c'aba' Isaac. Mi caj c wa'chocon xuc'ul bʌ c t'an yic'ot Isaac, yic'ot i p'olbal Isaac ti pejtelel ora.

²⁰Jixcu Ismael, awilan, mi caj cʌq'uen i yutslel c t'an che' bajche' tsa' c'ajtibeyon. Mi caj c p'ojlesʌben i yalobil. Cabʌl mi' caj ti p'ojlel i yalobilob. Mi caj cʌq'uen lajchʌntiquil i yalobilob. Laj yumʌlob ti pejtelel. Jujuntiquil mi caj i sujtel ti colem tejclum yilal.

²¹Pero jini xuc'ul bʌ c t'an mi caj c wa'chocon yic'ot Isaac mu' bʌ caj i yʌc' ti pañimil Sara che' bajche' ti ili ora ti yambʌ jab. Che' tsi' yʌlʌ Dios.

²²Che' bʌ tsa' ujti i pejcan Abraham, tsa' letsi majlel Dios.

²³Abraham tsi' pʌyʌ Ismael i yalobil yic'ot pejtel x'e'telob i cha'an tsa' bʌ i yilayob pañimil ti' yotot yic'ot jini mʌmbilo' bʌ ti' taq'uin, pejtelel winicob ti' yotot Abraham. Tsi' tsepbeyob i pʌchʌlel i bʌc'tal ti jini jach bʌ q'uin, che' bajche' Dios tsi' sube.

²⁴Bolonlujump'ejlix i jo'c'al (99) i jabilel Abraham che' bʌ tsa' tsepbenti i pʌchʌlel i bʌc'tal.

²⁵Uxlujump'ejlix (13) i jabilel Ismael i yalobil Abraham che' bʌ tsa' tsepbenti i pʌchʌlel i bʌc'tal.

²⁶Ti jini jach bʌ q'uin tsa' tsepbenti i pʌchʌlel i bʌc'tal Abraham yic'ot Ismael i yalobil.

²⁷Tsa' tsepbenti i pʌchʌlel i bʌc'tal pejtel jini winicob año' bʌ ti' yotot Abraham, jini tsa' bʌ i yilayob pañimil ti' yotot yic'ot mʌmbilo' bʌ ti taq'uin ch'oyolo' bʌ ti yambʌ lum.