Read Chol Genesis 18 Bible Online

Genesis 18 - Chol bible

Genesis 18

¹Tsi' pʌsʌ i bʌ lac Yum ti' tojlel Abraham ba'an jini c'olol te' ya' ti Mamre. Ya' buchul Abraham ti' ti' pisil bʌ i yotot che' c'uxix q'uin.

²Tsa' caji' can q'uel pañimil. Awilan, ix tilelob uxtiquil winicob. Che' bʌ tsi' q'ueleyob, tsa' loq'ui ti pisil bʌ i yotot. Ajñel tsa' majli i tajob. Tsi' pʌcchoco i bʌ ti lum.

³Abraham tsi' yʌlʌ: C Yum, mi tsac taja i yutslel a pusic'al, mach yomic ñumel jach ma' ñumel. A winicon.

⁴La' c ch'ʌm lojon tilel ts'ita' ja' cha'an mi la' poc la' woc. C'aja la' wo ti' yebal jini te'.

⁵La' c ch'ʌm tilel ts'ita' waj, cha'an mi la' cha' p'ʌt'an. Ti wi'il mi mejlel la' cha' majlel. Jini cha'an tsa' juliyetla wʌ' ba'an la' winic. Che' tsi' yʌlʌ Abraham. Tsi' yʌlʌyob: Mele che' bajche' tsa' wʌlʌ, che'ob.

⁶Ti ora tsa' ochi Abraham ti' yotot ba'an Sara. Tsi' yʌlʌ: Xʌc'ʌ uxc'ojl trigo wen juch'bil bʌ. Mele waj, che'en Abraham.

⁷Ti ajñel tsa' majli Abraham ba'an i wacax. Tsi' yajca alʌ wacax, jujp'em bʌ. Tsi' yʌq'ue jini x'e'tel i cha'an. Ti ora jach tsi' chajpa.

⁸Tsi' ch'ʌmʌ majlel lew yic'ot leche yic'ot alʌ wacax tsa' bʌ i chajpa. Tsi' yʌq'ueyob i c'ux jini winicob. Wa'al Abraham ba' añob che' bʌ tsi' c'uxuyob ya' ti yebal te'.

⁹Jini winicob tsi' subeyob: ¿Baqui an Sara a wijñam? che'ob. Abraham tsi' yʌlʌ: Ya'an ti otot, che'en.

¹⁰Tsi' yʌlʌ: Isujm mi caj c cha' tilel che' mi' ts'ʌctiyel i yorajlel. Mi caj i yilan pañimil ch'iton bʌ i yalobil Sara a wijñam, che'en. Sara woli' ñich'tan ti' ti' otot ya' ti' pat.

¹¹Ñoxobix Abraham yic'ot Sara. Xñejep'ix Sara.

¹²Tsi' cha'le tse'ñal Sara ti' pusic'al. Tsi' yʌlʌ: Che' ñoxonix, che' ñoxix c ñoxi'al, ¿mu' ba caj c taj i tijicñʌyel c pusic'al? che'en.

¹³Lac Yum tsi' sube Abraham: ¿Chucoch tsi' cha'le tse'ñal Sara? ¿Chucoch tsi' yʌlʌ: “Isujm ba mi caj i yilan pañimil calobil che' ñoxonix”? che'en.

¹⁴¿Mach ba mejlic c mel pejtel chuqui tac wocol? Cha' talon che' i yorajlelix mic ts'ʌctesan c t'an. Mi caj i yilan pañimil i yalobil Sara, che'en.

¹⁵Tsa' caji' yʌl Sara: Mach che'ic tsac cha'le t'an. Ma'anic tsac cha'le tse'ñal, che'en. Come tsi' cha'le bʌq'uen. Lac Yum tsi' yʌlʌ: Isujm tsa' cha'le tse'ñal, che'en.

¹⁶Jini winicob tsa' wa'leyob cha'an mi' majlelob ti Sodoma. Tsi' ñejñayob Sodoma. Abraham tsa' majli i poj pi'leñob majlel.

¹⁷Lac Yum tsi' yʌlʌ ti' pusic'al: ¿Mu' ba caj c muc tic pusic'al chuqui mi caj c mel, cha'an ma'anic mi' yubin Abraham?

¹⁸Come isujm mi caj i p'ojlel i yalobilob Abraham. Wen ñuc mi caj i yajñelob, wen p'ʌtʌlob ja'el. Pejtel winicob x'ixicob año' bʌ ti pañimil mi caj i tajob i yutslel c t'an ti Abraham.

¹⁹Cujilix Abraham mi caj i yʌq'ueñob mandar i yalobilob yic'ot pejtel año' ti' yotot yic'ot jini mu' bʌ caj i tilelob ti' yotot, cha'an mi' cha'leñob xʌmbal ti' bijlel i Yum, cha'an mi' melob chuqui tac uts'at yic'ot chuqui tac toj. Che' jini mux caj ti ts'ʌctiyel c t'an tsa' bʌ cʌlʌ ti' tojlel Abraham. Che' tsi' yʌlʌ lac Yum.

²⁰Lac Yum tsi' sube: Junyajlel sojquem jini año' bʌ ti Sodoma yic'ot Gomorra. Cabʌlob i mul.

²¹Mi caj c jubel majlel j q'uel mi isujm tsi' cha'leyob mulil bajche' c'amel woli cubin, come woli ti oñel i mul yubil. Ya'to tsiquil mi isujm, che'en.

²²Tsa' majliyob ti Sodoma jini winicob. Abraham tsa' to wa'le' ti' tojel lac Yum.

²³Abraham tsi' lʌc'tesa i bʌ. Tsi' yʌlʌ: ¿Mu' ba caj a jisan jini toj bʌ yic'ot jontol bʌ?

²⁴Mi an lujuntiquil i yuxc'al (50) tojo' bʌ ti tejclum, ¿mu' ba caj a jisan jini tejclum che' jini? ¿Mach ba anic mi caj a coltan cha'an jini lujuntiquil i yuxc'al tojo' bʌ ti tejclum?

²⁵¿Mu' ba caj a tsʌnsan jini tojo' bʌ yic'ot jontolo' bʌ? Che' jini junlajalob yilal jini tojo' bʌ yic'ot jontolo' bʌ. Pero mach che'ic ma' mel. Jini xMeloñel mu' bʌ i mel pejtel año' bʌ ti pañimil, ¿mach ba muq'uic i melob ti toj? Mu' cu. Che' tsi' yʌlʌ Abraham.

²⁶Lac Yum tsi' yʌlʌ: Mi tsac taja ti Sodoma lujuntiquil i yuxc'al tojo' bʌ ti tejclum, ma'anic mic jisan jini tejclum cha'an c'ux mi cubin ili tojo' bʌ, che'en.

²⁷Abraham tsi' jac'ʌ: La' c chʌn pejcañet c Yum anquese pec'on, ts'ubeñon, i tʌñilon c'ajc yilal.

²⁸Mi anto yom jo'tiquil cha'an mi' tajtʌl jini lujuntiquil i yuxc'al tojo' bʌ, ¿mu' ba caj a jisan pejtelel jini tejclum cha'an ma'anic tsa' tajle jo'tiquil? Che' tsi' yʌlʌ. Tsi' jac'ʌ: Mach muq'uic c jisan tejclum mi tsac taja jo'tiquil i yuxc'al, che'en.

²⁹Abraham tsi' cha' pejca: ¿Jixcu mi tsa' tajle cha'c'al ya'i? che'en. Tsi' jac'ʌ: Mach muq'uic c jisan mi tsac taja cha'c'al, che'en.

³⁰Abraham tsi' yʌlʌ: Mach yomic mi' tejchel a mich'ajel, c Yum. Mi caj c cha' pejcañet. ¿Jixcu mi tsa' tajle lujuntiquil i cha'c'al (30) ya'i? che'en. Lac Yum tsi' yʌlʌ: Cha'an lujuntiquil i cha'c'al ma'anic mic jisan jini tejclum, che'en.

³¹Abraham tsi' yʌlʌ: Awilan, tsa' caji c pejcan c Yum. Tic'ʌl mi an jach junc'al ya'i, che'en. Lac Yum tsi' yʌlʌ: Mach muq'uic c jisan tejclum cha'an junc'al, che'en.

³²Abraham tsi' yʌlʌ: Mach yomic mi' tejchel a mich'ajel, c Yum. Junyajl jax mic cha' pejcañet. Tic'ʌl mi an jach lujuntiquil ya'i, che'en. Lac Yum tsi' yʌlʌ: Mach muq'uic c jisan mi an lujuntiquil, che'en.

³³Lac Yum tsa' majli che' bʌ tsa' ujti i pejcan Abraham. Tsa' cha' sujti majlel Abraham ti' yotot.