Read Chol Genesis 19 Bible Online

Genesis 19 - Chol bible

Genesis 19

¹Jini cha'tiquil ángelob tsa' tiliyob ti Sodoma che' wolix ti bʌjlel q'uin. Buchul Lot ti' ti' Sodoma. Che' bʌ tsi' q'uele ix tilelob, tsa' majli i tajob. Tsi' pʌcchoco i bʌ.

²Tsi' yʌlʌ: C yumob, awocolic, ochenla ti cotot, come la' winicon. Ñusanla ac'ʌlel ilayi, poco la' woc. Che' ti sʌc'ajel mi mejlel la' ch'ojyel cha'an mi la' cha' majlel, che'en Lot. Tsi' yʌlʌyob: Mach che'ic yom. Mi caj c ñusan lojon ac'ʌlel ti jumpat, che'ob.

³Lot tsi' wersa subeyob ochel. Tsi' jac'ʌyob. Tsa' ochiyob ti' yotot. Lot tsi' chajpʌbeyob i bʌl i ñʌc'. Tsi' pojpobeyob waj. Tsi' c'uxuyob.

⁴Che' bʌ maxto anic tsa' cajiyob ti wʌyel, tsa' tiliyob pejtel jini winicob año' bʌ ti tejclum i c'aba' Sodoma, ch'iton bʌ yic'ot ñox bʌ winicob. Motocñayob tsi' joyoyob jini otot.

⁵Tsi' pejcayob Lot: ¿Baqui añob jini winicob tsa' bʌ juliyob ba' añet che' ti ic'ajel? La' loq'uicob ba' añon lojon cha'an mic pi'len lojon, che'ob.

⁶Tsa' loq'ui Lot ti' ti' i yotot ya' ba' añob. Tsi' ñup'u i ti' otot ti' pat.

⁷Lot tsi' yʌlʌ: Awocolic, c pi'ʌlob, mach la' cha'len jontolil bajche' jini.

⁸Awilan, an cha'tiquil xch'oc bʌ calobilob maxto bʌ anic tsi' taja winic. La' c pʌybeñetla loq'uel. Mi mejlel la' tic'lan che' bajche' la' wom. Pero mach la' tic'lan ili winicob, come tsa' ochiyob ti cotot tic wenta, che'en Lot.

⁹Tsi' yʌlʌyob: Tʌts'ʌ a bʌ ya'i, che'ob. Tsi' yʌlʌyob ja'el: Tsa' tili ili winic ti poj chumtʌl, pero yom ochel ti xmeloñel. Wʌle wen ñumen mi caj c tic'lañet lojon bajche' jini winicob. Tsi' wit chocoyob Lot. Colelix i jem i ti' otot che' bʌ tsi' ñochtayob.

¹⁰Jini winicob ti mal tsi' loc'sayob i c'ʌb. Tsi' pʌyʌyob ochel ti mal otot ya' ba' añob. Tsi' ñup'beyob i ti' otot.

¹¹Tsi' yotsayob ti xpots' jini año' bʌ ti' ti' otot, jini ch'o'ch'oco' bʌ yic'ot ñuco' bʌ. Tsa' lujb'ayob i sʌclan i ti' otot.

¹²Jini winicob tsi' subeyob Lot: ¿Anto ba yambʌ a pi'ʌlob ilayi? ¿Am ba a nij'al? ¿Am ba ch'iton bʌ a walobilob, xch'oc bʌ a walobilob, yambʌ a pi'ʌlob ti tejclum? Loc'sañob ti ili tejclum.

¹³Come mi caj c jisan lojon ili tejclum, come cabʌl jax i mul ili winicob ti Sodoma. Tsa' c'ʌlʌl c'oti i tuwel ti panchan. Lac Yum tsi' chocoyon lojon tilel cha'an mic jisan lojon ili tejclum, che'ob.

¹⁴Lot tsa' majli i suben i nij'alob tsa' bʌ i c'ajtibeyob i yalobilob cha'an i yijñam: Ora yom mi la' loq'uel wʌ'i, come lac Yum mi caj i jisan ili tejclum, che'en. Pero i nij'alob tsi' lon ña'tayob sojquem i jol.

¹⁵Che' bʌ tsa' sʌc'a pañimil jini ángelob tsi' subeyob Lot: Se'sebet mecu. Ch'ojyen. Pʌyʌ loq'uel a wijñam yic'ot jini cha'tiquil xch'oc bʌ a walobilob wʌ' bʌ añob, ame jisʌntiquetla yic'ot jini tejclum, che'ob.

¹⁶Pero tsa' to jal'a Lot. Jini winicob tsi' chucbeyob i c'ʌb Lot yic'ot i c'ʌb i yijñam yic'ot i c'ʌb cha'tiquil xch'oc bʌ i yalobil. Lac Yum tsi' p'unta Lot. Tsi' pʌyʌyob loq'uel. Tsa' majli i cʌyob ti' ti' tejclum.

¹⁷Che' bʌ tsa' ujti i pʌyob loq'uel, juntiquil tsi' yʌlʌ: Puts'en cha'an cuxul ma' wajñel. Mach a q'uel a pat. Mach a cʌytʌl ti joctʌl. Puts'en c'ʌlʌl ti wits, ame jisʌntiquet, che'en.

¹⁸Lot tsi' subeyob: C yumob, mach che'ic yom. Tsa' pʌsbeyon i yutslel a pusic'al. Machic tsa' p'untayon tsa' chʌmiyon. Mach mejlic c puts'el c'ʌlʌl ti wits ame i tajon bʌbʌq'uen bʌ, ame chʌmicon.

²⁰Q'uele jini tejclum lʌc'ʌl bʌ ba' añon. ¿Mach ba ch'o'ch'oquic? La' puts'icon ya'i cha'an ma'anic mic chʌmel, che'en Lot.

²¹Jini winic tsi' sube Lot: Awilan, mic jac'beñet jini tsa' bʌ a c'ajtibeyon ja'el. Ma'anic mi caj c jisan ili tejclum tsa' bʌ a c'ajti.

²²Se'sebet. Cucu ya'i come ma'anic chuqui mi mejlel c mel jinto ma' c'otel ya'i, che'en. Jini cha'an tsa' otsʌbenti i c'aba' jini tejclum Zoar.

²³Pasemix q'uin che' bʌ tsa' c'oti Lot ti Zoar.

²⁴Lac Yum tsi' choco jubel ti panchan xajlel woli bʌ ti lejmel yic'ot c'ajc. Tsa' yajli ti Sodoma yic'ot ti Gomorra che' bajche' ja'al.

²⁵Lac Yum tsi' jisa pejtelel jini tejclum tac, yic'ot pejtelel jini joctʌl, yic'ot pejtel winicob x'ixicob, yic'ot pejtelel cuxul tac bʌ.

²⁶Pero i yijñam Lot tsi' cha' sutq'ui i bʌ cha'an mi' q'uel i pat. Tsa' sujti ti ats'am bʌ xajlel.

²⁷Che' bʌ wolix i sʌc'an pañimil tsa' majli Abraham ya' ba' tsa' wa'le ti' tojel lac Yum.

²⁸Tsi' ñajti q'uele Sodoma yic'ot Gomorra yic'ot pejtel jini lum am bʌ ti joctʌl. Awilan, i buts'il jini lum woli' letsel che' bajche' i buts'il tic'ʌjib.

²⁹Dios tsi' ña'ta Abraham che' bʌ tsi' jisa jini tejclum tac ti joctʌl. Tsi' choco loq'uel Lot ti yojlil ba' tsa' ñumi c'ajc che' bʌ tsi' jisa jini tejclum tac.

³⁰Tsa' letsi majlel Lot ti Zoar. Tsa' chumle ti wits yic'ot cha'tiquil xch'oc bʌ i yalobilob. Tsi' bʌc'ña chumtʌl ti Zoar. Tsa' chumle ti ch'en yic'ot cha'tiquil i yalobilob.

³¹Jini chichʌl bʌ tsi' sube i yijts'in: Ñoxix lac tat. Ma'anix winic cha'an mi' pi'leñonla che' bajche' i tilel winicob ti pejtelel pañimil.

³²La' la cʌq'uen vino lac tat. Mi caj lac wʌyel yic'ot, ame jilic i p'olbal lac tat, che'en.

³³Tsi' yʌq'ueyob i tat i jap vino ti ac'ʌlel. Jini chichʌl bʌ tsa' majli ti ñoltʌl yic'ot i tat. Ma'anic tsi' na'ta Lot baqui ora tsa' ñole i yalobil mi baqui ora tsa' ch'ojyi.

³⁴Che' ti yijc'ʌlal jini chichʌl bʌ tsi' sube i yijts'in: Awilan, tsa' ñoleyon quic'ot lac tat. La' la cʌq'uen i jap vino wʌle ti ac'ʌlʌl ja'el. Yom ma' ñoltʌl yic'ot, cha'an mi' tilel la calobil i p'olbal lac tat, che'en.

³⁵Tsi' cha' aq'ueyob i jap vino ti ac'ʌlʌl. Jini ijts'iñʌl bʌ tsi' jac'ʌ. Tsa' ñole yic'ot. Ma'anic tsi' ña'ta Lot baqui ora tsa' ñole i yalobil mi baqui ora tsa' ch'ojyi.

³⁶Che' jini tsa' caji i cʌntañob i yalobilob Lot ti cha'ticlel cha'an i tat.

³⁷Tsi' yila pañimil ch'iton bʌ i yalobil jini chichʌl bʌ. Tsi' yotsʌbe i c'aba' Moab. I tatʌch moabob.

³⁸Tsi' yila pañimil ch'iton bʌ i yalobil jini ijts'iñʌl bʌ ja'el. Tsi' yotsʌbe i c'aba' Benammi. I tatʌch amoñob.