Read Chol Genesis 2 Bible Online

Genesis 2 - Chol bible

Genesis 2

¹Tsa' ujti i mel jini panchan yic'ot pañimil yic'ot pejtelel i bʌl.

²Dios tsa' ujti i mel i ye'tel. Tsi' c'aja i yo ti' wucp'ejlel q'uin che' ujtemix pejtel i ye'tel tsa' bʌ i mele.

³Dios tsi' yʌlʌ uts'at i wucp'ejlel q'uin. Tsi' q'uele ti ch'ujul. Come ti' wucp'ejlel q'uin tsi' c'aja i yo cha'an pejtel i ye'tel tsa' bʌ i mele.

⁴Lac Yum Dios tsi' mele panchan yic'ot pañimil. Che'ʌch tsa' mejli.

⁵Che' maxto pasemic jini mu' bʌ i colel ti pʌc'ʌbʌl, lac Yum Dios maxto anic tsi' choco tilel ja'al ti pañimil. Maxto anic majch tsi' cha'le e'tel ti lum.

⁶Tsa' loq'ui tilel ja' ti lum. Tsa' ach'a pejtel jini lum.

⁷Lac Yum Dios tsi' mele winic ti ts'ubejn. Tsi' wujtʌbe i ni'. Tsi' yʌq'ue i jap ic' cha'an cuxul mi' yajñel. Tsa' aq'uenti winic cuxul bʌ i ch'ujlel.

⁸Lac Yum Dios tsi' pʌc'ʌ pʌc'ʌbʌl ti Edén ya' ti' pasibal q'uin. Ya'i tsi' yʌc'ʌ ti chumtʌl jini winic tsa' bʌ i mele.

⁹Lac Yum Dios tsi' yʌc'ʌ ti colel ti lum pejtelel i t'ojol bʌ te' yic'ot uts'at bʌ cha'an i bʌl ñʌc'ʌl. Tsi' yʌc'ʌ ti colel ja'el ya' ti' yojlil jini pʌc'ʌbʌl jini te' mu' bʌ i yʌc' laj cuxtʌlel yic'ot jini te' mu' bʌ i yʌc' ti cʌjñel chuqui uts'at yic'ot chuqui jontol.

¹⁰Jump'ejl colem ja' tsa' loq'ui majlel ti Edén cha'an mi' yʌch'esan jini pʌc'ʌbʌl. Ya' ba' tsa' loq'ui ti pʌc'ʌbʌl tsi' t'oxo i bʌ ti chʌnxʌjc' colem ja'.

¹¹I c'aba' jini ñaxan bʌ ja' jiñʌch Pisón. Jiñʌch jini ja' am bʌ ti' joytilel pejtelel i lumal Havila ya' ba' mi' tajtʌl cabʌl oro. An ja'el cha'chajp xajlel jiñʌch bedelio yic'ot ónice.

¹³I cha'p'ejlel ja' jiñʌch Gihón. Jiñʌch am bʌ ti' joytilel pejtelel i lumal Cus.

¹⁴I yuxp'ejlel ja' jiñʌch Hidekel. Jiñʌch mu' bʌ i majlel ti' tojel Asiria ba' mi' pasel q'uin. I chʌmp'ejlel ja' jiñʌch Eufrates.

¹⁵Lac Yum Dios tsi' pʌyʌ jini winic. Tsi' yʌq'ue ti' wenta jini pʌc'ʌbʌl i c'aba' Edén cha'an mi' yʌc'ñan, cha'an mi' cʌntan.

¹⁶Lac Yum Dios tsi' yʌq'ue mandar jini winic. Tsi' yʌlʌ: Mi mejlel a c'ux i wut pejtelel te' am bʌ ti pʌc'ʌbʌl.

¹⁷Cojach jini te' mu' bʌ i yʌq'ueñet a cʌn chuqui uts'at yic'ot chuqui jontol mach a c'ux, come ti jini q'uin che' ma' c'uxben i wut wersa mi caj a chʌmel, che'en.

¹⁸Lac Yum Dios tsi' yʌlʌ: Mach uts'atic mi' yajñel ti' bajñelil jini winic. Mi caj c melben i yaj coltaya cha'an mi' yajñel yic'ot, che'en.

¹⁹Lac Yum Dios tsi' c'ʌñʌ lum cha'an mi' mel pejtel bʌte'el yic'ot alʌc'ʌl yic'ot mut ti chajp ti chajp. Tsi' laj pʌyʌ tilel ba'an jini winic cha'an mi' yotsʌben i c'aba', pero ma'anic tsa' tajle i pi'ʌl jini winic cha'an mi' yajñel yic'ot.

²¹Lac Yum Dios tsi' yotsʌbe tam bʌ i wʌyel jini winic. Tsa' wʌyi. Dios tsi' loc'sʌbe junts'ijt i ch'il'at. Tsi' cha' ñup'be i bʌc'tal ba' tsa' loq'ui.

²²Lac Yum Dios tsi' loc'sʌbe junts'ijt i ch'il'at winic cha'an mi' mel x'ixic. Dios tsi' pʌyʌ tilel jini x'ixic ba'an jini winic.

²³Jini winic tsi' yʌlʌ: Jiñʌch c bʌquel loq'uem bʌ tic bʌquel yic'ot c bʌc'tal loq'uem bʌ tic bʌc'tal. I c'aba' x'ixic come loq'uem ti winic, che'en.

²⁴Jini cha'an winicob mi' cʌyob i tat i ña'. Mi' chʌn ajñelob yic'ot i yijñam. Jini cha'tiquil mi' yochelob ti juntiquil jach.

²⁵Pits'ilob ti cha'ticlel, jini winic yic'ot i yijñam. Ma'anic tsi' cha'leyob quisin.