Read Chol Genesis 20 Bible Online

Genesis 20 - Chol bible

Genesis 20

¹Tsa' loq'ui Abraham ya'i. Tsa' majli c'ʌlʌ ti lum am bʌ ti sur. Tsa' poj chumle ti Gerar xinlʌpʌl ti ojlil Cades yic'ot Shur.

²Abraham tsi' yʌlʌ: Jiñʌch quijti'an jini Sara, che'en, anquese i yijñamʌch. Abimelec jini rey ti Gerar tsi' choco majlel i winic. Tsi' pʌyʌ Sara.

³Pero Dios tsi' sube Abimelec ti ñajal che' ti ac'ʌlel: Awilan, mi caj a chʌmel cha'an jini x'ixic tsa' bʌ a pʌyʌ, come i yijñamʌch winic.

⁴Abimelec ma'anic tsi' ñochta jini x'ixic. Tsi' yʌlʌ: C Yum, ¿mu' ba a tsʌnsan winicob x'ixicob mach bʌ anic i mul?

⁵¿Mach ba anic tsi' yʌlʌ jiñʌch i yijti'an? Jini x'ixic ja'el tsabi yʌlʌ cʌscuñʌch ili winic. Ti' yutslel c pusic'al tsac pʌyʌ. Ma'anic c mul yubil, che'en Abimelec.

⁶Dios tsi' sube Abimelec ti ñajal: Isujm, cujil uts'at a pusic'al che' bʌ tsa' pʌyʌ. Joñon ja'el tsac mʌctayet ame ma' cha'len mulil tij contra. Jini cha'an tsac tiq'uiyet ame a ñochtan jini x'ixic.

⁷Wʌle yomix ma' cha' aq'uen i yijñam jini winic, come x'alt'añʌch. Mi caj i mel oración cha'an ma'anic ma' chʌmel. Mi ma'anic ma' cha' aq'uen i yijñam, mux caj a wersa chʌmel yic'ot pejtel a cha'año' bʌ, che'en Dios.

⁸Jini cha'an Abimelec seb to tsa' ch'ojyi ti sʌc'ajel. Tsi' pʌyʌ tilel pejtel i winicob. Tsi' subeyob pejtel iliyi. Tsa' wen cajiyob ti bʌq'uen jini winicob.

⁹Abimelec tsi' pʌyʌ tilel Abraham. Tsi' sube: ¿Chucoch tsa' lotiyon? Ma'anic chuqui tsac tumbeyet. ¿Chucoch ma' lon aq'ueñon lojon c taj ñuc bʌ c mul joñon quic'ot jini año' bʌ tic lumal? Mach wenic bajche' tsa' melbeyon. ¿Mach ba anic a pusic'al? ¿Chucoch che'ʌch tsa' mele bajche' iliyi? che'en Abimelec.

¹¹Abraham tsi' yʌlʌ: Tsac cha'le iliyi come tsac ña'ta ma'anic i bʌc'ñʌntel Dios ilayi. Tsa cʌlʌ mux caj i tsʌnsañoñob a winicob cha'an quijñam. Che'ʌch tsac lon ña'ta.

¹²Jiñʌch mero quijti'an, come i yalobil c tat pero mach i yalobilic c ña'. Tsac pʌyʌ cha'an quijñam.

¹³Che' bʌ Dios tsi' subeyon loq'uel ti' yotot c tat cha'an mic majlel ti xʌmbal, tsac sube quijñam: “Yom ma' pʌsbeñon i yutslel a pusic'al. Ti jujump'ejl tejclum ba' mi caj laj c'otel yom ma' sub: Cʌscuñʌch ili winic, che' yom ma' wʌl”, cho'on tsac sube. Che' tsi' yʌlʌ Abraham.

¹⁴Abimelec tsi' pʌyʌ tilel tiñʌme' yic'ot wacax yic'ot i mozojob yic'ot criadajob. Tsi' yʌq'ueyob Abraham. Tsa' cha' aq'uenti Abraham Sara i yijñam.

¹⁵Abimelec tsi' yʌlʌ: Awilan, wʌ'ʌch an c lumal ti a tojel. Yom ma' chumtʌl baqui jach a wom, che'en.

¹⁶Tsi' sube Sara: Awilan, tsa cʌq'ue a wʌscun jump'ejl mil taq'uin melbil bʌ ti plata. Jiñʌch i tojol mi an c mul ti' tojlel pejtel año' bʌ a wic'ot. Toj'esʌbiletix ti' wut pejtelelob, che'en Abimelec. Che'ʌch tsa' ujti.

¹⁷Abraham tsi' pejca Dios ti oración. Dios tsi' lajmesa Abimelec. Tsi' lajmesa ja'el i yijñam Abimelec yic'ot criadajob. Che' jini tsa' mejli i cha' cʌntañob i yalobil.

¹⁸Come lac Yum ma'anic tsi' yʌq'ueyob i cʌntan i yalobilob jini x'ixicob año bʌ ti' yotot Abimelec che' bʌ ya'to an Sara i yijñam Abraham.