Read Chol Genesis 23 Bible Online

Genesis 23 - Chol bible

Genesis 23

¹Che' wucp'ejlix i wucc'al (127) i jabilel Sara tsa' chʌmi ya' ti Quiriat Arba, jiñʌch Hebrón ya' ti' lumal Canaán. Abraham tsa' tili i yuc'tan Sara. Ch'ijiyem i pusic'al.

³Abraham tsa' wa'le ti' t'ejl jini ch'ujlelʌl. Tsi' sube i yalobilob Het:

⁴Tilemon ti yambʌ lum. Ti majan jach woliyon ti chumtʌl ti a lumal. Ma'anic c cha'an lum cha'an mucoñibʌl. Chombeñon lum ba' mi mejlel c muc quijñam tsa' bʌ chʌmi, che'en Abraham.

⁵I yalobilob Het tsi' subeyob Abraham:

⁶C yum, ubiñon lojon. Dios tsi' yotsayet ti yumʌl tic lumal lojon. Mucu a wijñam ti c'ax uts'at bʌ mucoñibʌl c cha'an lojon. Ma'anic majch mi caj i tiq'uet mi tsa' c'ʌñʌ mucoñibʌl cha'an ma' muc a wijñam, che'ob.

⁷Abraham tsi' c'uchchoco i bʌ ti' tojlel i yumob jini lum, jiñobʌch i yalobilob Het.

⁸Abraham tsi' pejcayob: Mi woli la' ña'tan ti la' pusic'al uts'at mic muc quijñam, yom mi la' jac'beñon. Yom mi la' c'ajtiben Efrón (i yalobil Zohar)

⁹cha'an mi' yʌq'ueñon jini ch'en am bʌ ti Macpela, ya' ba' jaxʌl i jamil. Mic toje' ti ts'ʌcʌl ti la' tojlel cha'an mi cochel ti' yum jini mucoñibʌl, che'en Abraham.

¹⁰Ya'ix buchul Efrón ti' tojlel i yalobilob Het. Efrón jini heteo tsi' jac'ʌ Abraham ti' tojlel i pi'ʌlob yic'ot pejtel jini woli bʌ i yochelob ti' ti' i tejclum Het. Tsi' yʌlʌ:

¹¹C yum, ubiñon. Jini jamil a cha'añʌch. Mi cʌq'ueñet jini jamil yic'ot jini ch'en am bʌ ti yojlil. Ti' tojlel jini winicob x'ixicob c pi'ʌlob mi cʌq'ueñet cha'an ma' muc jini chʌmen bʌ a cha'an, che'en.

¹²Abraham tsi' c'uchchoco i bʌ ti' tojlel jini ya' bʌ chumulob.

¹³Tsi' pejca Efrón ya' ti' tojlel pejtel winicob x'ixicob. Abraham tsi' yʌlʌ: Mi a wom, poj ubiñon. Woli cʌq'ueñet i tojol jini jamil. Ch'ʌmʌ tij c'ʌb. Mi caj c muc quijñam ya'i, che'en.

¹⁴Efrón tsi' sube Abraham: C yum, ubiñon. ¿Chuqui i ye'tel c cha'an jumpejt lum anquese uxp'ejl mil peso i tojol? Mucu jini ch'ujlelʌl a cha'an, che'en.

¹⁶Abraham tsi' jac'be Efrón. Tsi' p'isbe Efrón jini plata ti p'isonib. Ts'ʌcʌl tsi' yʌq'ue i tojol che' bajche' tsi' yʌlʌ Efrón ti' tojlel winicob x'ixicob ti Het, uxp'ejl mil peso.

¹⁷Jini jamil i cha'an Efrón, ya' ti Macpela ti' tojel Mamre, tsa' chombenti Abraham yic'ot jini ch'en yic'ot te'el am bʌ ti jamil ti' petol. Tsi' mʌñʌ Abraham ti' tojlel heteojob, ti' tojlel pejtelel mu' bʌ i yochelob ti tejclum. Che'i tsa' ochi Abraham ti' yum jini lum.

¹⁹Che' jini Abraham tsi' mucu Sara i yijñam ya'i. Tsa' cʌle ti' wenta Abraham jini jamil yic'ot ch'en am bʌ ti' yojlil jini jamil tsa' bʌ i chombeyob jini heteojob. I cha'añʌch Abraham cha'an mujquibʌl.