Read Chol Genesis 24 Bible Online

Genesis 24 - Chol bible

Genesis 24

¹Ñoxix Abraham. Cabʌl i jabilel. Lac Yum tsi' yʌq'ue i yutslel i t'an ti pejtelel chuqui tac tsi' mele.

²An i winic Abraham, jiñʌch ascuñʌl bʌ ti' yotot. Tsa' aq'uenti ti' wenta pejtelel i chubʌ'an Abraham. Abraham tsi' sube ili winic: Mux caj a wersa ac' a t'an ti' c'aba' lac Yum, i Diosʌch Panchan yic'ot Pañimil, cha'an ma'anic mi caj a yajcʌben i yijñam calobil ti' tojlel xch'oc bʌ i yalobilob cananeojob wʌ' ba' chumulon.

⁴Mux caj a majlel tic lumal ba'an c pi'ʌlob. Ya' yom ma' sajcʌben i yijñam calobil Isaac, che'en Abraham.

⁵Jini winic tsi' sube: Tic'ʌl mi mach yomic i tsajcañon tilel jini xch'oc wʌ' ti a lumal. ¿Yom ba mic cha' pʌy majlel a walobil ti jini lum ya' ba' ch'oyolet? che'en.

⁶Abraham tsi' sube jini winic: Mach yomic. Q'uele a bʌ ame a cha' pʌy majlel calobil ya'i.

⁷Lac Yum, jini Dios am bʌ ti panchan, tsa' bʌ i pʌyʌyon loq'uel ti' yotot c tat ya' tic lumal ba' tsa quila pañimil, jiñʌch tsa' bʌ i pejcayon, tsa' bʌ i yʌq'ueyon i t'an. Tsi' yʌlʌ: “Mi caj cʌq'uen a p'olbal ili lum”. Che' tsi' yʌlʌ Dios, che'en Abraham. Dios mi caj i choc majlel i yángel ti a tojel. Che' jini mux caj a c'ajtiben i yijñam calobil ya'i.

⁸Mi mach yomic i tsajcañet tilel jini xch'oc, mach a wentajix mi ma'anic mi' ts'ʌctiyel a t'an tsa' bʌ a wersa ac'ʌ, pero mach a pʌy majlel calobil ya'i, che'en Abraham.

⁹Jini winic tsi' wersa ac'ʌ i t'an che' bajche' tsa' subenti.

¹⁰Jini winic tsi' pʌyʌ loq'uel lujuncojt camello* i cha'an i yum. Tsi' ch'ʌmbe majlel chuqui tac tsi' choco majlel i yum cha'an i majtan i pi'ʌlob. Tsa' majli ti Mesopotamia ti jump'ejl tejclum ba' chumul Nacor.

¹¹Tsi' yʌc'ʌ ti pʌctʌl i camello ti' ti' jini tejclum ya' ba'an jump'ejl pozo am bʌ i yʌbʌnlel. Och'ajelix q'uin. I yorajlelix che' mi' tilelob ti luch ja' x'ixicob.

¹²Tsi' yʌlʌ: C Yum, i Dioset c yum Abraham, coltañon ti que'tel ti ili q'uin. Pʌsben c yum Abraham i yutslel a pusic'al.

¹³Awilan, wa'alon ti' t'ejl ts'ajquibil bʌ ja'. Talob ti luch ja' xch'ocob chumulo' bʌ ti tejclum.

¹⁴La' ujtic che' bajche' jini: Che' mic suben juntiquil xch'oc: “Awocolic ju'san a wuc'um cha'an ma' wʌq'ueñon c jap ja'”, mi tsi' yʌlʌ: “Japʌ, la' cʌq'uen i jap a camello ja'el”, mi che'en, mux c ña'tan jiñʌch jini xch'oc tsa' bʌ a yajcʌbe a winic Isaac. Che' jini mux c ña'tan tsa'ix a pʌsbe c yum i yutslel a pusic'al. Che'ʌch tsi' pejca Dios ti oración.

¹⁵Che' maxto anic tsa' ujti ti oración, tsa' tili Rebeca, q'uechel i cha'an uc'um ti' quejlab. Wen i t'ojol jax, xch'oc to. Tsa' jubi tilel ba'an ts'ajquibil bʌ ja'. Tsi' but'u i yuc'um. Rebeca i yalobilʌch Betuel, i yalobil bʌ Nacor yic'ot Milca. Nacor i yijts'iñʌch Abraham.

¹⁶

¹⁷Jini winic tsa' majli ti ajñel cha'an mi' taje'. Tsi' yʌlʌ: Awocolic, aq'ueñon ts'ita' ja' am bʌ ti a wuc'um cha'an mic jap, che'en.

¹⁸Jini xch'oc tsi' yʌlʌ: Japʌ, c yum. Ti ora tsi' ju'sa uc'um ti' c'ʌb. Tsi' yʌq'ue i jap.

¹⁹Che' bʌ tsa' ujti i yʌq'uen i jap, jini xch'oc tsi' yʌlʌ: Mi caj c luchben ja' a camello ja'el c'ʌlʌl mi' yujtel i jap, che'en.

²⁰Ti ora tsi' jebe jini ja' ti japo'ja'. Ajñel tsa' majli i cha' luch ja' ti pozo. Tsi' luchbe ja' pejtel i camello.

²¹Jini winic tsi' wen q'uele jini xch'oc. Ma'anic chuqui tsi' yʌlʌ, come maxto ña'tʌbilic i cha'an mi woli' coltan Dios ti' ye'tel.

²²Che' bʌ tsa' ujti i jap ja' jini camello tac, jini winic tsi' yʌq'ue i yuya' melbil ti oro am bʌ i yalel ti yojlil siclo yic'ot cha'xojt xotc'ʌbʌl melbil ti oro am bʌ i yalel ti lujump'ejl siclo.

²³Jini winic tsi' yʌlʌ: ¿Majqui a tat? Awocolic, subeñon. ¿Jochol ba i yotot a tat cha'an mic jijlel lojon? che'en.

²⁴Jini xch'oc tsi' sube: Joñon i yalobilon Betuel, i yalobil Nacor. Tsi' yʌc'ʌyon ti pañimil Milca i yijñam, che'en.

²⁵Jini xch'oc tsi' sube ja'el: Añʌch c cha'an lojon jam yic'ot i buc'bal camello yic'ot la' wajñib ba' mi la' jijlel, che'en.

²⁶Jini winic tsi' ju'sa i jol. Tsi' ch'ujutesa lac Yum.

²⁷Tsi' yʌlʌ: La' sujbic i wenlel lac Yum, i Dios c yum Abraham. Ma'anic mi' cʌy i pʌsben c yum Abraham i yutslel yic'ot i sujmlel i t'an. Che' añon ti' bijlel lac Yum tsi' pʌsbeyon tilel c bijlel c'ʌlʌl tsi' pʌyʌyon julel ti' yotot i pi'ʌlob c yum, che'en.

²⁸Ti ajñel tsa' majli jini xch'oc i sub chuqui tsa' ujti. Tsi' laj subeyob jini año bʌ ti' yotot i ña'.

²⁹An i yʌscun Rebeca, i c'aba' Labán. Che' bʌ tsi' q'uele jini uya'ʌl yic'ot xotol tac bʌ am bʌ ti' c'ʌb i yijts'in, che' bʌ tsi' yubi chuqui tsi' yʌlʌ jini winic, ti ajñel tsa' majli Labán ti pozo cha'an mi' taj tilel jini winic. Ya' wa'al tsi' taja yic'ot i camello ti' t'ejl pozo.

³⁰

³¹Labán tsi' sube: Ochen, c'uxbibilet bʌ i cha'an lac Yum. ¿Chucoch wa'alet ti jumpat? Tsac chajpʌbeyet a wotot yic'ot i yajñib camello tac, che'en.

³²Jini winic tsa' c'oti ti otot. Tsi' lojbe i monturajlel jini camello tac. Labán tsi' yʌq'ue camello tiquin bʌ jam yic'ot i buc'bal. Tsi' yʌq'ue ja' jini winic yic'ot i pi'ʌlob cha'an mi' pocob i yoc.

³³Tsa' aq'uenti i bʌl i nʌc', pero tsi' yʌlʌ: Ma'anic chuqui mi caj j c'ux jinto mic sub chuqui an tic pusic'al, che'en. Labán tsi' jac'ʌ: Alʌ, che'en.

³⁴Tsi' yʌlʌ: Joñon i winicon Abraham.

³⁵Lac Yum tsi' wen aq'ue Abraham i yutslel i t'an. Cabʌlix i ñuclel. Lac Yum tsi' yʌq'ue cabʌl tiñʌme', yic'ot wacax, yic'ot plata, yic'ot oro, yic'ot x'e'telob, yic'ot criadajob, yic'ot camello, yic'ot burro.

³⁶Sara i yijñam c yum tsi' yʌq'ue c yum ch'iton bʌ i yalobil che' ñejep'ix. Abraham tsi' yʌq'ue i yalobil pejtelel i chubʌ'an.

³⁷Jini c yum tsi' subeyon cha'an mic wersa aq'uen c t'an. Tsi' yʌlʌ: “Mach yomic ma' sʌclʌben i yijñam calobil ba'an cananeojob wʌ' ba' chumulon.

³⁸Mux caj a majlel ti' yotot c tat ti' tojlel c pi'ʌlob cha'an ma' sʌclʌben i yijñam calobil”, che'en.

³⁹Tsac sube c yum: “Tic'ʌl mi mach yomic i tsajcañon tilel jini x'ixic”, cho'on tsac sube.

⁴⁰C yum tsi' subeyon: “Jini lac Yum woli bʌ i cʌntañon majlel mi caj i choc tilel i yángel i pi'leñet majlel cha'an mi' coltañet. Mi caj a sʌclʌben i yijñam calobil ti' tojlel c pi'ʌlob ti' yotot c tat.

⁴¹Che' c'otemetix ya' ba'an c pi'ʌlob mi mach yomobic i sijin jini xch'oc, che' jini mach chucbiletix tic mandar”. Che' tsi' yʌlʌ c yum Abraham.

⁴²Sajmʌl tsa' c'otiyon ba'an ts'ajquibil bʌ ja'. Tsac pejca Dios: “C Yum, i Dioset c yum Abraham”, cho'on, “mi wola' coltañon ti que'tel,

⁴³la' ujtic bajche' wolic subeñet. La' tilic xch'oc ti luch ja' che' wa'alon ti' t'ejl pozo cha'an mic suben: Awolic, aq'ueñon ts'ita' ja' ti a wuc'um cha'an mic jap.

⁴⁴Mi tsi' subeyon: Japʌ. Mi caj c luchben ja' a camello tac ja'el, mi che'en, muq'uix c ña'tan tsa'ix a yajca jini xch'oc cha'an i yalobil c yum”, cho'on tsac pejca Dios.

⁴⁵Che' bʌ maxto anic tsa' ujti c suben Dios jini am bʌ tic pusic'al, tsa' tili Rebeca, q'uechel bʌ i yuc'um ti' quejlab. Tsa' jubi tilel ti pozo. Tsi' luchu ja'. Tsac sube: “Awocolic aq'ueñon c jap”, cho'on.

⁴⁶Ti ora tsi' ju'sa i yuc'um. Tsi' yʌlʌ: “Japʌ, mi cajel cʌq'uen i jap a camello tac ja'el”, che'en. Tsac japʌ. Tsi' yʌq'ue i jap jini camello ja'el.

⁴⁷Tsaj c'ajtibe jini xch'oc: “¿Majqui a tat?” cho'on. Tsi' yʌlʌ: “I yalobilon Betuel, winic bʌ i yalobil Nacor. Tsi' yʌc'ʌyon ti pañimil Milca i yijñam”, che'en. Tsa cʌq'ue uya'ʌl cha'an mi' lʌp yic'ot xotol tac bʌ cha'an i c'ʌb.

⁴⁸Tsac yu'u c jol. Tsac ch'ujutesa lac Yum. Tsac sube i ñuclel lac Yum come jiñʌch i Dios c yum Abraham. Toj tsi' pʌyʌyon tilel ti bij c'ʌlʌl tsa' juliyon ti' yotot i yijts'in c yum. Wʌle com c pʌy majlel a walobil cha'an mi' yochel ti' yijñam i yalobil c yum.

⁴⁹Subeñon mi muc'ʌch a jac'ben c yum ti uts'at ti isujm. Mi mach a womic a jac', subeñon cha'an mic ña'tan bajche' yom mic mel, che'en i winic Abraham.

⁵⁰Labán yic'ot Betuel tsi' jac'ʌyob: Añʌch ti' wenta lac Yum jini woli bʌ a c'ajtin. Mach mejlic c subeñet lojon mi uts'at o mi mach uts'atic.

⁵¹Awilan, wʌ'ʌch an Rebeca ti a tojel. Pʌyʌ majlel a wic'ot. Che' ma' majlel, la' ochic ti' yijñam i yalobil a yum che' bajche' tsi yʌlʌ lac Yum, che'ob.

⁵²Che' bʌ tsi' yubi jini t'an, i winic Abraham tsi' c'uchchoco i bʌ ti' tojlel lac Yum.

⁵³Tsi' loc'sa ch'ʌjlib tac melbil bʌ ti plata yic'ot ch'ʌjlib melbil bʌ ti oro yic'ot pisil. Tsi' yʌq'ue Rebeca. Tsi' yʌq'ue i majtan i ña' Rebeca yic'ot i yʌscun, letsem tac bʌ i tojol.

⁵⁴Tsi' cha'leyob we'el uch'el jini winic yic'ot winic bʌ i pi'ʌlob. Ya' tsi' ñusayob ac'ʌlel. Tsa' cajiyob ti ch'ojyel ti sʌc'ajel.

⁵⁵I yʌscun yic'ot i ña' jini xch'oc tsi' yʌlʌyob: La' poj cʌlec lujump'ejl q'uin quic'ot lojon. Ti wi'il mux i majlel, che'ob.

⁵⁶Jini winic tsi' subeyob: Mach a jaltesañon, come lac Yum tsi' coltayon cha'an ili que'tel woli bʌ c mel. La' majlicon cha'an mic cha' sujtel ba'an c yum, che'en.

⁵⁷Tsi' yʌlʌyob: La' lac pʌy tilel jini xch'oc cha'an mi laj c'ajtiben bajche' yom i pusic'al, che'ob.

⁵⁸Tsi' pʌyʌyob tilel Rebeca. Tsi' c'ajtibeyob: ¿Awom ba majlel yic'ot ili winic? che'ob. Tsi' yʌlʌ: Com cu majlel, che'en.

⁵⁹Tsi' chocoyob majlel Rebeca i yijts'in yic'ot jini x'ixic tsa' bʌ i meq'ue che' alʌl to yic'ot i winic Abraham yic'ot i winicob.

⁶⁰Tsi' yʌq'ueyob Rebeca i yutslel i t'an. Tsi' subeyob: La' ochiquet ti' ña' cabʌl winicob ti mil ti mil. La' yumʌnticob cha'an jini mu' bʌ i ts'a'leñob, che'ob.

⁶¹Tsa' tejchi majlel Rebeca yic'ot xch'oc bʌ i pi'ʌlob. C'ʌchʌlob ti camello tac tsi' tsajcayob majlel jini winic. Jini winic tsi' pʌyʌ majlel Rebeca.

⁶²Isaac tsa' majli ti pozo i c'aba' jini Cuxul Bʌ Mu' bʌ i Q'uelon. Tsa' sujti ti' yotot. Ya' chumul ti lum i c'aba' Neguev.

⁶³Tsa' majli Isaac ti jamil che' ochix q'uin cha'an mi' chʌn ña'tan Dios ti' pusic'al. Tsi' can q'uele pañimil. Tsi' q'uele ya'ix tilel camello tac.

⁶⁴Rebeca tsi' can q'uele pañimil. Che' bʌ tsi' q'uele Isaac, tsa' jubi ti camello.

⁶⁵Come Rebeca tsi' c'ajtibe jini winic: ¿Majqui jini winic woli bʌ i cha'len xʌmbal ti jamil cha'an mi' tajonla? che'en. Jini winic tsi' jac'ʌ: Jiñʌch c yum, che'en. Jini cha'an Rebeca tsi' ch'ʌmʌ i pislel cha'an mi' mos i wut.

⁶⁶Jini winic tsi' sube Isaac pejtelel chuqui tsi' mele.

⁶⁷Isaac tsi' pʌyʌ ochel Rebeca ti pisil bʌ i yotot Sara i ña' tsa'ix bʌ chʌmi. Isaac tsi' c'uxbi Rebeca. Tsa' cha' ñuq'uesʌnti i pusic'al Isaac cha'an anix i pi'ʌl.