Read Chol Genesis 29 Bible Online

Genesis 29 - Chol bible

Genesis 29

¹Jacob tsa' caji ti xʌmbal. Tsa' c'oti ti' lumal i ña' ti' tojel i pasibal q'uin.

²Tsi' can q'uele pañimil. Tsi' q'uele ya'an pozo ti jamil. Ya' pʌcʌlob uxmojt tiñʌme' ti' t'ejl pozo ba' mi' luchob ja' winicob cha'an mi' yʌq'ueñob i jap tiñʌme'. Wen ñuc jini xajlel am bʌ ti' ti' jini pozo.

³I tilelʌch mi' tempañob i tiñʌme' ya'i. Mi' bʌlc'uñob loq'uel jini xajlel ti' ti' pozo cha'an mi' yʌq'ueñob i jap ja' jini tiñʌme'. Che' mi' yujtel i jap, mi' cha' ac'ob jini xajlel ti' ti' pozo.

⁴Jacob tsi' c'ajtibeyob: ¿Baqui ch'oyoletla? che'en. Tsi' yʌlʌyob: Ch'oyolon lojon ti Harán, che'ob.

⁵Tsi' c'ajtibeyob: ¿La' cʌñʌ ba Labán, i yalobil Nacor? che'en. Tsi' yʌlʌyob: J cʌñʌ cu lojon, che'ob.

⁶Jacob tsi' c'ajtibeyob: ¿Bajche' yilal? ¿Uts'at ba an? che'en. Tsi' yʌlʌyob: Uts'at cu. Awilan, talix Raquel i yalobil yic'ot i tiñʌme', che'ob.

⁷Jacob tsi' yʌlʌ: Chan to q'uin. Maxto i yorajlelic mi la' tempan alʌc'ʌl. Aq'uenla i jap ja' tiñʌme'. Cucula. Aq'uenla i buc'bal, che'en.

⁸Tsi' yʌlʌyob: Mach mejlicon lojon jinto che' laj tempʌyemix tiñʌme' ti jujunmojt. Che' jini mic loc'san lojon jini xajlel ti' ti' pozo. Ti wi'il mi cʌq'uen lojon i jap ja' tiñʌme', che'ob.

⁹Che' bʌ woli to i pejcañob Jacob, tsa' c'oti Raquel yic'ot i yʌlac' i tat, come xcʌnta tiñʌme'.

¹⁰Jacob tsi' q'uele Raquel, i yalobil Labán i yichan yic'ot i yʌlac' Labán. Che' jini tsa' majli ti pozo. Tsi' loc'sa jini xajlel ti' ti' pozo. Tsi' yʌq'ue i jap ja' i yʌlac' Labán.

¹¹Jacob tsi' ts'ujts'u Raquel. C'am tsi' cha'le uq'uel.

¹²Jacob tsi' sube: I pi'ʌloñʌch a tat. I yalobilon Rebeca, che'en. Ti ajñel tsa' majli Raquel i suben i tat.

¹³Che' bʌ tsi' yubi Labán ya'an Jacob i yalobil i yijts'in, ti ajñel tsa' majli i taje'. Tsi' meq'ue. Tsi' ts'ujts'u. Tsi' pʌyʌ majlel ti' yotot. Jacob tsi' laj sube Labán chuqui tsa' ujti ti bij.

¹⁴Labán tsi' sube: Lac pi'ʌlʌch lac bʌ, che'en. Jacob tsa' jal'a jump'ejl uw ba'an Labán.

¹⁵Labán tsi' sube: Mach yomic ma' to'ol melbeñon que'tel cha'an c pi'ʌlet. Subeñon bajche' a wom mic tojet, che'en.

¹⁶An cha'tiquil xch'oc bʌ i yalobilob Labán. Jini chichʌl bʌ i c'aba' Lea. Jini ijts'iñʌl bʌ i c'aba' Raquel.

¹⁷Uts i wut Lea, pero i t'ojol jax Raquel.

¹⁸Jacob tsi' c'uxbi Raquel. Tsi' yʌlʌ: Mi caj c melbeñet a we'tel wucp'ejl jab cha'an mic pʌy Raquel jini ijts'iñʌl bʌ a walobil.

¹⁹Labán tsi' yʌlʌ: Uts'at, mi caj cʌq'ueñet Raquel. Lolom jach mi cʌq'uen yambʌ winic. Yom ma' cʌytʌl quic'ot, che'en.

²⁰Jacob tsi' cha'le e'tel wucp'ejl jab cha'an mi' pʌy Raquel. Lajalʌch tsi' yubi jini wucp'ejl jab bajche' wucp'ejl q'uin, come cabʌl tsi' c'uxbi Raquel.

²¹Jacob tsi' sube Labán: Aq'ueñoñix quijñam. Tsa'ix ts'ʌctiyi wucp'ejl jab que'tel cha'an mic pʌy, che'en.

²²Labán tsi' pʌyʌ tilel pejtel winicob ya' bʌ chumulob. Tsa' caji i mel q'uin.

²³Ti ac'ʌlel Labán tsi' pʌyʌ majlel Lea ba'an Jacob. Jacob tsa' ajñi yic'ot.

²⁴Labán tsi' yʌq'ue i criada i c'aba' Zilpa cha'an mi' melben i ye'tel Lea.

²⁵Ti sʌc'ajel Jacob tsi' q'uele jiñʌch Lea tsa' bʌ i pʌyʌ. Jacob tsi' sube Labán: ¿Chuqui tsa' melbeyon? Wucp'ejl jab tsac melbeyet a we'tel cha'an mic pʌy Raquel. ¿Chucoch tsa' lotiyon? che'en.

²⁶Labán tsi' yʌlʌ: Mach che'ic mic mel lojon ilayi. Ma'anic mic ñaxan sijin lojon jini ijts'iñʌl bʌ. Ñaxan mic sijin lojon jini chichʌl bʌ.

²⁷Ts'ʌctesan jump'ejl semana yic'ot a wijñam. Che' jini mi caj cʌq'ueñet i yijts'in cha'an a we'tel mu' bʌ caj a melbeñon yambʌ wucp'ejl jab che'en.

²⁸Che'ʌch tsi' cha'le Jacob. Tsa' ajni jump'ejl semana yic'ot Lea. Che' jini Labán tsi' yʌq'ue Raquel cha'an mi' pʌy ti' yijñam.

²⁹Labán tsi' yʌq'ue Raquel i criada i c'aba' Bilha cha'an mi' melben i ye'tel Raquel.

³⁰Jacob tsa' ajni yic'ot Raquel ja'el. Ñumen tsi' c'uxbi Raquel bajche' Lea. Tsi' cha'libe i ye'tel Labán yambʌ wucp'ejl jab.

³¹Lac Yum tsi' q'uele mach c'uxbibilic Lea. Tsi' yʌq'ue i cʌntan alʌl. Ma'anic i yalobil Raquel.

³²Lea tsa' caji' cʌntan i yalobil. Tsi' yila pañimil ch'iton bʌ i yalobil. Tsi' yotsʌbe i c'aba' Rubén, “Dios tsi' q'uele c wocol”, come tsi' yʌlʌ: Lac Yum tsi' q'uele ts'a'lebilon. Wʌle c ñoxi'al mi caj i c'uxbiñon, che'en.

³³Tsi' cha' cʌnta i yalobil. Tsi' yila pañimil ch'iton bʌ i yalobil. Tsi' yʌlʌ: Come lac Yum tsi' q'uele mach c'uxbibilonic. Jini cha'an tsi' yʌq'ueyon yambʌ calobil, che'en. Tsi' yotsʌbe i c'aba Simeón, “Dios tsi' yubi”.

³⁴Tsi' cha' cʌnta i yalobil. Tsi' yʌlʌ: Wʌle c ñoxi'al mi caj i yajñel quic'ot, come tsa'ix cʌq'ue uxtiquil ch'iton bʌ i yalobilob, che'en. Jini cha'an tsa' otsʌbenti i c'aba' Leví, “Mi' c'uxbin”.

³⁵Tsi' cha' cʌnta i yalobil. Tsi' yʌlʌ: Mux caj c ch'ujutesan lac Yum, che'en. Jini cha'an tsi' yotsʌbe i c'aba' Judá.