Read Chol Genesis 31 Bible Online

Genesis 31 - Chol bible

Genesis 31

¹Jacob tsi' yubibeyob i t'an ch'iton bʌ i yalobilob Labán. Tsi' yʌlʌyob: Jini Jacob tsa'ix i chilbe pejtel i yʌlac' lac tat. Cha'an ti' caj i chubʌ'an lac tat tsa'ix i taja pejtel i ñuclel, che'ob.

²Jacob tsi' q'uele Labán. Awilan, mach chʌn utsix i wut che' bajche' ti ñaxan.

³Lac Yum tsi' sube Jacob: Sujten ti' lumal a tat ba'an a pi'ʌlob. Mi caj c pi'leñet majlel, che'en.

⁴Jacob tsi' choco majlel t'an ti' yotot. Tsi' pʌyʌ tilel Raquel yic'ot Lea ya' ti jamil ba'an tiñʌme'.

⁵Jacob tsi' subeyob: Cujil ma'anix mi' chʌn q'uelon ti uts'at la' tat che' bajche' ti ñaxan. Pero i Dios c tat woli' coltañon. Anto quic'ot.

⁶La' wujil tsac melbe i ye'tel la' tat ti pejtelel c pusic'al.

⁷La' tat tsi' lotiyon. Lujunyajl tsi' q'uextʌbeyon i tojol que'tel. Machic tsi' tiq'ui Dios tsi' yʌc'ʌyon ti wocol.

⁸Tsi' yʌlʌ: “Jini pinto tac bʌ jiñʌch i tojol a we'tel”, che'en. Che' jini tsa' tojp'i pinto tac bʌ i yal pejtelel i tiñʌme'. Ti wi'il tsi' yʌlʌ: “Jini barsintic tac bʌ jiñʌch i tojol a we'tel”, che'en. Che' jini tsa' tojp'i sʌpʌl tac bʌ i yal ti pejtelel i tiñʌme'.

⁹Che' jini Dios tsi' chilbe i tiñʌme' la' tat. Tsi' yʌq'ueyon.

¹⁰Che' bʌ tsi chucuyob i bʌ jini tiñʌme', tsaj can q'uele pañimil tic ñajal. Awilan, japal yic'ot pintotic yic'ot barsintic bʌ tat chivo woli' chucob i bʌ.

¹¹I yángel Dios tsi' subeyon tic ñajal: “Jacob”, che'en. Tsa cʌlʌ: “Wʌ' añon”, cho'on.

¹²Tsi' yʌlʌ: “Can q'uele pañimil. Q'uele barsintic yic'ot pintotic yic'ot motol pejtel jini tat chivo mu' bʌ i chuc i ña'al bʌ chivo, come tsa'ix j q'uele pejtel tsa' bʌ i melbeyet Labán.

¹³Dioson. Tsa' cʌñʌyon ya' ti Betel ba' tsa' mulu jini wa'al bʌ xajlel ya' ba' tsac pʌsbeyet i yutslel c pusic'al. Ya' tsa' wʌc'ʌ a t'an tic tojlel. Cʌyʌx jini lum. Sujten ti a lumal baqui tsa' wila pañimil”. Che'ʌch tsi' subeyon Dios, che'en Jacob.

¹⁴Raquel yic'ot Lea tsi' jac'ʌyob: ¿Anto ba c chubʌ'an lojon ti' yotot lac tat mu' bʌ caj i yʌq'ueñon lojon? Ma'anix.

¹⁵Lajal mi' q'uelonla bajche' jini ñajt bʌ ch'oyolob, come tsi' choñoyonla. Tsi' laj jisa lac chubʌ'an.

¹⁶Lac cha'añʌch come Dios tsi' chilbe cha'an mi' yʌq'ueñonla yic'ot la calobilob pejtel i chubʌ'an lac tat tsa' bʌ i yʌq'ueyonla Dios. Jini cha'an yomix ma' mel ti pejtelel che' bajche' tsi' subeyet Dios, che'ob.

¹⁷Jini cha'an Jacob tsa' caji' c'ʌchchocoñob i yalobilob yic'ot i yijñamob ti' pat camello.

¹⁸Tsi' choco majlel pejtel i wacax yic'ot pejtel i chubʌ'an tsa' bʌ i tempa ya' ti Padanaram. Tsa' caji ti majlel ba'an Isaac i tat, ya' ti' lumal Canaán.

¹⁹Labán tsa' majli i tsepben i tsutsel i tiñʌme'. Raquel tsi' xujch'ibe majlel jini dioste' tac i cha'an i tat.

²⁰Mucul jach tsa' majli Jacob. Ma'anic tsi' ña'ta Labán jini arameo, come ma'anic tsi' subu i bʌ Jacob che' bʌ tsa' puts'i majlel.

²¹Tsa' puts'i yic'ot pejtel i cha'año' bʌ. Tsa' caji ti majlel. Tsa' ñumi ti colem ja'. Tsa' majli ti' tojel wits i c'aba' Galaad.

²²Che' ti yuxp'ejlel q'uin tsa' caji yubin Labán puts'emix Jacob.

²³Tsi' pʌyʌ majlel i pi'ʌlob. Tsi' tsajca majlel Jacob wucp'ejl q'uin jinto tsi' taja ya' ti wits i c'aba' Galaad.

²⁴Dios tsi' sube Labán jini arameo che' woli ti ñajal ti ac'ʌlel: Chʌcʌ q'uele a bʌ cha'an ma'anic ma' pejcan Jacob ti tsʌts bʌ t'an, che'en.

²⁵Labán tsi' taja Jacob. Wa'chocobilix pisil bʌ i yotot ti wits. Labán yic'ot i pi'ʌlob tsi' wa'chocoyob pisil bʌ otot ja'el ti wits i c'aba' Galaad.

²⁶Labán tsi' sube Jacob: ¿Chucoch ma'anic tsa' subeyon che' bʌ tsa' loq'uiyet? ¿Chucoch tsa' puts'iyet yic'ot calobilob che' bajche' woli la' bʌc'ñan espada?

²⁷¿Chucoch mucul jach tsa' loq'uiyet che' mach ña'tʌbilic c cha'an? Tsa'ic c ña'ta tsac chocoyetla loq'uel ti' tijicñʌyel la' pusic'al, yic'ot c'ay, yic'ot tamborín, yic'ot arpa.

²⁸Ma'anic tsa' wʌq'ueyon c ts'ujts'un calobilob. Tonto tsa' mele.

²⁹An c p'ʌtʌlel cha'an mi cʌq'uet ti wocol, pero sajmʌl ti ac'ʌlʌl tsi' pejcayon i Dios a tat. Tsi' yʌlʌ: “Chʌcʌ q'uele a bʌ cha'an ma'anic ma' pejcan Jacob ti tsʌts bʌ t'an”. Che' tsi' yʌlʌ.

³⁰Cujil woliyet ti puts'el, come wersa a wom sujtel ti' yotot a tat. Wʌle subeñon, ¿chucoch tsa' xujch'ibeyon c dioste' tac? che'en Labán.

³¹Jacob tsi' sube Labán: Tsac puts'tayet come tsac bʌc'ñayet. Tsa cʌlʌ mux a wersa chilbeñon jini a wixic'alob.

³²Mi an majch tsi' ch'ʌmʌ a dioste' tac, la' chʌmic. Wʌ' ti' tojlel lac pi'ʌlob yom ma' q'uel mi an a chubʌ'an quic'ot lojon. Ch'ʌmʌ a cha'an bʌ, che'en. Ma'anic tsi' ña'ta Jacob mi tsi' xujch'i Raquel.

³³Labán tsa' ochi ti pisil bʌ otot tac i cha'an Jacob yic'ot i cha'an Lea. Tsa' ochi ja'el ti pisil bʌ i yotot jini cha'tiquil criadajob. Ma'anic chuqui tsi' taja. Tsa' loq'ui ti' yotot Lea, tsa' ochi ti' yotot Raquel.

³⁴Ch'ʌmbil i cha'an Raquel jini i dioste' tac. Tsi' yotsa ti' monturajlel camello. Tsi' buchta. Labán tsi' laj tsaji ñumel jini pisil bʌ otot. Ma'anic tsi' taja.

³⁵Raquel tsi' sube i tat: Mach yomic ma' mich'leñon, c yum, cha'an buchulon ti a tojlel. Mach mejlic c tejchel, come wolij q'uel j c'amʌjel che' bajche' i tilel x'ixicob, che'en. Labán tsi' sʌcla dioste' tac, pero ma'anic tsi' taja.

³⁶Jacob tsa' mich'a. Ti tsʌts bʌ t'an tsi' pejca Labán: ¿Chuqui tsac cha'le? ¿Chuqui c mul? che'en. ¿Chucoch tsa' tiliyet ti ajñel cha'an ma' tajon?

³⁷Come tsa' laj tsajibeyon pejtel c chubʌ'an. ¿Tsa' ba a taja a chubʌ'an loq'uem bʌ ti a wotot? Ac'ʌ ila tic tojel yic'ot ti' tojel a pi'ʌlob. La' i q'uelob majqui an i mul.

³⁸Junc'al jab añon a wic'ot. Jini i ña'al bʌ tiñʌme' yic'ot i ña'al bʌ chivo ma'anic tsi' ñusa i yal. Ma'anic tsaj c'uxu i tat tiñʌme'.

³⁹Ma'anic tsac pʌyʌ ba' añet jini lojwem tac bʌ tsa' bʌ i c'uxu bʌte'el. Joñon tsa cʌq'ueyet i q'uexol. Tsac wersa q'uextʌbeyet jini tsa' bʌ i chucu xujch' ti q'uiñil yic'ot ti ac'ʌlel.

⁴⁰Tsa' puliyon ti ticwal che' ti q'uiñil. Tsa cubi tsʌñal cha'an ña'al tsʌñal che' ti ac'ʌlel. Ma'anic tsa' mejliyon ti wʌyel.

⁴¹Junc'alix jab tsac cha'le e'tel ti a wotot. Tsac cha'lebeyet a we'tel chʌnlujump'ejl (14) jab cha'an quijñamob yic'ot wʌcp'ejl jab cha'an a wʌlac'. Lujunyajl tsa' yʌñʌ a t'an cha'an ma' chilbeñon i tojol que'tel.

⁴²Machic tsi' coltayon i Dios c tat, i Dios Abraham tsa' bʌ i bʌc'ña Isaac, p'ump'un tsa' loq'uiyon ti a wotot. Dios tsi' q'uele jini wocol tsa' bʌ cubi ti a tojlel yic'ot jini wocol e'tel tsa' bʌ c cha'le. Dios tsi' tiq'uiyet sajmʌl ti ac'ʌlel, che'en Jacob.

⁴³Labán tsi' sube: Jiñobʌch calobilob jini a wijñamob yic'ot i yalobilob. C cha'añʌch jini alʌc'ʌl yic'ot pejtel jini am bʌ a cha'an. Mach mejlic c tic'lan calobilob. Mach mejlic c tic'lan i yalobilob tsa' bʌ i yʌc'ʌyob ti pañimil.

⁴⁴La' lac tem lac t'an, jatet quic'ot. La' i melonla Dios mi tsa' lac ñusa jini t'an, che'en.

⁴⁵Jacob tsi' ch'ʌmʌ xajlel. Tsi' wa'choco cha'an mi' yʌc' ti ña'tʌntel chuqui tsa' ujti ti' tojlelob.

⁴⁶Jacob tsi' sube i pi'ʌlob: Tempanla xajlel, che'en. Tsi' much'quiyob xajlel. Tsi' c'uxuyob waj ti pam much'ul bʌ xajlel.

⁴⁷Tsi' yotsʌbeyob i c'aba' jini much'quibil bʌ xajlel Galaad cha'an mi' chʌn ña'tʌntel i t'an. Labán tsi' yʌlʌ: Xinlʌpʌlix ti lac tojlel ili much'ul bʌ xajlel i wenta testigo, che'en. Jini cha'an tsa' otsʌbenti i c'aba' Galaad ti' t'an Jacob.

⁴⁸

⁴⁹Tsi' yotsʌbe ja'el i c'aba' Mizpa am bʌ i sujmlel, “Ya' ba' mi laj q'uejlel”. Labán tsi' yʌlʌ: La' i q'uelonla Dios che' ñajtix añonla.

⁵⁰Mi mach wenic bajche' ma' melbeñob quixic'alob, mi tsa' pʌyʌ yaño' bʌ x'ixicob cha'an a wijñam che' cuxulob to calobilob, anquese ma'anic winic mu' bʌ i q'uelonla, woli' q'uelonla Dios, che'en.

⁵¹Labán tsi' cha' sube Jacob: Q'uele jini much'ul bʌ xajlel yic'ot jini wa'al bʌ xajlel tsa' bʌ c xin wa'choco ti lac tojlel.

⁵²Jiñʌch mojon jini much'quibil bʌ xajlel yic'ot jini wa'chocobil bʌ, i wenta testigo. Mach muq'uic c ñusan jini much'ul bʌ xajlel cha'an mic tic'lañet. Jatet ja'el mach muq'uic a ñusan jini much'ul bʌ xajlel cha'an ma' tic'lañon, come woli' q'uelonla Dios.

⁵³La' i melonla i Dios Abraham, i Dios c tat Nacor, i Dios lac ñojte'el, che'en Labán. Jacob tsi' wersa ac'ʌ i t'an ti' tojlel jini Dios tsa' bʌ i bʌc'ña i tat Isaac.

⁵⁴Jacob tsi' tsʌnsʌbe i majtan Dios ya' ti wits. Tsi' pʌyʌ i pi'ʌlob ti we'el. Tsi' c'uxuyob waj. Jump'ejl ac'ʌlel tsa' jaleyob ti wits.

⁵⁵Che' ti wen sʌc'ajel Labán tsa' ch'ojyi. Tsi' ts'ujts'u i buts yic'ot i yixic'alob. Tsi' yʌq'ueyob i yutslel i t'an. Tsa' majli. Tsa' sujti ti' lumal.