Read Chol Genesis 34 Bible Online

Genesis 34 - Chol bible

Genesis 34

¹Tsa' majli ti jula' Dina, jini xch'oc bʌ i yalobil Jacob tsa' bʌ i yʌq'ue Lea. Yom i jula'tan jini xch'ocob ya' bʌ chumulob.

²Jini Siquem i yalobil Hamor, jini heveo, i yum jini lum, tsi' q'uele jini xch'oc. Tsi' pʌyʌ, tsa' ajni yic'ot, tsi' yʌc'ʌ ti quisin.

³Tsi' ña'ta i pʌy Dina i yalobil Jacob come c'ux tsi' yubi. Ti uts bʌ t'an tsi' pejca.

⁴Siquem tsi' pejca Hamor i tat. Tsi' yʌlʌ: C'ajtibeñon ili xch'oc cha'an quijñam, che'en.

⁵Jacob tsi' yubi bajche' Siquem tsi' yʌc'ʌ ti quisin Dina i yalobil. Ya' to añob i yalobilob Jacob ti jamil yic'ot i yʌlac'. Ma'anic chuqui tsi' yʌlʌ Jacob jinto tsa' sujtiyob.

⁶Hamor, i tat Siquem, tsa' tili i pejcan Jacob.

⁷Che' bʌ tsi' yubiyob i yalobilob Jacob, tsa' sujtiyob tilel ti' yotot. Tsi' meleyob i pusic'al. Tsi' wen cha'leyob mich'ajel cha'an tsi' mele Hamor chuqui jisil ti' tojlel Israel che' bʌ tsa' ñole yic'ot xch'oc bʌ i yalobil Jacob. Mach che'ic yom melol.

⁸Hamor tsi' pejcayob: C'uxatax i pusic'al Siquem cha'an a walobil. Awocolic mij c'ajtibeñet sijinix jini xch'oc cha'an i yijñam.

⁹La' i cha'leñob ñujpuñel la calobilob. Sijibeñon lojon xch'oc bʌ la' walobilob. Pʌyʌla xch'oc bʌ calobil lojon cha'an la' wijñam.

¹⁰Che' jini mux la' chumtʌl quic'ot lojon, come jochol jini lum ti lac tojlel. Yom mi la' chumtʌl ilayi. Cha'lenla e'tel ilayi ti lum. Taja la' chubʌ'an ilayi, che'en.

¹¹Siquem tsi' sube i tat xch'oc yic'ot i yʌscuñob: Yom mi la' q'uelon ti uts'at. Mi caj cʌq'ueñetla chuqui tac jach mi la' c'ajtibeñon.

¹²Chuqui tac jach la' wom la' c'ajtin cha'an i tojol jini xch'oc yic'ot i majtan, mu'to cʌq'ueñetla che' bajche' c'amel mi la' c'ajtibeñon. Yom mi la' sijin jini xch'oc cha'an quijñam, che'en.

¹³I yalobilob Jacob tsi' lotiyob Siquem yic'ot Hamor, come Siquem tsa'ix i yʌc'ʌ ti quisin Dina i yijts'in.

¹⁴Tsi' subeyob: Mach mejlic c mel lojon iliyi. Mach mejlic c sijin lojon quijts'in lojon ba'an winic mach bʌ tsepbilic i pʌchʌlel, come mach uts'atic tic wut lojon.

¹⁵Cojach mic sijin lojon mi tsa' ajniyetla bajche' joñon lojon, mi tsa' tsepbenti i pʌchʌlel pejtelel winicob ti a lumal.

¹⁶Che' jini mi mejlel c sijin lojon jini xch'oc bʌ calobilob. Mi caj c pʌy lojon jini xch'oc bʌ la' walobilob ja'el. Mux caj c chumtʌl lojon la' wic'ot. Mux la cajñel ti junmojt.

¹⁷Mi ma'anic tsa' la jac'ʌ, mi ma'anic tsa' la' wʌc'ʌ ti tsepol la' pʌchʌlel, mic pʌy lojon majlel jini xch'oc. Mic majlel lojon, che'ob.

¹⁸Uts'at tsi' yubiyob ili t'an Hamor yic'ot Siquem, i yalobil Hamor.

¹⁹Jini ch'iton tsi' bʌc' mele iliyi, come tsi' mula i yalobil Jacob. Ñumen ñuc tsa' q'uejli jini ch'iton ti' yotot i tat bajche' i pi'ʌlob.

²⁰Hamor yic'ot Siquem i yalobil tsa' tiliyob ba'an i ti' tejclum. Tsi' subeyob jini winicob loq'uemo' bʌ ti tejclum:

²¹Uts'at woli' pejcañonla ili winicob. La' chumlecob ti ili lum. La' i cha'leñob choñoñel ilayi, come jasʌl jini lum cha'an mi lac tem ajñel. Yom mi lac pʌy xch'oc bʌ i yalobilob cha'an la quijñam. Yom mi lac sijibeñob jini xch'oc bʌ la calobilob.

²²Yom jach mi' tsejpel lac pʌchʌlel ti jujuntiquilonla che' bajche' tsepbilob i pʌchʌlel ajñel. Che' jini mux i jac'ob lac t'an jini winicob, mux i chumtʌlob la quic'ot. Junmojt jach mi lac tem ajñel la quic'otob.

²³¿Mach ba muq'uic i yochel i yʌlac' ba'an lac cha'an yic'ot i chubʌ'an yic'ot pejtel i yʌlac' yujil bʌ cuchijel? Cojach yom mi lac jac'ben i t'an. Che' jini mux i chumtʌlob la quic'ot, che'ob.

²⁴Pejtel año' bʌ i ye'tel tsi' jac'beyob i t'an Hamor yic'ot i t'an Siquem i yalobil. Tsa' tsepbenti i pʌchʌlel pejtel winicob yic'ot ch'itoñob.

²⁵Che' ti' yuxp'ejlel q'uin che' wen c'ux i pʌchʌlel ba' tsepilob, tsi' ch'ʌmʌyob espada cha'tiquil i yalobilob Jacob, Simeón yic'ot Leví, i yʌscuñob Dina. Tsa' ochiyob che' mach tsajibilic jini tejclum. Tsi' tsʌnsayob pejtel winicob yic'ot ch'itoñob.

²⁶Tsi' tsʌnsayob Hamor yic'ot Siquem i yalobil Hamor ti espada. Tsi' pʌyʌyob loq'uel Dina ti' yotot Siquem. Tsa' majliyob.

²⁷I yalobilob Jacob tsa' c'otiyob ba'an tsʌnsʌbilo' bʌ. Tsi' cha'leyob xujch' ti jini tejclum ba' tsa' ajq'ui ti quisin i yijts'in.

²⁸Tsi' pʌyʌyob majlel i tiñʌme' yic'ot i wacax yic'ot i burro yic'ot chuqui an ti tejclum yic'ot chuqui an ti jamil.

²⁹Tsi' ch'ʌmbeyob majlel pejtelel i chubʌ'an yic'ot pejtel i yalobilob yic'ot i yijñamob. Tsi' xujch'ibeyob pejtelel chuqui an ti' yotot tac.

³⁰Jacob tsi' sube Simeón yic'ot Leví: Cabʌlʌch c wocol cha'añetla. Tsa'ix la' wʌc'ʌyon ti ts'a'lentel ti' tojlel pejtel jini chumulo' bʌ ti ili lum, jini cananeojob yic'ot ferezeojob. Ma'anic jaytiquilonla. Wʌle mux caj i tempañob i bʌ tij contra cha'an mi' tsʌnsañonla. Mi caj i jats'onla. Che' jini mux caj lac jisʌntel, joñon quic'ot c pi'ʌlob, che'en.

³¹Tsi' yʌlʌyob: ¿Chucoch tsi' lon tic'la la quijts'in che' bajche' xmoja? che'ob.