Read Chol Genesis 35 Bible Online

Genesis 35 - Chol bible

Genesis 35

¹Dios tsi' sube Jacob: La'. Yom letsiquet majlel ya' ti Betel. Jalijen ya'i. Melben i pulʌntib i majtan Dios tsa' bʌ i pʌsʌ i bʌ ba' añet che' bʌ tsa' puts'iyet majlel ti' tojlel Esaú a wʌscun, che'en.

²Jacob tsi' sube jini año' bʌ ti' yotot yic'ot pejtelel año' bʌ ti' wenta: Chocoxla jini dioste' tac am bʌ la' cha'an. Sʌq'uesan la' bʌ. Q'uextan la' pislel.

³La' lac tech xʌmbal. La' letsiconla ti Betel. Ya'i mi caj c melben i pulʌntib i majtan Dios, jini Dios tsa' bʌ i jac'beyon ti jini q'uin che' bʌ tsa cubi wocol. Tsi' pi'leyon majlel ti bij ba' tsajñiyon, che'en.

⁴Tsi' yʌq'ueyob Jacob pejtelel i dioste' yic'ot i yuya' am bʌ ti' chiquin. Jacob tsi' mucu ti yebal c'olol lʌc'ʌl ti Siquem.

⁵Tsa' cajiyob ti xʌmbal majlel. Jini año' bʌ ti tejclum tac ya' ti' joytilel tsa' cajiyob ti bʌq'uen cha'an i Dios Jacob. Jini cha'an ma'anic tsi' yajñesayob i yalobilob Jacob.

⁶Che' jini tsa' c'oti Jacob yic'ot pejtel tsa' bʌ i pi'leyob tilel ti Luz, am bʌ ti' lumal Canaán, jiñʌch Betel.

⁷Tsi' melbe i pulʌntib i majtan Dios ya'i. Tsi' yotsʌbe i c'aba' jini lum Elbetel, “Dios tsa' bʌ i pʌsʌ i bʌ ya' ti Betel”, come ya'i tsi' pʌsʌ i bʌ Dios ti' tojlel Jacob che' bʌ woli ti puts'el loq'uel ti' tojlel i yʌscun.

⁸Tsa' chʌmi Débora, jini xmec' alʌl i cha'an Rebeca. Tsa' mujqui ti yebal c'olol ya' ti' yentʌlal Betel. Jini cha'an tsa' otsʌbenti i c'aba' jini c'olol, Jiñʌch i C'olol X'uq'uel.

⁹Dios tsi' cha' pʌsʌ i bʌ ti' tojlel Jacob che' sujtelix woli, che' bʌ tsa' loq'ui ti Padanaram. Tsi' yʌq'ue i yutslel i t'an.

¹⁰Dios tsi' sube: A c'aba' Jacob. Ma'anix mi caj a pejcʌntel ti Jacob. Mi caj a pejcʌntel ti Israel, che'en. Che'i tsi' yotsʌbe i c'aba' Israel.

¹¹Dios tsi' sube: Joñon Dioson Mach bʌ Anic i P'isol c P'ʌtʌlel. La' p'ojlic a walobilob, la' wen ñuc'aquet. Mi caj i tilel ti jatet junmojt winicob x'ixicob. Mi caj i p'ojlelob ti mojt ti mojt. Mi caj i tejchelob reyob tilemo' bʌ ti a p'olbal.

¹²Mi caj cʌq'ueñet jini lum tsa' bʌ cʌq'ue Abraham yic'ot Isaac. Mi caj cʌq'ueñob a p'olbal ja'el mu' bʌ caj i tilelob, che'en.

¹³Dios tsa' letsi majlel ti' tojlel Jacob ya' ba' tsi' pejca.

¹⁴Jacob tsi' wa'choco xajlel ya' ba' tsi' pejca Dios. I yejtalʌch cha'an mi' yʌc' ti chʌn ña'tʌntel chuqui tsa' ujti ya'i. Ya' ti pam wa'al bʌ xajlel tsi' mulbe lʌmʌl bʌ i majtan Dios. Tsi' mulbe i majtan ti aceite.

¹⁵Jacob tsi' yotsʌbe i c'aba' jini ajñibʌl Betel, ya' ba' tsi' pejca Dios.

¹⁶Tsa' loq'uiyob majlel ti Betel. Che' bʌ mach ñajtix an jini tejclum i c'aba' Efrata, Raquel tsa' caji ti bajq'uel. Tsi' yubi cabʌl wocol.

¹⁷Che' woli ti bajq'uel Raquel, i co' alʌl tsi' sube: Mach a cha'len bʌq'uen, come mux caj a wʌc' yambʌ ch'iton ti pañimil, che'en.

¹⁸Che' bʌ woli' loq'uel i ch'ujlel, come tsa' chʌmi Raquel, tsi' yotsʌbe i c'aba' alʌ ch'iton Benoni, “Calobil tsa' bʌ i yila pañimil che' ti' yorajlel c wocol”. I tat tsi' yotsʌbe i c'aba' Benjamín, “Calobil mu' bʌ i yʌq'ueñonla lac wenlel”.

¹⁹Tsa' chʌmi Raquel. Tsa' mujqui ya' ti' bijlel Efrata, ya' ti Belén.

²⁰Jacob tsi' wa'choco xajlel ya' ti mucoñibʌl. Ya'ʌch an jini wa'al bʌ xajlel ba' mucul Raquel c'ʌlʌ ti ili ora.

²¹Israel tsa' cha' caji ti xʌmbal. Tsi' wa'choco pisil bʌ i yotot ti junwejl Migdal Edar.

²²Che' ya' chumul Israel ti ili lum, Rubén tsa' ñole yic'ot Bilha, yambʌ i yijñam i tat. Israel tsi' yubi chuqui tsi' mele. An lajchʌntiquil ch'iton bʌ i yalobilob Jacob.

²³Jini ch'iton bʌ i yalobilob Lea jiñobʌch Rubén jini ascuñʌl bʌ, Simeón, Leví, Judá, Isacar, Zabulón.

²⁴Jini ch'iton bʌ i yalobilob Raquel jiñobʌch José yic'ot Benjamín.

²⁵Jini ch'iton bʌ i yalobilob Bilha, i criada Raquel, jiñobʌch Dan yic'ot Neftalí.

²⁶Jini ch'iton bʌ i yalobilob Zilpa, i criada Lea, jiñobʌch Gad yic'ot Aser. Jiñobʌch i yalobilob Jacob tsa' bʌ i yilayob pañimil ti Padanaram.

²⁷Jacob tsa' c'oti ba'an Isaac i tat ya' ti Mamre, ya' ti Arba, jiñʌch Hebrón, ya' ba' tsa' ajniyob Abraham yic'ot Isaac ti ñaxan.

²⁸Anix bolonc'al (180) i jabilel Isaac che' bʌ tsa' chʌmi. Tsi' mucuyob Esaú yic'ot Jacob, i yalobilob.