Read Chol Genesis 38 Bible Online

Genesis 38 - Chol bible

Genesis 38

¹Che' ti ili ora Judá tsa' loq'ui ti' tojlel i pi'ʌlob. Tsa' jubi majlel ba'an winic ch'oyol bʌ ti Adulam, i c'aba' Hira. Tsa' jijli ti' yotot.

²Ya' tsi' q'uele xch'oc, i yalobil jini cananeo, i c'aba' Súa. Tsi' pʌyʌ cha'an i yijñam. Tsa' ajni yic'ot.

³Tsi' yilayob pañimil uxtiquil i yalobilob, i c'aba'ob Er, yic'ot Onán, yic'ot Sela. I tat tsi' yotsʌbe i c'aba' jini ascuñʌl bʌ. I ña' tsi' yotsʌbeyob i c'aba' jini ijts'iñʌl bʌ. Ya' chumulob ti Quezib che' bʌ tsi' q'uele pañimil i xut.

⁶Judá tsi' c'ajtibe i yijñam Er. I c'aba' jini xch'oc jiñʌch Tamar.

⁷Jontol ti' tojlel lac Yum jini Er. Lac Yum tsi' tsʌnsa.

⁸Judá tsi' sube Onán: Cucu pʌyʌ i yijñam a wʌscun, come a wentajʌch. Techben i yalobil a wʌscun.

⁹Onán tsi' ña'ta i cha'añʌch i yʌscun mi tsa' tili i yalobil. Jini cha'an ti jujunyajl che' bʌ tsa' ajni yic'ot i mu' tsi' choco i p'ʌtʌlel i bʌc'tal ti lum ame i techben i yalobil i yʌscun.

¹⁰Tsi' q'uele lac Yum jontol chuqui tsi' cha'le. Lac Yum tsi' tsʌnsa ja'el.

¹¹Judá tsi' sube Tamar i yʌ'lib: Ajñen che' bajche' meba' ti' yotot a tat jinto che' ñuquix calobil Sela, che'en. Come tsi' yʌlʌ ti' pusic'al: Ame chʌmic ja'el che' bajche' i yʌscuñob, che'en. Jini cha'an tsa' majli Tamar ti chumtʌl ti' yotot i tat.

¹²Che' ñumeñix cabʌl jabil tsa' chʌmi i yijñam Judá, i yalobil bʌ Súa. Tsa' cha' ñuc'a i pusic'al Judá. Tsa' letsi majlel yic'ot Hira, i cʌñʌ bʌ, ch'oyol bʌ ti Adulam. Tsa' c'oti ti Timnat i q'uel che' woli' set'beñob i tsutsel jini tiñʌme'.

¹³Tsa' subenti Tamar: Awilan, tsa' majli a wʌ'lib ti Timnat i set'ben i tsutsel tiñʌme', che'en.

¹⁴Tsi' jocho loq'uel i pislel meba'. Tsi' moso i wut ti pisil. Tsi' bʌc'ʌ i bʌ ti pisil. Tsa' buchle ti' ti' Enaim ya' ti' bijlel Timnat. Come tsi' ña'ta ñuquix Sela pero mach pʌybilic cha'an i yijñam.

¹⁵Judá tsi' q'uele ili x'ixic. Tsi' lon ña'ta jiñʌch xmoja.

¹⁶Tsa' majli ya' ba'an ti' ti' bij. Tsi' yʌlʌ: Awilan, com c pi'leñet, che'en. Come ma'anic tsi' ña'ta mi jiñʌch i yʌ'lib. Jini x'ixic tsi' yʌlʌ: ¿Chuqui mi caj a wʌq'ueñon cha'an ma' pi'leñon? che'en.

¹⁷Judá tsi' yʌlʌ: Mu'to c chocbeñet tilel juncojt alʌ chivo anto bʌ yic'ot i ña'al, che'en. Jini x'ixic tsi' yʌlʌ: ¿Mu' ba caj a wʌq'ueñon prenda jinto ma' choc tilel? che'en.

¹⁸Judá tsi' yʌlʌ: ¿Chuqui ti prenda mi cʌq'ueñet? che'en. Jini x'ixic tsi' yʌlʌ: A sello yic'ot i chijil yic'ot jini barate' am bʌ ti a c'ʌb. Judá tsi' yʌq'ue tac jini x'ixic. Tsi' pi'le. Jini x'ixic tsa' caji' cʌntʌben i yalobil Judá.

¹⁹Tsa' ch'ojyi jini x'ixic. Tsa' majli. Tsi' loq'uesa jini pisil am bʌ ti' wut. Tsi' cha' xojo i pislel meba'.

²⁰Judá tsi' choco majlel jini alʌ chivo ti' c'ʌb i pi'ʌl jini ch'oyol bʌ ti Adulam cha'an mi' cha' ch'ʌm i prenda ti' c'ʌb x'ixic. Ma'anic tsi' taja.

²¹Tsi' c'ajtibe winicob ya' bʌ añob ba' tsa' ajni jini x'ixic. Tsi' yʌlʌ: ¿Baqui an jini xmoja buchul bʌ ti bij ya' ti Enaim? che'en. Tsi' yʌlʌyob: Ma'anic xmoja ilayi, che'ob.

²²Tsa' cha' majli ba'an Judá. Tsi' sube: Ma'anic tsac taja. Jini winicob ya' bʌ añob tsi' yʌlʌyob: Ma'anic xmoja ilayi, che'ob. Che' tsi' yʌlʌ jini ch'oyol bʌ ti Adulam.

²³Judá tsi' yʌlʌ: La' i ch'ʌm i tojol jini x'ixic, ame i yʌc'onla ti quisin. Awilan, tsac chocbe majlel ili alʌ chivo, pero ma'anic tsa' taja x'ixic, che'en.

²⁴Che' ñumeñix cha'p'ejl uxp'ejl uw tsa' subenti Judá: Tamar a wʌ'lib tsi' mele i bʌ bajche' xmoja. Awilan, cʌntʌbilix i yalobil cha'an tsi' mele bajche' xmoja. Che'ʌch tsa' subenti. Judá tsi' yʌlʌ: Pʌyʌ tilel jini x'ixic cha'an mi' pulel ti c'ajc, che'en.

²⁵Che' bʌ tsa' pʌjyi tilel jini x'ixic, tsi' choco majlel t'an ba'an i yʌ'lib. Tsi' yʌlʌ: Cha'an i yum jini sello, yic'ot jini chij tac, yic'ot jini barate', cʌntʌbil calobil, che'en. Tsi' yʌlʌ ja'el: Q'uele ti uts'at, ¿majqui i cha'an? che'en.

²⁶Judá tsi' cʌñʌ tac i chubʌ'an. Tsi' yʌlʌ: Tojʌch jini x'ixic. Mach tojonic, come ma'anic tsa cʌq'ue jini calobil Sela i pʌy Tamar, che'en. Ma'anic tsi' chʌn pi'le jini x'ixic.

²⁷Che' bʌ tsa' c'oti i yorajlel cha'an mi' yilan pañimil i yalobil, cʌntʌbil i cha'an cha'tiquil ch'iton, loj bʌ.

²⁸Che' woli ti bajq'uel tsa' juli ti pañimil junts'ijt i c'ʌb alʌl. Jini co' tsi' ch'ʌmʌ. Tsi' cʌchbe i c'ʌb ti chʌchʌc bʌ puy. Tsi' yʌlʌ: Ñaxan tsa' loq'ui iliyi, che'en.

²⁹Che' jini tsi' cha' tujc'a ochel i c'ʌb. Ñaxan tsi' yila pañimil i pi'ʌl. Jini co' tsi' yʌlʌ: ¿Bajche' tsa' choco loq'uel a bʌ? Jini cha'an tsa' otsʌbenti i c'aba' Fares.

³⁰Ti wi'il tsi' yila pañimil ch'iton bʌ i pi'ʌl am bʌ chʌchʌc bʌ chij ti' c'ʌb. Tsa' otsʌbenti i c'aba' Zara.