Read Chol Genesis 39 Bible Online

Genesis 39 - Chol bible

Genesis 39

¹Tsa' pʌjyi majlel José ti Egipto. Tsa' ochi ti' wenta juntiquil egipto i c'aba' Potifar, i capitán xcʌntayajob am bʌ i ye'tel cha'an Faraón. Potifar tsi' mʌñʌ José. Jini ismaelob tsa' bʌ i cʌchʌyob majlel tsi' chombeyob.

²An lac Yum yic'ot José. Uts'at tsa' majli i ye'tel José ya' ti' yotot i yum chumul bʌ ti Egipto.

³I yum José tsi' q'uele an lac Yum yic'ot. Lac Yum tsi' wen colta ti pejtelel chuqui tsi' mele.

⁴José tsi' tajbe i yutslel i pusic'al Potifar. Tsi' melbe i ye'tel. Potifar tsi' yʌq'ue i ye'tel ti xq'uel e'tel ti' yotot. Tsi' yotsa ti' wenta pejtel i chubʌ'an.

⁵Ti jini ora che' bʌ tsa' aq'uenti i ye'tel ti xq'uel e'tel cha'an pejtel i chubʌ'an, tsa' caji ti p'ojlel i chubʌ'an jini egipto ti' yotot yic'ot ti' lum. Lac Yum tsi' yʌc'ʌ ti p'ojlel cha'an xuc'ul José.

⁶Potifar tsi' yʌc'ʌ ti' wenta José pejtel i cha'an bʌ. Ma'anix tsi' chʌn ña'ta Potifar come an ti' wenta José, jini jach tsi' ña'ta i c'ux i bʌl i ñʌc'. José wen i t'ojol jax, wen ch'ejl.

⁷I yijñam i yum tsa' caji' mulan José. Tsi' sube: La' pi'leñon, che'en.

⁸José ma'anic tsi' jac'be. Tsi' sube i yijñam i yum: Awilan, mach yujilic c yum chuqui an quic'ot ti' yotot. Tsa'ix i yʌc'ʌ pejtelel i chubʌ'an tic wenta.

⁹Ma'anic yambʌ ñuc bʌ ti' wenta c yum. Ma'anic chuqui tsi' loto ti' bajñel p'ʌtʌlel, cojach jatet, come i yijñamet. ¿Bajche' mi mejlel c cha'len jini ñuc bʌ mulil? ¿Bajche' mi mejlel c cha'len mulil ti' contra Dios? che'en.

¹⁰Ti jujump'ejl q'uin tsi' pejca José cha'an mi' ñoltʌl yic'ot, pero ma'anic tsi' jac'ʌ i pʌyol cha'an mi' yajñel yic'ot.

¹¹Ti jump'ejl q'uin che' bʌ tsa' ochi José ti' yotot cha'an mi' mel i ye'tel ma'anic x'e'telob ya' ti yotot.

¹²Jini x'ixic tsi' wats tujc'a majlel i bujc José. Tsi' sube: La' ti wʌyel quic'ot. Pero José tsi' cʌyʌ i bujc ti' c'ʌb. Tsa' puts'i loq'uel.

¹³Ili x'ixic che' bʌ tsi' q'uele tsa'ix i cʌyʌ i bujc José ti' c'ʌb, che' puts'emix loq'uel José,

¹⁴tsi' pʌyʌ tilel x'e'telob ti yotot. Tsi' subeyob: Awilan, c ñoxi'al tsi' yotsa jini hebreo* ti lac tojlel cha'an mi' wajleñonla. Tsi' ñochtayon cha'an yom i pi'leñon. Tsac cha'le oñel ti c'am bʌ t'an.

¹⁵Che' bʌ tsi' yubi woliyon ti oñel tsi' cʌyʌ i bujc. Tsa' puts'i loq'uel ti cotot, che'en.

¹⁶Ili x'ixic tsi' lotbe i bujc José jinto tsa' c'oti i ñoxi'al ti' yotot.

¹⁷Ili x'ixic lajal tsi' sube: Jini hebreo tsa' bʌ a pʌyʌ tilel ti lac tojlel cha'an mi' melbeñet a we'tel tsa' yʌlʌ i pi'leñon cha'an mi' yʌc'on ti quisin.

¹⁸Pero che' bʌ tsac cha'le c'am bʌ t'an tsi' cʌyʌ i bujc. Tsa' puts'i, che'en.

¹⁹Che' bʌ tsi' yubibe i t'an i yijñam, tsa' wen mich'a i yum José.

²⁰Tsi' chucu José. Tsi' yotsa ti mʌjquibʌl ya' ba' mʌcʌlob jini ñup'ulo' bʌ i cha'an rey. Ya' tsa' ajni José ti mʌjquibʌl.

²¹Pero ya'an lac Yum yic'ot. Tsi' pʌsbe i yutslel i pusic'al. Tsi' yʌc'ʌ ti c'uxbintel i cha'an jini xcʌnta mʌjquibʌl.

²²Jini xcʌnta mʌjquibʌl tsi' yotsa ti' wenta José pejtelel xmʌjquelob año' bʌ ti mʌjquibʌl. Chuqui tac jach tsa' mejli ya'i i wentajʌch José.

²³Jini xcʌnta mʌjquibʌl ma'anix tsi' chʌn q'uele chuqui tac an ti' wenta José. Uts'at tsi' mele come ya'an lac Yum yic'ot. Tsi' yʌc'ʌ ti loq'uel ti uts'at pejtel chuqui tsi' mele José.