Read Chol Genesis 4 Bible Online

Genesis 4 - Chol bible

Genesis 4

¹Adán tsi' pi'le Eva i yijñam. Tsa' caji i cʌntan i yalobil. Tsi' yʌc'ʌ Caín ti pañimil. Tsi' yʌlʌ: Lac Yum tsi' coltayon cha'an mi cʌc' winic ti pañimil, che'en.

²Ti wi'il tsi' yʌc'ʌ ti pañimil Abel i yijts'in Caín. Abel tsi' cʌnta tiñʌme'. Caín tsi' cha'le e'tel ti lum.

³Che' ñuquix Caín tsi' yʌq'ue i majtan lac Yum. Tsi' yajcʌbe wen tac bʌ i wut pʌc'ʌb.

⁴Abel tsi' yʌq'ue ñaxan bʌ i yal tiñʌme' tac. Tsi' tsʌnsʌbe i majtan Dios. Tsi' yajcʌbe wen c'oc' bʌ tiñʌme'. Lac Yum tsi' q'uele ti uts'at Abel yic'ot i majtan.

⁵Mach uts'atic tsi' q'uele Caín yic'ot i majtan. Tsa' wen mich'a Caín. Mich'icña jax i wut.

⁶Lac Yum tsi' sube Caín: ¿Chucoch mich'et? ¿Chucoch mich'icña a wut?

⁷Mi uts'at chuqui ma' mel uts'at mi caj a q'uejlel. Mi mach uts'atic chuqui ma' mel woli' chijtañet mulil. Wersa yom i tajet mulil pero yom mi' mʌjlel a cha'an. Che' tsi' yʌlʌ lac Yum.

⁸Caín tsi' pejca i yijts'in. Conla ti jamil, che'en. Che' ya' añob ti jamil Caín tsa' tejchi i contrajin i yijts'in. Tsi' tsʌnsa.

⁹Lac Yum tsi' pejca Caín: ¿Baqui an a wijts'in Abel? che'en. Caín tsi' yʌlʌ: Mach cujulic. ¿C wenta ba cha'an mij cʌntan quijts'in? che'en.

¹⁰Lac Yum tsi' yʌlʌ: ¿Chuqui tsa' cha'le? I ch'ich'el a wijts'in tsa' bʌ a tsʌnsa woli' c'ajtibeñon yubil cha'an mij q'uextʌbeñet a mul.

¹¹Jini cha'an wocol mi caj a taj i bʌl a ñʌc' ti pañimil. Jini lum tsi' cawa i yej yilal cha'an mi' japben i ch'ich'el a wijts'in tsa' bʌ a tsʌnsa.

¹²Che' ma' cajel ti e'tel ti jini lum, ma'anix chuqui mi caj a taj ti lum. Xputs'elet ti pejtelel ora. Stsuctsucniyelet ti pañimil, che'en lac Yum.

¹³Caín tsi' sube lac Yum: Mach cujchic c cha'an jini wocol.

¹⁴Awilan tsa' chocoyon loq'uel ti lum. Tsa'ix a cʌyʌyon. Xputs'elon ti pejtelel ora. Stsuctsucniyelon ti pañimil. Che' an majqui mi' tajon mi caj i tsʌnsañon, che'en Caín.

¹⁵Lac Yum tsi' sube: Mi an majqui mi' tsʌnsañet, wucyajl mi caj j q'uextʌben i mul, che'en. Lac Yum tsi' yʌq'ue Caín i señajlel ame tsʌnsʌntic.

¹⁶Caín tsa' loq'ui majlel ti' tojlel lac Yum. Tsa' chumle ti lum i c'aba' Nod am bʌ ti' tojel Edén ba' mi' pasel q'uin.

¹⁷Caín tsi' pi'le i yijñam. Tsi' cʌnta i yalobil. Tsi' yila pañimil Enoc. Caín tsi' mele jump'ejl tejclum. Tsi' yotsʌbe i c'aba' jini tejclum Enoc che' bajche' i c'aba' i yalobil.

¹⁸Enoc i tatʌch Irad. Irad i tatʌch Mehujael. Mehujael i tatʌch Metusael. Metusael i tatʌch Lamec.

¹⁹Lamec tsi' pʌyʌ cha'tiquil i yijñam. I c'aba' juntiquil Ada. I c'aba' yambʌ Zila.

²⁰Ada tsi' yʌc'ʌ ti pañimil Jabal, i tatʌch jini mu' bʌ i chumtʌlob ti pisil bʌ otot, jini mu' bʌ i cʌntañob alʌc'ʌl.

²¹Jubal i yijts'iñʌch Jabal. Jubal i tatʌch pejtelel mu' bʌ i nijcañob arpa yic'ot flauta.

²²Zila tsi' yʌc'ʌ ti pañimil Tubal Caín tsa' bʌ i mele e'tijibʌl ti c'ʌnc'ʌn taq'uin yic'ot tsucul taq'uin. Naama i yijti'añʌch Tubal Caín.

²³Lamec tsi' sube i yijñamob: Ada yic'ot Zila, ubibeñonla ili c t'an. Lamecon. Jatetla quijñametla. Tsac tsʌnsa winic tsa' bʌ i jats'ʌyon. Mic tsʌnsan ch'iton bʌ winic mi tsi' jats'ʌyon. Tsa' subenti Caín wucyajl mi caj i q'uextʌbentel i mul majqui jach mi' tsʌnsan. Isujm lujunyajl i chʌnc'al yic'ot wucp'ejl mi caj i q'uextʌbentel i mul jini mu' bʌ i tsʌnsañon, che'en Lamec.

²⁵Adán tsi' cha' cʌñʌ Eva i yijñam. Tsa' cha' caji i cʌntan i yalobil. Tsi' yʌc'ʌ ti pañimil ch'iton bʌ i yalobil. Tsi' yotsʌbe i c'aba' Set. Tsi' yʌlʌ: Dios tsi' yʌq'ueyon yambʌ calobil cha'an i q'uexol Abel, che'en, come Caín tsi' tsʌnsa Abel.

²⁶Tsi' yila pañimil ja'el ch'iton bʌ i yalobil Set. Tsi' yotsʌbe i c'aba' Enós. Che' ti ili ora che' bʌ tsi' yila pañimil Enós, winicob tsa' caji i ch'ujutesañob i c'aba' lac Yum.