Read Chol Genesis 40 Bible Online

Genesis 40 - Chol bible

Genesis 40

¹Che' ñumeñix cha'p'ejl uxp'ejl jab, tsi' tajayob i mul cha'tiquil i winicob jini rey ti Egipto. Jiñobʌch xñusa waj yic'ot xmel caxlan waj año' bʌ i ye'tel ti' tojlel jini rey ti Egipto.

²Faraón tsi' mich'le jini cha'tiquil winicob, jini ñuc bʌ i yaj ñusa waj yic'ot jini ñuc bʌ i yaj mel caxlan waj.

³Tsi' yotsayob ti mʌjquibʌl ya' ti' yotot i capitán xcʌntayajob, ya' ti mʌjquibʌl ba' ñup'ul José.

⁴I capitán xcʌntayajob tsi' yotsayob ti' wenta José. José tsi' cʌntayob. Tsa' ajniyob ya' ti mʌjquibʌl.

⁵Jump'ejl ac'ʌlel jini ñup'ulo' bʌ ti mʌjquibʌl tsi' cha'leyob ñajal ti cha'ticlelob, jini xñusa waj yic'ot xmel caxlan waj i cha'añob jini rey ti Egipto. Mach lajalic i ñajal. Mach lajalic i sujmlel.

⁶José tsa' c'oti ya' ba' añob che' ti sʌc'ajel. Awilan, ch'ijiyemob.

⁷José tsi' c'ajtibeyob: ¿Chucoch ch'ijiyemetla? che'en.

⁸Tsi' jac'ʌyob: Tsac cha'le lojon ñajal. Ma'anic majqui mi mejlel i subeñon lojon i sujmlel, che'ob. José tsi' subeyob: Dios mi mejlel i pʌsbeñonla i sujmlel. Poj subeñon chuqui tsa' la' ñajle, che'en.

⁹Jini cha'an jini ñuc bʌ xñusa waj tsi' sube José chuqui tsi' ñajle. Tsi' yʌlʌ: Awilan, an ac' ti' tojel c wut.

¹⁰An uxp'ejl i xʌc' ac'. Che' bʌ tsa' caji ti loq'uel i buts, ora jach tsa' loq'ui i nich. Tsa' caji ti c'ʌñ'an i wut ts'usub.

¹¹I tsima Faraón an tij c'ʌb. Tsac ch'ʌmʌ ts'usub. Tsac yʌts'be ochel i ya'lel ti tsima. Tsa cʌc'ʌ jini tsima ti' c'ʌb Faraón.

¹²José tsi' sube: Jiñʌch i sujmlel: Jini uxp'ejl i xʌc' ac' jiñʌch uxp'ejl q'uin.

¹³Che' maxto ñumenic uxp'ejl q'uin, Faraón mi caj i pʌyet majlel. Mi caj i cha' wa'chocoñet ti a we'tel. Mi caj a wʌq'uen i jap Faraón che' bajche' ti wajali.

¹⁴Pero yom ma' chʌn ña'tañon che' uts'at añet. Yom ma' coltañon ti' yutslel a pusic'al. Tsictesañon ti' tojlel Faraón che' ya' añet ti' tojlel. Loc'sañon ti ili mʌjquibʌl.

¹⁵Come ti mucul jach tsa' pʌjyiyon loq'uel ti' lumal hebreojob. Ma'anic c mul che' bʌ tsi' yotsayoñob ti mʌjquibʌl, che'en.

¹⁶Jini ñuc bʌ xmel waj che' bʌ tsi' q'uele uts'at i sujmlel ñajal, tsi' sube José: Joñon ja'el tsac cha'le ñajal. An uxp'ejl chiquib tic jol but'ul ti caxlan waj.

¹⁷Ti chan bʌ chiquib an cabʌl caxlan waj ti chajp ti chajp cha'an mi cʌq'uen Faraón. Pero tsi' c'uxuyob te'lemut ya' ti chan bʌ chiquib am bʌ tic jol.

¹⁸José tsi' jac'ʌ: Jiñʌch i sujmlel: Jini uxp'ejl chiquib jiñʌch uxp'ejl q'uin.

¹⁹Che' maxto ñumenic uxp'ejl q'uin Faraón mi caj i tsep loq'uel a bic'. Mi caj i joc'chocoñet ti te'. Jini te'lemut mi caj i c'ux a bʌc'tal, che'en José.

²⁰Ti yuxp'ejlel q'uin Faraón tsi' mele q'uin ti' tojlel i winicob come i q'uiñilelʌch i jabilel. Tsi' pʌyʌ tilel jini ñuc bʌ i yaj ñusa waj yic'ot jini ñuc bʌ i yaj mel caxlan waj.

²¹Tsi' cha' wa'choco jini ñuc bʌ i yaj ñusa waj ti' ye'tel. Tsa' caji' cha' ac' jini tsima ti' c'ʌb Faraón.

²²Pero tsi' jich'choco jini xmel caxlan waj che' bajche' tsi' sube José. Jiñʌch i sujmlel i ñajal.

²³Pero jini ñuc bʌ i yaj ñusa waj ma'anic tsi' chʌn ña'ta José. Tsa' ñajʌyi ti' pusic'al.