Read Chol Genesis 43 Bible Online

Genesis 43 - Chol bible

Genesis 43

¹Wen cabʌl i wi'ñal winicob ti' lumal Canaán.

²Che' bʌ tsa'ix ujti i c'uxob jini trigo tsa' bʌ i ch'ʌmʌyob tilel ti Egipto, Jacob tsi' sube i yalobilob: Cha' cucula. Mʌñʌla tilel ts'i'ta' i bʌl lac ñʌc', che'en.

³Judá tsi' sube: Jini yumʌl tsi' wersa subeyon lojon: “Ma'anix mi caj la' q'uel c wut jinto mi la' pʌy tilel la' wijts'in”, che'en. Mi mux caj a choc majlel quijts'in quic'ot lojon, mux c cha' majlel lojon c mʌn tilel i bʌl lac ñʌc'. Pero mi mach a womic a choc majlel ma'anic mi caj c majlel lojon, che'en Judá.

⁶Israel tsi' yʌlʌ: ¿Chucoch tsa' lon sube jini winic an yambʌ a wijts'in cha'an ma' wʌc'on ti wocol? che'en.

⁷Tsi' jac'ʌyob: Jini winic tsi' wen c'ajtibeyon lojon jaytiquilon lojon quic'ot c pi'ʌlob lojon. Tsi' yʌlʌ: “¿Cuxul to ba a tat? ¿Am ba yambʌ a wijts'in?” che'en. Tsac jac'be lojon i t'an. ¿Tsa' ba mejli c wʌn ña'tan lojon mi mux i subeñon lojon: “Pʌyʌla tilel a wijts'in”? che'ob.

⁸Judá tsi' sube Israel: La' c pʌy majlel jini ch'iton quic'ot. Che' jini mic majlel lojon cha'an mi' lajmel lac wi'ñal, ame laj chʌmiconla quic'otet quic'ot calobil lojon.

⁹Mux c ch'ʌm tic wenta jini ch'iton. Mi caj c cha' pʌy tilel. Mi ma'anic mic cha' pʌy tilel, mi ma'anic mic cha' aq'ueñet, c mulʌch ti pejtelel ora. Mux c toj.

¹⁰Machic tsa' jal'ayon lojon, tsa' mejli c sujtel lojon cha'yajl, che'en Judá.

¹¹Israel tsi' subeyob: Mi che'ʌch yom, melela che' bajche' mic subeñetla. Ch'ʌmʌla majlel ti la' coxtal jini wen uts'at bʌ i wut lum. I majtañʌch jini winic. Ch'ʌmbenla ts'ita' bálsamo, yic'ot ts'ita' chab, yic'ot xojocña bʌ ts'ac, yic'ot i yetsel te', yic'ot mirra*, yic'ot c'uxbil bʌ i wut te' ti chajp ti chajp.

¹²Ñumen on yom mi la' ch'ʌm majlel jini taq'uin. Cha' ch'ʌmbenla majlel jini taq'uin tsa' bʌ i cha' otsa ti mal la' coxtal. Tic'ʌl ma'anic tsi' ña'ta chuqui tsi' cha'le.

¹³Pʌyʌla majlel la' wijts'in. Cha' cucula ba'an jini winic.

¹⁴Che' ya' añetla ti' tojlel jini winic, la' i p'untañetla Dios jini Mach bʌ Anic i P'isol i P'ʌtʌlel. La' i cha' colbeñet la' weran yic'ot Benjamín. Pero mi tsa' chʌmiyob calobilob, che' jini meba'onix cha'an calobilob, che'en.

¹⁵Jini winicob tsi' ch'ʌmbeyob majlel i majtan. Tsi' ch'ʌmʌyob ja'el cabʌl taq'uin. Tsi' pʌyʌyob majlel Benjamín. Tsi' techeyob xʌmbal. Tsa' jubiyob majlel ti Egipto. Ya' tsa' c'otiyob ti' tojlel José.

¹⁶Che' bʌ tsi' ña'ta José ya'an Benjamín yic'otob, tsi' sube jini xcʌñʌ otot: Pʌyʌ ochel jini winicob ti cotot. Tsʌnsan we'elʌl. Chajpan. Come jini winicob mi caj i cha'leñob we'el quic'ot che' ti xinq'uiñil.

¹⁷Jini winic tsi' mele che' bajche' tsi' yʌlʌ José. Tsi' pʌyʌyob majlel ti' yotot José.

¹⁸Tsi' cha'leyob bʌq'uen, come tsa' pʌjyiyob majlel ti' yotot José. Tsi' yʌlʌyob: Pʌybilonla cha'an jini taq'uin tsa' bʌ cha' otsʌbentiyonla ti laj coxtal. Yomix i contrajiñonla. Mux caj i chuconla yic'ot lac burro cha'an mi' pʌyonla majlel ti to'ol e'tel, che'ob.

¹⁹Tsi' tsajcayob majlel xcʌñʌ otot i cha'an José. Tsi' pejcayob ya' ti' ti' otot.

²⁰Tsi' yʌlʌyob: C yum, isujm i cha'yajlelix tsa' tiliyon lojon cha'an mic mʌn i bʌl lojon c ñʌc'.

²¹Che' ujtemix c mʌn lojon, che' majlemonix lojon ba' tsa' jijliyon lojon, tsac jiti lojon i ti' tac coxtal. Awilan, cha' ya'ix an c taq'uin lojon ti jujuntiquilon lojon ti' ti' j coxtal. Jini cha'an ts'ʌcʌl tsa'ix c cha' ch'ʌmʌ tilel.

²²Yambʌ taq'uin ja'el tsa'ix c ch'ʌmʌ lojon tilel cha'an mic mʌn i bʌl lojon c ñʌc'. Mach cujilic lojon majqui tsi' yotsa c taq'uin tij coxtal lojon, che'ob.

²³Jini winic tsi' yʌlʌ: La' ñʌch'lec la' pusic'al. Mach la' cha'len bʌq'uen. Jini la' Dios, i Dios la' tat tsi' yʌq'ueyetla taq'uin ti la' coxtal. Tsac ch'ʌmʌ la' taq'uin, che'en. Che' jini tsi' colo Simeón cha'an mi' tilel ba'añob.

²⁴Tsi' pʌyʌyob ochel ti' yotot José. Tsi' yʌq'ueyob ja'. Tsi' pocbeyob i yoc. Tsi' yʌq'ueyob tsepbil bʌ jam cha'an i burro tac.

²⁵I pi'ʌlob José tsi' chajpʌbeyob i majtan, come tal che' ti xinq'uiñil, come tsi' yubiyob pʌybilob tilel ti c'ux waj yic'ot.

²⁶Che' bʌ tsa' tili José ti' yotot, tsi' yʌq'ueyob i majtan tsa' bʌ i yotsayob ti' yotot. Tsi' pʌcchocoyob i bʌ ti lum ti' tojlel José.

²⁷José tsi' c'ajtibeyob bajche' yilalob. Tsi' yʌlʌ: Jini la' tat, jini ñoxix bʌ winic tsa' bʌ la' subeyon, ¿uts'at ba an? ¿Cuxul to ba? che'en.

²⁸Tsi' yʌlʌyob: Uts'at cu an. Cuxul to. A winicʌch, che'ob. Tsi' c'uchchocoyob i bʌ. Tsi' q'ueleyob ti ñuc José.

²⁹José tsi' ts'ita' letsa i wut. Tsi' q'uele Benjamín i yijts'in, lajal bʌ i ña' yic'ot. Tsi' yʌlʌ: ¿Jim ba cojix bʌ la' wijts'in, tsa' bʌ la' subeyon? che'en. Calobil, la' i yʌq'ueñet Dios i yutslel i pusic'al, che'en.

³⁰Ti ora tsa' loq'ui José, come tsi' wen c'uxbi i yijts'in. Tsi' sajca baqui tsa' mejli ti uq'uel ti' bajñelil. Tsa' ochi ti yambʌ i mal otot. Tsi' cha'le uq'uel ya'i.

³¹Tsi' poco i wut. Tsa' cha' tili. Tsi' tiq'ui i bʌ. Tsi' yʌlʌ: Ch'ʌmʌ tilel i bʌl lojon c ñʌc', che'en.

³²Tsi' yʌq'ueyob José i bʌl i ñʌc' ti' bajñelil. Parte tsi' yʌq'ueyob hebreojob ti' bajñelob. Parte tsi' yʌq'ueyob egiptojob tsa' bʌ i c'uxuyob waj yic'ot José, come tic'bilob mi' c'uxob waj egiptojob yic'ot hebreojob. Mach uts'atic ti' wut egiptojob.

³³Tsa' buchleyob i pi'ʌlob ti' tojlel José, ñaxan jini ascuñʌl bʌ cha'an ñaxan tsi' yila pañimil, wi'il jini ijts'iñʌl tac bʌ ti tac' ti tac' c'ʌlʌl ti cojix bʌ. Tsa' toj sajtiyob i pusic'al jini winicob.

³⁴José tsi' ch'ʌmʌ jini we'elʌl am bʌ ti mesa. Tsi' ñusʌbeyob i pi'ʌlob. Tsi' yʌq'ue Benjamín chʌnlujch i ñumel i bʌl i ñʌc' che' bajche' yaño' bʌ. Tsi' cha'leyob uch'el. Tijicña tsi' yubiyob yic'ot José.