Read Chol Genesis 45 Bible Online

Genesis 45 - Chol bible

Genesis 45

¹Ma'anix tsa' mejli i chʌn tic' i bʌ José ti' tojlel i pi'ʌlob wa'alo' bʌ ti' t'ejl. C'am tsi' subeyob: La' loq'uicob pejtelel winicob. Ma'anic tsa' cʌle mi juntiquilic che' bʌ tsi' pʌsbeyob i bʌ i yʌscuñob.

²C'am tsi' cha'le uq'uel. Jini egiptojob tsi' yubiyob yic'ot jini ya' bʌ añob ti' yotot Faraón.

³José tsi' subeyob i yʌscuñob: Joñon José. ¿Cuxul to ba c tat? che'en. Ma'anic tsa' mejli i jac'ob i yʌscuñob, come tsa' toj sajtiyob i pusic'al ti' tojlel.

⁴José tsi' subeyob i yʌscuñob: La wocolic, la'la. Nochtañonla. Tsa' caji' ñochtañob majlel. Tsi' subeyob: Joñon José, la' wijts'iñon. Tsa' la choñoyon ti' c'ʌb egiptojob.

⁵Mach yomix mi la' chʌn mel la' pusic'al. Mach la' mich'len la' bʌ cha'an tsa' la' choñoyon. Come Dios tsi' chocoyon tilel ti' tojel la' wut cha'an mij coltan jini wi'ñayo' bʌ, cha'an cuxul mi' yajñelob.

⁶I cha'p'ejlelix jab woliyob ti wi'ñal ti ili lum. Anto yom jo'p'ejl jab wi'ñal che' mach mejlic i picob lum che' ma'anic c'ajbal.

⁷Dios tsi' chocoyon tilel ti' tojel la' wut cha'an mij coltañetla, cha'an ma'anic mi' jilel la' p'olbal ti pañimil. Tsi' chocoyon tilel cha'an mi la' taj ñuc bʌ la' coltʌntel.

⁸Jini cha'an mach jateticla tsa' bʌ la chocoyon tilel. Dios tsi' chocoyon tilel. Dios tsi' yotsayon ti' tat Faraón yilal. I yumon pejtelel am bʌ ti' yotot Faraón, i yumon pejtel egiptojob.

⁹Sujtenla ti ora ba'an c tat. Subenla: “Tsi' pejcayon lojon a walobil José. Tsi' yʌlʌ: Dios tsi' yotsayon ti' yum pejtelel egiptojob. La' ba' añon ti ora. Mach yomic ma' jalijel.

¹⁰Mux caj a chumtʌl ti lum i c'aba' Gosén. Mi caj a wajñel lʌc'ʌl ba' añon, jatet yic'ot a walobilob yic'ot a buts, yic'ot a tiñʌme' yic'ot a wʌlac' yic'ot pejtel a chubʌ'an.

¹¹Wʌ' mi caj c we'sañet wʌ'i cha'an ma'anic ma' wochel ti pobre, jatet yic'ot jini año' bʌ ti a wotot, yic'ot a chubʌ'an, come jo'p'ejl to jab an wi'ñal, che'en a walobil”. Che' yom mi la' suben c tat, che'en José.

¹²La' wilan, ti la' pejtelel yic'ot quijts'in Benjamín wolix la' q'uel joñoñʌch woli bʌ c pejcañetla.

¹³Mux caj la' suben c tat pejtelel c ñuclel wʌ' ti Egipto, yic'ot pejtelel tsa' bʌ la' q'uele. Cucula ti ora. Pʌyʌla tilel c tat ilayi, che'en José.

¹⁴José tsi' tul meq'ue Benjamín. Tsi' cha'le uq'uel. Benjamín tsi' cha'le uq'uel che' liquil ti' quejlab José.

¹⁵José tsi' ts'ujts'ube i wut pejtelel i yʌscuñob. Tsi' mulu i yʌscuñob ti' ya'lel i wut. Che' bʌ tsa' ujtiyob ti uq'uel tsi' cha' pejcayob i bʌ.

¹⁶Jini año' bʌ ti' yotot Faraón tsa' caji' yubiñob julemobix i yʌscuñob José. Tijicña tsi' yubiyob Faraón yic'ot i winicob.

¹⁷Faraón tsi' sube José: Suben a wʌscuñob: “P'ʌtbenla i cuch la' mula. Cucula ti sujtel ti' lumal Canaán.

¹⁸Pʌyʌla tilel la' tat yic'ot pejtel la' pi'ʌlob. Che' tilemetla ba' añon mi caj cʌq'ueñetla i wenlel i lumal Egipto. Mi caj la' c'ux wen bʌ i wut jini pʌc'ʌbʌl.

¹⁹Pʌyʌbenla majlel carreta tac la' walobilob yic'ot la' wijñamob. Pʌyʌla tilel la' tat. La'la.

²⁰Mach mi la' chʌn ña'tan la' chubʌ'an. Come jini c'ax wen bʌ lum ti' lumal Egipto la' cha'añʌch”. Che' yom mi la' subeñob, che'en Faraón.

²¹I yalobilob Israel tsi' meleyob che' bajche' tsa' subentiyob. José tsi' yʌq'ueyob carreta mu' bʌ i tujc'ʌntel majlel che' bajche' tsi' yʌc'ʌ mandar Faraón. Tsi' yʌq'ueyob i bʌl i ñʌc' cha'an mi' c'uxob ti bij.

²²Tsi' yʌq'ueyob i pislel cha'an mi' q'uextañob i pislel ti jujuntiquil. Tsi' yʌq'ue Benjamín jo'lujunc'al plata bʌ taq'uin yic'ot jo'p'ejl i pislel cha'an mi' q'uextan i bʌ.

²³Tsi' chocbe majlel i majtan i tat: Lujuncojt burro am bʌ i cuch, wen bʌ chubʌ'añʌl loq'uem bʌ ti Egipto, yic'ot lujuncojt mula cuchul bʌ i cha'an trigo, yic'ot waj, yic'ot i bʌl i ñʌc' i tat cha'an mi' c'uxob ti bij.

²⁴Che' jini José tsi' choco majlel i yʌscuñob. Tsa' majliyob. Tsi' subeyob: Tsajiletmela ame mi la' mich'len la' bʌ ti bij, che'en José.

²⁵Che' jini tsa' loq'uiyob ti Egipto. Tsa' tiliyob ti' lumal Canaán ba'an Jacob i tat.

²⁶Tsi' subeyob: Cuxul to José. I yumʌch pejtelel i lumal Egipto, che'ob. Tsa' toj sajti i pusic'al Jacob. Ma'anic tsi' ñopbeyob i t'an.

²⁷Tsi' subeyob pejtelel i t'an José. Che' bʌ tsi' q'uele jini carreta tsa' bʌ i choco tilel José cha'an mi' cuch majlel, tsa' ñuq'uesʌbenti i pusic'al Jacob.

²⁸Israel tsi' yʌlʌ: Ñopolix c cha'an. Cuxul to calobil José. Mux c majlel j q'uele' che' cuxulon to, che'en.