Read Chol Genesis 46 Bible Online

Genesis 46 - Chol bible

Genesis 46

¹Israel tsa' caji ti xʌmbal majlel yic'ot pejtelel i chubʌ'an. Tsa' c'oti ti Beerseba. Tsi' yʌq'ue i majtan Dios, i Dios Isaac. Jini Isaac i tat Jacob.

²Dios tsi' pejca Israel che' ti ac'ʌlel. Tsi' yʌlʌ: Jacob, Jacob, che'en. Israel tsi' jac'ʌ: Wʌ' añon, che'en.

³Tsi' yʌlʌ: Joñon Dioson, i Dioson a tat. Mach a bʌc'ñan majlel ti Egipto, come ya'i mi caj c wen p'ojlesan a walobilob.

⁴Mi caj c majlel a wic'ot ti Egipto. Isujm mi caj c cha' pʌy loq'uel a p'olbal. José mi caj i muts'beñet a wut ba' ora ma' chʌmel, che'en.

⁵Jini cha'an Jacob tsa' loq'ui ti Beerseba. I yalobilob Israel tsi' cuchuyob majlel ti carreta yic'ot i yalobilob yic'ot i yijñamob. Chocbil tilel carreta tac cha'an Faraón cha'an mi' cuch majlel.

⁶Tsi' pʌyʌyob majlel i yʌlac'. Tsi' ch'ʌmʌyob majlel i chubʌ'an tsa' bʌ i tajayob ti' lumal Canaán. Tsa' c'oti Jacob ti Egipto yic'ot pejtelel i p'olbal.

⁷Tsa' c'otiyob i yalobilob Jacob yic'ot i butsob.

⁸Jiñobʌch i c'aba'ob i yalobilob Jacob yic'ot i butsob tsa' bʌ majliyob ti Egipto: Rubén jini ascuñʌl bʌ yic'ot i yalobilob: Hanoc, Falú, Hezrón, Carmi. Simeón yic'ot i yalobilob: Jemuel, Jamín, Ohad, Jaquín, Zohar, Saúl (i yalobil jini xcananea). Leví yic'ot i yalobilob: Gersón, Coat, Merari. Judá yic'ot i yalobilob: Er, Onán, Sela, Fares, Zara. Tsa' chʌmiyob Er yic'ot Onán ti' lumal cananeojob. I c'aba'ob i yalobilob Farés: Hezrón yic'ot Hamul. Isacar yic'ot i yalobilob: Tola, Pua, Job, Simrón. Zabulón yic'ot i yalobilob: Sered, Elón, Jahleel.

¹⁵Jiñobʌch i p'olbal Lea tsa' bʌ i yʌc'ʌ ti pañimil che' ya' to chumulob ti Padanaram. Laj i yalobilobʌch Jacob. Dina jiñʌch xch'oc bʌ i yalobil. An uxlujuntiquil i cha'c'al (33) i yalobilob ti pejtelelob.

¹⁶I c'aba'ob i yalobilob Gad: Zifión yic'ot Hagui yic'ot Ezbón yic'ot Suni yic'ot Eri yic'ot Arodi yic'ot Areli.

¹⁷I c'aba'ob i yalobilob Aser: Imna yic'ot Isúa yic'ot Isúi yic'ot Bería yic'ot Sera i yijti'an. I yalobilob Bería: Heber yic'ot Malquiel.

¹⁸Jiñobʌch i yalobilob Jacob yic'ot Zilpa. Jini Zilpa aq'uebilix Lea cha'an Labán i tat. Wʌclujuntiquilob (16) ti pejtelelob.

¹⁹Jiñobʌch i c'aba'ob jini chʌnlujuntiquil (14) i p'olbal Jacob yic'ot Raquel: José yic'ot Benjamín, i yalobilob Raquel. I yalobilob José tsi' yilayob pañimil ti Egipto, jiñobʌch Manasés yic'ot Efraín. I ña' jiñʌch Asenat, i yixic'al Potifera jini motomaj chumul bʌ ti tejclum i c'aba' On. I yalobilob Benjamín: Bela, Bequer, Asbel, Gera, Naamán, Ehi, Ros, Mupim, Hupim yic'ot Ard.

²³Añob ja'el wuctiquil i p'olbal Jacob yic'ot Bilha i criada Raquel tsa' bʌ i yʌq'ue i tat. I yalobil Dan: Husim. I yalobilob Neftalí: Jahzeel, Guni, Jezer yic'ot Silem.

²⁶Añob wʌctiquil i chʌnc'al (66) ti pejtelelob tsa' bʌ majliyob yic'ot Jacob ti Egipto. Jiñobʌch i yalobilob Jacob ti pejtelelob. Tsa' tiliyob ja'el i yʌ'libob.

²⁷Añob cha'tiquil ch'iton bʌ i yalobilob José tsa' bʌ i yilayob pañimil ti Egipto. Añob lujuntiquil i chʌnc'al (70) ti pejtelelob jini loq'uemo' bʌ ti Jacob tsa' bʌ tiliyob ti Egipto.

²⁸Jacob tsi' sube majlel Judá ti ñaxan cha'an mi' pʌy tilel José cha'an mi' tajob i bʌ ya' ti Gosén. Tsa' majliyob ti' lumal Gosén.

²⁹José tsi' cʌchʌ i carreta ti' yʌlac'. Tsa' tili i taje' Israel i tat ya' ti Gosén. Tsi' cha' ac'ʌ i bʌ ti cʌjñel. Tsi' tul meq'ue. Jal tsi' cha'le uq'uel.

³⁰Israel tsi' sube José: Cha' tijicñayonix, come tsa'ix c cha' q'uelbeyet a wut. Cuxulet to. Ti' tijicñʌyel c pusic'al mi caj c chʌmel, che'en.

³¹José tsi' subeyob i yʌscuñob yic'ot jini año' bʌ ti' yotot i tat: Mi caj c majlel ba'an Faraón cha'an mic suben julemobix cʌscuñob yic'ot c pi'ʌlob tsa' bʌ chumleyob ti' lumal Canaán.

³²Mi caj c suben: “Xcʌnta tiñʌme'ob jini winicob, come añob i ye'tel ti alʌc'ʌl. Tsi' pʌyʌyob tilel i tiñʌme' tac yic'ot i yʌlac' yic'ot pejtel i chubʌ'an”, cho'on mi caj c suben.

³³Che' mi' pʌyetla tilel Faraón, che' mi' c'ajtibeñetla: “¿Chuqui la' we'tel?” mi che'en,

³⁴mi caj la' wʌl: “A winicon lojon, xcʌntayajon lojon cha'an alʌc'ʌl c'ʌlʌl che' ch'itoñon to lojon, joñon lojon quic'ot c tat lojon”. Che'ʌch yom mi la' suben cha'an mi mejlel la' chumtʌl ti' lumal Gosén. Come ts'a'lebilob pejtelel xcʌnta alʌc'ʌl cha'an egiptojob, che'en.