Read Chol Genesis 47 Bible Online

Genesis 47 - Chol bible

Genesis 47

¹José tsa' majli ba'an Faraón. Tsi' sube: Julemobix c tat yic'ot cʌscuñob yic'ot tiñʌme' tac yic'ot alʌc'ʌl tac yic'ot pejtelel i chubʌ'an loq'uemo' bʌ ti' lumal Canaán. Añobix ti' lumal Gosén.

²José tsi' yajca jo'tiquil i yʌscuñob. Tsi' pʌsbeyob Faraón.

³Faraón tsi' subeyob: ¿Chuqui la' we'tel? che'en. Tsi' subeyob Faraón: A winicon lojon. Xcʌntayajon lojon cha'an alʌc'ʌl, joñon lojon quic'ot c tat lojon, che'ob.

⁴Tsi' subeyob ja'el: Talon lojon ti poj chumtʌl lojon ti a lumal, come ma'anic lojon c jamil cha'an c tiñʌme' tac, come tsʌts jini wi'ñal ti' lumal Canaán. A winicon lojon. A wocolic la' chumlecon lojon ti' lumal Gosén, che'ob.

⁵Faraón tsi' sube José: Wʌ'an i lumal Egipto ti' tojel a wut. La' majlicob ti chumtʌl a tat yic'ot a wʌscuñob ba' mero wen jini lum. La' chumlecob ti' lumal Gosén. Mi cʌñʌl a cha'an p'ip' bʌ i pusic'al winicob ti' tojlelob, aq'ueñob i ch'ʌmob jini cʌlac' ti' wenta, che'en.

⁷José tsi' pʌyʌ ochel Jacob i tat. Tsi' yʌc'ʌ ti cʌjñel ti' tojlel Faraón. Jacob tsi' yʌc'ʌ Faraón ti' wenta Dios cha'an mi' cʌntʌntel.

⁸Faraón tsi' c'ajtibe Jacob: ¿Jayp'ejlix a jabilel ti pañimil? che'en.

⁹Jacob tsi' sube: Anix lujump'ejl i wucc'al (130) c jabilel. Xñumelon ti pañimil. Mach cabʌlic c jabilel. Cabʌl c wocol. Ma'anic tsac tajbe i jabilel c ñojte'el jal bʌ tsa' ñumiyob ti pañimil, che'en.

¹⁰Jacob tsi' yʌc'ʌ Faraón ti' wenta Dios cha'an mi' cʌntʌntel. Tsa' loq'ui ti' tojlel Faraón.

¹¹José tsi' yotsa ti chumtʌl ya' ti Egipto i tat yic'ot i yʌscuñob. Tsi' yʌq'ueyob lum ya' ti mero wen bʌ lum, ti' lumal Ramesés che' bajche' tsi' yʌlʌ Faraón.

¹²Tsi' yʌq'ueyob i bʌl i ñʌc i tat yic'ot i yʌscuñob yic'ot jini año' bʌ ti' wenta i tat ti pejtelelob che' bajche' jaytiquil añob. Tsi' yʌq'ueyob waj.

¹³Ma'anic waj ti pejtelel jini lum, come wen woliyob ti wi'ñal jini egiptojob yic'ot cananeojob. Tsa' c'uñ'ayob cha'an wi'ñal.

¹⁴José tsi' ch'ʌmʌ pejtelel jini taq'uin am bʌ ti' lumal Egipto yic'ot ti' lumal Canaán i tojol jini trigo tsa' bʌ i mʌñʌyob. Tsi' ch'ʌmʌ ochel ti' yotot Faraón.

¹⁵Che' bʌ tsa' laj jili i taq'uin egiptojob yic'ot cananeojob tsa' tiliyob ba'an José pejtel egiptojob. Tsi' yʌlʌyob: Aq'ueñon i bʌl lojon c ñʌc'. Mach yomic mic chʌmel lojon ti wi'ñal ti a tojlel anquese laj jilemix jini taq'uin, che'ob.

¹⁶José tsi' yʌlʌ: Aq'ueñon la' wʌlac'. Mij q'uex ti waj, che' laj jilemix la' taq'uin, che'en.

¹⁷Jini cha'an tsi' pʌyʌyob tilel i yʌlac' ba'an José. José tsi' yʌq'ueyob i bʌl i ñʌc'. Tsi' tojoyob ti caballo, ti tiñʌme', ti burro, yic'ot ti yambʌ alʌc'ʌl tac. Tsi' yʌq'ueyob i bʌl i ñʌc' ti' q'uexol i yʌlac' jump'ejl jab.

¹⁸Ti' tejchibal yambʌ jab, tsa' cha' tiliyob ba'an José. Tsi' subeyob: Yom ma' ña'tan c yum, laj jilemix c taq'uin lojon. A cha'añʌch pejtel cʌlac' lojon. Ma'anix lojon c chubʌ'an, jini jach c bʌc'tal lojon yic'ot c lum lojon.

¹⁹¿Yom ba mic chʌmel lojon ti wi'ñal che' cuxulet? ¿Yom ba jochol mi' cʌytʌl c lum lojon? Mach yomic. Mʌñʌyon lojon yic'ot c lum cha'an i tojol lojon c waj. Che' jini i cha'añon lojon Faraón yic'ot c lum. Aq'ueñon lojon c pac' cha'an mic pʌc' che' cuxulon to lojon ame chʌmicon lojon, ame jilic i c'ʌjñibal jini lum, che'ob.

²⁰Jini cha'an José tsi' mʌmbe Faraón pejtelel i lumal Egipto. Jini egiptojob tsi' chombeyob i lum ti jujuntiquil, come wen tsʌts jini wi'ñal woli bʌ ti ñumel ti' tojlelob. Jini cha'an jini lum tsa' ochi ti' wenta Faraón.

²¹José tsi' pʌyʌ loq'uel pejtel winicob x'ixicob ti xchumtʌl tac ti pejtelel Egipto. Tsi' chocoyob majlel ti chumtʌl ti tejclum tac.

²²Cojach i lum motomajob ma'anic tsi' mʌñʌ, come Faraón tsi' yʌq'ueyob waj. Tsi' c'uxuyob i bʌl i ñʌc' ti chejachi. Jini cha'an ma'anic tsi' choñoyob i lum.

²³José tsi' subeyob winicob x'ixicob: La' wilan, mʌmbiletixla c cha'an, jatetla, yic'ot la' lum. I cha'añetla Faraón. Umba'an la' pac'. Mux caj la' cha'len pac' ti lum.

²⁴Che' ti yorajlel c'ajbal mi caj la' wʌq'uen Faraón junlujch trigo loq'uem bʌ ti jo'lujch. Chʌnlujch la' cha'añʌch cha'an la' pac' yic'ot cha'an i bʌl la' ñʌc'. La' cha'añʌch cha'an mi la' c'ux yic'ot la' pi'ʌlob yic'ot la' walobilob, che'en José.

²⁵Tsi' yʌlʌyob: Tsa' coltayon lojon. La' c taj lojon i yutslel a pusic'al, c yum. I winicon lojon Faraón.

²⁶José tsi' mele ley. C'ʌlʌl ti ili ora leyʌch ti' lumal Egipto. I cha'añʌch Faraón i wut pʌc'ʌbʌl. Mi' yʌq'uentel Faraón jump'is ti jo'p'is. Cojach i lum motomajob mach i cha'anic Faraón.

²⁷Tsa' chumle Israel ti' lumal Egipto ya' ti lum i c'aba' Gosén. Tsi' tajayob i chubʌ'an ya'i. Tsa' p'ojliyob i yalobilob. Tsa' wen p'ojliyob.

²⁸Wuclujump'ejl (17) jab tsa' chumle Jacob ti' lumal Egipto. Añob wucp'ejl i waxʌcc'al (147) i jabilel Jacob ti pejtelel.

²⁹Tsa' tili i yorajlel che' mach jalix mi' chʌmel Israel. Tsi' pʌyʌ tilel José i yalobil. Israel tsi' sube: Mi c'ux ma' wubiñon mele che' bajche' mic subeñet cha'an ma' pʌsbeñon i yutslel yic'ot i xuc'tilel a pusic'al. A wocolic mach a mucon ti Egipto.

³⁰Com c mujquel ya' ba' tsa' mujqui c ñojte'elob. Yom ma' q'uechon loq'uel ti Egipto. Yom ma' mucon ti mucoñibʌl ba'an c tatob, che'en Israel. José tsi' jac'ʌ: Mi caj c mel che' bajche' tsa' wʌlʌ, che'en.

³¹Israel tsi' yʌlʌ: Yom ma' wersa aq'ueñon a t'an, che'en. José tsi' wersa aq'ue i t'an. Che' jini Israel tsi' c'uchchoco i bʌ ya' ti' jol i wʌyib cha'an mi' ch'ujutesan Dios.