Read Chol Genesis 6 Bible Online

Genesis 6 - Chol bible

Genesis 6

¹Che' bʌ tsa' cajiyob ti p'ojlel winicob ti pañimil, tsi' yilayob pañimil ja'el xch'oc bʌ i yalobilob.

²Jini sajtemo' bʌ i yalobilob Dios tsi' q'ueleyob xch'oc bʌ i yalobilob winicob. I t'ojol jax tsi' q'ueleyob. Tsi' pʌyʌyob i yijñam che' bajche' jaytiquil tsi' mulayob.

³Tsi' yʌlʌ lac Yum: Mach ti pejtelelic ora mi caj i cuchbeñob i jontolil winicob jini quEspíritu, come tsucul i pusic'al winicob. Mi caj j com'esʌbeñob i jabilel cha'an wʌcc'al jach jab mi' yajñelob ti pañimil.

⁴An colem bʌ winicob ti pañimil ti ili ora yic'ot ti wi'il. Jini sajtem bʌ i yalobilob Dios tsa' tili i pi'leñob jini xch'oc bʌ i yalobilob winicob. Tsi' q'ueleyob pañimil i yalobilob. Jiñobʌch ch'ejl bʌ winicob año' bʌ ti wajali. Wen ñucob.

⁵Lac Yum tsi' q'uele cabʌlix i jontolil winicob ti pañimil. Tsi' q'uele jontol jax ti pejtelel ora pejtel chuqui an ti' pusic'al winicob yic'ot pejtel chuqui tsi' ña'tayob.

⁶Tsi' mele i pusic'al lac Yum cha'an tsi' mele winicob ti pañimil. Ch'ijiyem i pusic'al.

⁷Lac Yum tsi yʌlʌ: Mi caj c jisan ti pañimil jini winicob tsa' bʌ c mele yic'ot bʌte'el yic'ot jʌlʌcña bʌ mi' majlel yic'ot mut, come wolic mel c pusic'al cha'an tsac meleyob, che'en.

⁸Lac Yum tsi' q'uele Noé ti uts'at. Tsi' pʌsbe i yutslel i pusic'al.

⁹Jiñobʌch i p'olbal Noé. Toj jini Noé. Uts'at ti' wut Dios yic'ot ti' tojlel winicob x'ixicob. Uts'at tsi' cha'le xʌmbal ti' bijlel Dios.

¹⁰Tsi' yila pañimil uxtiquil ch'iton bʌ i yalobilob Noé, i c'aba'ob Sem yic'ot Cam yic'ot Jafet.

¹¹Jini año' bʌ ti pañimil tsi' socoyob i bʌ ti jontolil ti' wut Dios. Cabʌl tsa' p'ojli jontolil ti pañimil.

¹²Dios tsi' q'uele jontol jax pejtel winicob x'ixicob, come tsi' socoyob i bʌ ti pañimil.

¹³Dios tsi' sube Noé: Mi caj c jisan pejtel winicob x'ixicob, come cabʌl tsa' p'ojli jontolil ti pejtel pañimil. Awilan, mi caj c jisañob yic'ot pañimil.

¹⁴Mele barco ti goferte'. Mele tsalʌl tac ti barco ja'el. Pʌc'ʌ yic'ot i yetsel te' ti' mal yic'ot ti' pat.

¹⁵Mele che' bajche' wolic subeñet: Wucc'al (140) metro i ñajtlel, uxp'ejl i cha'c'al (23) metro i xujc, chʌnlujump'ejl (14) metro i chanlel.

¹⁶Mele ventana ojlil metro i chanlel ti' joytilel barco. Melben i puertajlel barco ya' ti' ti'. Uxlajm yom ma' melben i mal.

¹⁷Awilan, mi caj c choc tilel but'ja' cha'an mic jisan pejtel i bʌl pañimil am bʌ i cuxtʌlel. Mi' caj ti chʌmel pejtel cuxul bʌ ti pañimil,

¹⁸pero ma'anic mi caj a chʌmel jatet. Mi caj cʌq'ueñet xuc'ul bʌ t'an. Mi caj a wochel ti barco, jatet yic'ot a walobilob yic'ot a wijñam yic'ot i yijñamob a walobilob.

¹⁹Mi caj a pʌy ochel ti barco pejtel cuxul tac bʌ ti cha'cha'cojt, cha'an cuxul mi' yajñelob a wic'ot. Mi caj i yochel ti ñujp ti ñujp te'lemut, yic'ot bʌte'el, yic'ot jʌlʌcña bʌ mi' majlel ti lum ti chajp ti chajp. Ti ñujp ti ñujp mi caj i tilel ba' añet cha'an ma'anic mi' jilel. Che' tsi' yʌlʌ Dios.

²¹Tempan i buc'bal ti chajp ti chajp. Otsan yic'ot i bʌl a ñʌc' cha'an ma' c'ux yic'ot a pi'ʌlob.

²²Che'ʌch tsi' mele Noé. Tsi' cha'le pejtelel chuqui tsi' yʌlʌ Dios.