Read Chol Genesis 7 Bible Online

Genesis 7 - Chol bible

Genesis 7

¹Lac Yum tsi' sube Noé: Ochen ti barco, yic'ot pejtel año' bʌ ti a wotot, come tsaj q'uele tojet tic tojlel yic'ot ti' tojlel pejtel winicob x'ixicob ti pañimil.

²Otsan ti barco wuccojt i tat yic'ot wuccojt i ña'al pejtelel sʌc bʌ bʌte'el ti jujunchajp. Otsan ja'el jini mach bʌ sʌquic, juncojt i tat yic'ot juncojt i ña'al pejtel bʌte'el ti jujunchajp.

³Otsan ja'el wuccojt i tat yic'ot wuccojt i ña'al mut ti chajp ti chajp cha'an cuxul mi' yajñel ti pañimil.

⁴Che' ñumeñix wucp'ejl q'uin mi caj c choc tilel ja'al ti pañimil. Mi' cajel ja'al cha'c'al q'uin yic'ot cha'c'al ac'ʌlel. Mi caj c jisan ti pañimil pejtelel cuxul tac bʌ tsa' bʌ c mele. Che' tsi' yʌlʌ lac Yum.

⁵Noé tsi' mele pejtelel chuqui tsi' yʌlʌ lac Yum.

⁶An lujunc'al i cha'bajc' (600) i jabilel Noé che' bʌ tsa' tili jini but'ja' ti pañimil.

⁷Noé yic'ot i yalobilob yic'ot i yijñam yic'ot i yijñamob i yalobilob tsa' ochiyob ti barco cha'an but'ja'.

⁸Jini sʌc bʌ bʌte'el yic'ot mach bʌ sʌquic bʌte'el, yic'ot te'lemut, yic'ot pejtelel jʌlʌcña bʌ mi' majlel ti lum

⁹ti cha'cha'cojt i tat yic'ot i ña'al ti jujunchajp tsa' ochiyob ti barco yic'ot Noé che' bajche' Dios tsi' yʌq'ue mandar Noé.

¹⁰Che' ñumeñix wucp'ejl q'uin tsa' tili but'ja'. Tsa' tejchi che' lujunc'alix i cha'bajc' i jabilel Noé, ti cha'p'ejlel uw yic'ot ti wuclujump'ejl q'uin. Ti jini jach bʌ q'uin tsa' tojmi pejtel i yajñib jini cuxul tac bʌ ja' am bʌ ti tam bʌ i yajñib. Ma'anic i p'isol ja'al. Cha'c'al q'uin yic'ot cha'c'al ac'ʌlel tsi' cha'le ja'al.

¹³Ti jini jach bʌ q'uin che' bʌ tsa' caji ja'al tsa' ochiyob ti barco Noé yic'ot i yalobilob Noé, Sem yic'ot Cam yic'ot Jafet, yic'ot i yijñam Noé yic'ot i yijñamob i yalobilob.

¹⁴Tsa' ochi ja'el ti chajp ti chajp pejtel bʌte'el, yic'ot pejtel alʌc'ʌl, yic'ot pejtel jʌlʌcña bʌ mi' majlel, yic'ot pejtel mut ti jujunchajp. Tsa' ochiyob ti barco ba'an Noé ti ñujp ti ñujp.

¹⁶Ti pejtelel cuxul tac bʌ tsa' ochiyob i tat yic'ot i ña'al che' bajche' Dios tsi' yʌq'ue mandar Noé. Lac Yum tsi' ñup'uyob.

¹⁷Cha'c'al q'uin tsa' bujt'i pañimil. Jini ja' tsa' tam'a. Tsi' ch'uyu letsel jini barco. Chan tsa' c'ʌjqui barco ti pam ja'.

¹⁸Jini ja' tsa' letsi. Tsa' wen p'ojli ti lum. C'ʌcʌcña ti pam ja' tsa' majli jini barco.

¹⁹Tsa' wen bujt'i ja' ti pañimil. Tsa' c'ʌjqui letsel ja' c'ʌlʌl tsa' ñumi ti pejtelel jini chan tac bʌ wits am bʌ ti yebal panchan.

²⁰Tsa' c'axi jini ja' ya' ti pam wits ojlil i waxʌcp'ejl metro.

²¹Tsa' chʌmi pejtelel cuxul tac bʌ tsa' bʌ ajni ti pañimil, mut, alʌc'ʌl, bʌte'el, pejtel jʌlʌcña bʌ mi' majlel ti lum, yic'ot pejtelel winicob x'ixicob.

²²Tsa' chʌmi pejtel año' bʌ ti pañimil mu' bʌ i japob ic'.

²³Dios tsi' jisa pejtel cuxul tac bʌ am bʌ ti pañimil, winicob yic'ot bʌte'el, yic'ot jini jʌlʌcña bʌ mi' majlel, yic'ot mut. Tsa' laj jiliyob. Cojach Noé tsa' cʌle yic'ot jini año' bʌ ti barco.

²⁴Jini ja' tsa' ajni ti lum lujump'ejl i waxʌcc'al (150) q'uin.