Read Chol Genesis 9 Bible Online

Genesis 9 - Chol bible

Genesis 9

¹Dios tsi' yʌq'ue i yutslel i t'an Noé yic'ot i yalobilob. Tsi' subeyob: Yom tilic cabʌl la' p'olbal. Yom mi la' p'ojlel. But'ula jini pañimil.

²Mi caj i bʌc'ñañetla pejtel bʌte'el ti pañimil yic'ot pejtel mut, yic'ot pejtel jʌlʌcña bʌ mi' majlel ti lum, yic'ot chʌy. Ti pejtelel mi cʌq'ueñetla ti la' wenta.

³I bʌlʌch la' ñʌc' pejtel cuxul tac bʌ mu' bʌ ti xʌmbal. Che' bajche' tsa cʌq'ueyetla pimel yic'ot yambʌ i wut lum, mi cʌq'ueñetla pejtel chuqui tac an.

⁴Pero mach la' c'ux yic'ot i ch'ich'el come tic'bil. Jiñʌch i cuxtilel.

⁵Mi caj j q'uextʌben i jontolil jini mu' bʌ i cha'len tsʌnsa mi bʌte'el o mi winic. Joñon mi caj j q'uextʌben i mul.

⁶Majqui jach mi' bec'ben i ch'ich'el winic, mi caj i tsʌnsʌntel ja'el, come Dios tsi' mele winic ti' yejtal.

⁷Yom mi la' p'ojlel jatetla. La' p'ojlic la' walobilob. La' bujt'ic pañimil ti winicob, che'en.

⁸Dios tsi' sube Noé yic'ot i yalobilob:

⁹Awilan, mi cʌq'ueñetla xuc'ul* bʌ c t'an ti la' tojlel yic'ot ti' tojlel jini talto bʌ la' p'olbal. Mi cʌq'uen trato bʌ c t'an ja'el jini mut yic'ot alʌc'ʌl yic'ot bʌte'el che' bajche' jaycojt tsa' loq'ui ti barco. Ma'anix mi caj c chʌn jisan pejtel pañimil ti but'ja'.

¹²Q'uelela i yejtal xuc'ul bʌ c t'an mu' bʌ c wa'chocon yic'otetla yic'ot pejtel cuxul tac bʌ am bʌ la' wic'ot, yic'ot pejtel cuxulo' bʌ mu' bʌ caj i tilelob.

¹³Mi cʌc' t'oxja' ti tocal. I yejtalʌch jini xuc'ul bʌ c t'an mu' bʌ cʌq'ueñob jini año' bʌ ti pañimil.

¹⁴Che' mic pʌy tilel tocal ti pañimil, mux i q'uejlel t'oxja' ti tocal.

¹⁵Mi caj c ña'tan xuc'ul bʌ c t'an tsa' bʌ cʌq'ueyetla, tsa' bʌ cʌq'ueyob pejtel cuxul tac bʌ ti jujunchajp. Mach chʌn talix but'ja' cha'an mi' jisan pejtel cuxul tac bʌ ti pañimil.

¹⁶Mi caj i tilel t'oxja' ti tocal. Mi caj j q'uel joñon cha'an mic ña'tan xuc'ul bʌ c t'an tsa' bʌ cʌq'ueyob pejtelel cuxul tac bʌ am bʌ ti pañimil, che'en Dios.

¹⁷Dios tsi' sube Noé: Jiñʌch i yejtal xuc'ul bʌ c t'an tsa' bʌ cʌq'ueyob winicob yic'ot pejtel cuxul tac bʌ ti pañimil, che'en.

¹⁸I yalobilob Noé tsa' bʌ loq'uiyob ti barco jiñobʌch Sem yic'ot Cam yic'ot Jafet. Cam jiñʌch i tat Canaán.

¹⁹Jiñobʌch i yalobilob Noé. Uxtiquil winicob. I ñojte'elobʌch pejtel winicob x'ixicob ti pañimil.

²⁰Noé tsa' caji' top' lum. Tsi' pʌc'ʌ ts'usubil.

²¹Tsi' japʌ vino. Tsa' yʌc'a. Pits'il Noé ti' mal pisil bʌ i yotot.

²²Cam, i tat Canaán, tsi' q'uele pits'il i tat. Tsa' loq'ui majlel i subeñob i yʌscun yic'ot i yijts'in año' bʌ ti jumpat.

²³Sem yic'ot Jafet tsi' ch'ʌmʌyob pisil. Tsi' lic q'uecheyob tilel pisil ti' quejlab ti cha'ticlel. Wʌlʌcpat tsa' ochiyob. Tsi' mosoyob i tat che' pits'il. Tsi' mʌyʌyob i wut. Ma'anic tsi' q'ueleyob i tat che' pits'il.

²⁴Che' bʌ c'ajalix i yo Noé tsi' ña'ta chuqui tsi' cha'le jini ijts'iñʌl bʌ i yalobil.

²⁵Tsi' yʌlʌ: Chojquemix Canaán. Mux i yochel ti majtan e'tel ti' tojlel i yʌscuñob. La' aq'uentic Sem i yutslel i t'an lac Yum Dios. La' ochic Canaán ti x'e'tel i cha'an Sem. Dios mi caj i yʌq'uen i ñuclel Jafet. Mi' caj ti chumtʌl ti pisil bʌ i yotot tac Sem. Mux i yochel Canaán ti x'e'tel i cha'an. Che' tsi' yʌlʌ Noé.

²⁸Che' bʌ lajmenix but'ja cuxul to Noé jo'lujunc'al yic'ot lujump'ejl i yuxc'al (350) jab.

²⁹Anix cha'bajc' yic'ot lujump'ejl i waxʌcc'al (950) i jabilel Noé ti pejtelel. Tsa' chʌmi.