Read Chol 2 Samuel 13 Bible Online

2 Samuel 13 - Chol bible

2 Samuel 13

¹An xch'oc bʌ i yalobil David i c'aba' Tamar. Jiñʌch i yijts'in Absalón, wen i t'ojol jax. An yambʌ i yalobil David i c'aba' Amnón. Jini tsa' caji i mulʌben i yijts'in Absalón.

²Amnón tsi' wen mula Tamar. Colelix i taj c'am'ʌjel cha'an tsi' chʌn pensari. Quisintic tsi' yubi cha'an mi' pejcan, come wen xch'oc to.

³An juntiquil i yamigo Amnón, i c'aba' Jonadab (i yalobil Simea, i yʌscun David). Awilan wen p'ip'atax i pusic'al jini Jonadab.

⁴Jonadab tsi' sube: ¿Chucoch ti q'uin ti q'uin woli a yaj'an? Subeñon, che'en. Amnón tsi' jac'be: Isujm wolic wen mel c pusic'al cha'an wolic wen mulan Tamar i yijts'in Absalón jini queran, che'en.

⁵Jonadab tsi' sube: Cucu ti ñoltʌl ti a wʌyib, cha'an ma' pʌs a bʌ che' bajche' c'amet. Che' mi' tilel i q'uelet a tat, suben bajche' iliyi: “La' poj tilic Tamar cha'an mi' yʌq'ueñon chuqui mij c'ux wʌ' ba' ñololon tic wʌyib”, che'en.

⁶Che' jini tsa' ñole Amnón. Wen c'am tsa' caji i mel i bʌ. Che' bʌ tsa' tili i q'uel jini rey, Amnón tsa' caji i suben i tat: Awocolic poj choco tilel Tamar, cha'an mi' melbeñon ts'ita' i bʌl c ñʌc cha'an mij c'ux, che'en.

⁷Che' bʌ tsa' c'oti David ti' yotot, tsi' choco majlel Tamar cha'an mi' melben i waj.

⁸Che' bʌ tsa' c'oti Tamar ti' yotot Amnón ya' ba' ñolol i yʌscun, tsa' caji i melben pan. Tsi' xʌc'ʌ ti' tojel i wut Amnón.

⁹Che' mejlemix jini pan tsi' ch'ʌmbe majlel ya' ba ñolol, pero Amnón ma'anic tsi' jac'ʌ i c'ux. Tsa' jach caji i subeñob loq'uel pejtelel x'e'telob. Jini cha'an tsa' loq'uiyob.

¹⁰Amnón tsa' caji i suben Tamar: Ch'ʌmʌ tilel jini pan ilayi tic wʌyib cha'an ma' wotsʌbeñon ti quej, che'en. Tamar tsi' ch'ʌmbe majlel pan ya' ba' ñolol.

¹¹Ba' ora tsa' c'oti i yʌq'uen ya' baqui ñolol, Amnón tsi' chucu Tamar. Tsi' sube: La' ñoleconla, che'en.

¹²Jini xch'oc tsi' jac'ʌ: Mach comic. Leco jax muq'uet ti t'an, come mach i t'ojolic mi' yujtel ti' tojlel israelob bajche' iliyi. Mach a mel chuqui quisintic jax.

¹³Come ¿majqui to mi caj i pʌyon mi tsa' lac pi'le lac bʌ? che'en. Jixcu jatet ¿a wom ba pejcʌntel ti tonto ti Israel? Jini cha'an mic subeñet ñaxan pejcan lac tat. Mi cʌl mux i jac'beñet a t'an, che'en.

¹⁴Pero Amnón ma'anix tsi' chʌn jac'be i t'an. Tsi' wersa tujc'a ochel ti' wʌyib. Che' bʌ tsi' ñolchoco tsa' caji ti ñoltʌl yic'ot.

¹⁵Amnón tsa' caji i wen mich'len Tamar. Ts'ita' tsi' c'uxbi ti ñaxan, pero che' bʌ tsa' ujti i pi'len, tsa' caji i wen ts'a'len. Jini cha'an Amnón tsa' caji' suben: Cucux ti a wotot, che'en.

¹⁶Jini xch'oc tsi' cha'le uq'uel: ¿Chucoch ma' chocon loq'uel? ¿Mach ba ñumen anic a mul che' ma' chocon loq'uel che' bajche' ti ñaxan che' bʌ tsa' pejcayon? che'en. Utsijax tsa' caji ti mich' Amnón.

¹⁷Amnón tsi' pʌyʌ tilel jini x'e'tel i cha'an. Tsi' sube: Choco loq'uel ili x'ixic ti jumpat. Yom ma' wen ñup' jini otot.

¹⁸Jini ch'iton tsi' choco loq'uel jini xch'oc. Lʌpbil i cha'an i pislel wen i t'ojol bʌ i ts'ijbal, che' bajche' i tilel mi' lʌpob jini xch'oc bʌ i yalobilob rey.

¹⁹Tamar tsi' ch'ʌmʌ i tʌñil c'ajc. Tsi' p'ujp'u ti' jol. Tsi' jet' tsili i bujc. Che' woli ti xʌmbal tsa' caji i ñup'ye' majlel i jol. Tsa' caji ti uq'uel majlel.

²⁰Absalón tsa' caji i c'ajtiben i yijts'in: ¿Jim ba a wʌscun Amnón tsa' bʌ i pi'leyet? Quijts'in, mach yomic ma' mel a pusic'al, come a wʌscuñʌch, che'en. Ch'ijiyem jax i pusic'al Tamar. Tsa' cʌle ya' ti' yotot Absalón.

²¹Che' bʌ tsi' yubi David pejtel jini tsa' bʌ ujti, tsa' wen mich'a.

²²Absalón ma'anic tsi' letsa i t'an ti' contra Amnón, pero mich' i pusic'al cha'an tsa' pi'lebenti i yijts'in.

²³Che' bʌ ñumeñix cha'p'ejl jab, Absalón tsi' pʌyʌ tilel winicob yujilo' bʌ i tsepol i tsutsel tiñʌme'. Che' ya' añob ti Baal Hazor am bʌ ti' tojel Efraín, Absalón tsa' caji i pʌy tilel pejtelel i yalobilob rey.

²⁴Tsa' majli ba'an rey. Tsi' sube: Wʌle an c winicob yujilo' bʌ i tsepol i tsutsel tiñʌme'. Jini cha'an ti wocol t'an mic subeñet yom ma' tilel ti c'ux waj yic'ot querañob, che'en.

²⁵Jini rey tsi' jac'be: Calobil mach mejlicon lojon ti laj majlel, ame cabʌlic mi cʌc' lojon e'tel ti a wotot cha'an i bʌl lojon c ñʌc', che'en. Absalón tsa' caji i wersa pʌy majlel, pero ma'anic tsi' jac'ʌ majlel. Tsa' jach i yʌq'ue i yutslel i t'an cha'an tijicña mi' c'otel i cha'len q'uiñijel.

²⁶Absalón tsi' yʌlʌ: Mi mach mejliquet ti majlel, che' jini a wocolic yom ma' choc majlel quic'ot jini queran Amnón, che'en. Jini rey tsi' jac'ʌ: ¿Chuqui i ye'tel mi' majlel a wic'ot? che'en.

²⁷Absalón tsi' wersa c'ajtibe cha'an mi' choc majlel Amnón. Tsi' yʌc'ʌ i t'an jini rey. Che' jini tsa' majli Amnón yic'ot pejtelel i yerañob.

²⁸Absalón tsi' sube jini x'e'telob i cha'an: Yom mi la' chʌcʌ q'uel Amnón che' wen tijicña jax woli' yubin che' woli' jap vino. Che' mic subeñetla: “Tsʌnsanla Amnón”, mi cho'on, ti ora jach yom mi la' tsʌnsan. Mach yomic mi la' wis cha'len bʌq'uen, come joñon woliyon ti mandar. Tsa'ix c subeyetla, ch'ejl'esan la' bʌ, che'en.

²⁹Che'ʌch tsi' meleyob jini x'e'telob i cha'an Absalón che' bajche' tsa' subentiyob. Pejtelel jini yaño' bʌ i yalobilob rey ti ora jach tsa' loq'uiyob ti puts'el ti mula tac. Che' woli to i xʌñob sujtel ya' ti bij, ju'ucñayob ti t'an. Tsa' caji i yubin jini rey David. Woli' yʌlob: Absalón tsi' laj tsʌnsa i yalobilob jini rey. Ma'anix tsa' cʌle mi juntiquilic, che'ob.

³¹Ti ora jach tsa' tejchi ch'ojyel jini rey David. Tsi' jet' tsili i pislel. Tsi' ñolchoco i bʌ ti lum yic'ot pejtelel jini x'e'telob i cha'an ya' bʌ añob ti' yotot.

³²Jini Jonadab (i yalobil Simea i yʌscun David) tsi' sube: Mach isujmic tsa' laj chʌmi a walobilob. Jini jach tsa' chʌmi Amnón. Tsi' yʌc'ʌ i t'an a walobil Absalón cha'an mi' q'uextʌben i mul Amnón tsa' bʌ i pi'le Tamar i yijts'in Absalón.

³³Jini cha'an c rey mach yomic ma' mel a pusic'al cha'an jini t'an, come mach isujmic tsa' laj chʌmiyob a walobilob. Jini jach Amnón tsa' chʌmi, che'en.

³⁴Tsa' puts'i Absalón. Che' bʌ tsi' letsa i wut jini xcʌnta tejclum, tsi' q'uele woli' tilelob cabʌl winicob ti bij am bʌ ti wits ya' ti pat.

³⁵Jonadab tsi' sube jini rey: Ixix tilel a walobilob. Isujmʌch che' bajche' tsac subeyet, che'en.

³⁶Che' poj ujtel jax to i suben, tsa' caji i q'uel ya'ix c'otel i yalobilob jini rey. C'am tsi' cha'leyob uq'uel. Tsi' cha'le uq'uel ja'el jini rey yic'ot i yaj e'telob.

³⁷Ti jim bʌ ora puts'emix majlel Absalón ba'an Talmai (i yalobil jini rey Amiud ya' ti Gesur). Jini rey David jal tsi' yuc'ta i yalobil. Uxp'ejl jab tsa' jale Absalón ya' ti Gesur. David yomix i cha' q'uel bajche' yilal Absalón, come tsa' c'unte' ñʌch'chocobenti i pusic'al che' chʌmenix Amnón.