Read Chol 2 Samuel 14 Bible Online

2 Samuel 14 - Chol bible

2 Samuel 14

¹Joab tsi' yubi wolix i cha' mel i pusic'al jini rey cha'an Absalón.

²Tsi' pʌyʌ tilel juntiquil x'ixic wen p'ip bʌ i pusic'al ch'oyol bʌ ti Tecoa. Joab tsi' sube: Yom ma' mel a bʌ che' bajche' meba'. Che'ʌch yom ma' lʌp a pislel cha'an mi' tsictiyel i ch'ijiyemlel a pusic'al. Mach yomic ma' bon a bʌ ti xojocña bʌ perfume. Yom wen ch'ijiyem ma' pʌs a bʌ ti' tojlel jini rey che' bajche' meba' anix bʌ ora woli' yuc'tan i pi'ʌl.

³Yom ma' majlel ba'an jini rey cha'an ma' suben chuqui mic subeñet. Che' tsi' yʌlʌ Joab.

⁴Che' bʌ tsa' c'oti jini x'ixic ba'an jini rey, tsi' ñocchoco i bʌ ti' tojlel. Tsi' yʌlʌ: C rey, a wocolic p'untañon, che'en.

⁵Jini rey tsi' c'ajtibe: ¿Chuqui a wom? che'en. Jini x'ixic tsi' yʌlʌ: Joñon meba'onix. Anix ora tsa' chʌmi c ñoxi'al. Añob cha'tiquil calobilob. Tsa' majliyob ti paxyal ti cholel. Tsa' cajiyob ti leto. Come i bajñelob, ma'anic majqui tsi' tiq'uiyob. Juntiquil tsi' tsʌnsa i yeran.

⁷Awilan, pejtelel c pi'ʌlob woli' wersa subeñoñob cha'an mi cʌc' ti tsʌnsʌntel jini tsa' bʌ i tsʌnsa i yeran. Mi tsa' ujti bajche' jini, mij cʌytʌl tic bajñelil. Che' jini muq'uix i ñajʌyel i c'aba' c ñoxi'al. Che' tsi' yʌlʌ jini x'ixic.

⁸Jini rey tsi' sube: Cucux ti sujtel ti a wotot. Muq'uix caj c mel pejtelel chuqui tsa' subeyon, che'en.

⁹Jini x'ixic tsi' sube: Wocolix a wʌlʌ, c rey. Pejtelel jini mulil la' ajnic tic wenta quic'ot c pi'ʌlob. Mach yomic mi' wis ajñel jini mulil ti a wenta, che'en.

¹⁰Jini rey tsi' sube: Mi an majqui mi' chʌn cajel ti t'an ti a contra, yom ma' pʌybeñon tilel ilayi. Ma'anix chuqui mi caj i tumbeñet, che'en.

¹¹Pero mach jasʌlic tsi' yubi jini x'ixic. Tsi' chʌn cha'le t'an: Ti wocol t'an mic subeñet, c rey, c'ajtibeñon i yutslel lac Yum Dios. Mach yomix mi' chʌn tic'lʌntel jini calobil cha'an i q'uexol tsa' bʌ i mele, che'en. Jini rey tsi' jac'ʌ: Melelʌch come cuxul lac Yum, ma'anic mi caj i yajlel mi junt'ujmic i tsutsel i jol, che'en.

¹²Jini x'ixic tsi' yʌlʌ: Awocolic, c rey, com to c subeñet yambʌ jump'ejl t'an, che'en. Jini rey tsi' yʌlʌ: Subu, che'en.

¹³Jini x'ixic tsi' yʌlʌ: ¿Chucoch mach che'ic ma' coltan pejtelel i winicob Dios? Che' bʌ tsa' wʌc'ʌ a t'an tic tojlel, tsa' bajñel tsictesa a mul, come ma'anic wola' cha' pʌy tilel jini puts'em bʌ a walobil.

¹⁴Isujm wersa mi lac chʌmel ti lac pejtelel. Lajalonla bajche' ja' mu' bʌ i yajlel ti lum, mach bʌ mejlix ti cha' lujchel. Mi ma'anic ma' bʌc' pʌy tilel Absalón, mux i junyajlel sajtel ti a tojlel. Pero Dios mi' sajcan majlel jini sajtemo' bʌ.

¹⁵Jini cha'an tsa' tili c subeñet pejtelel jini t'an, come c pi'ʌlob tsi' bʌc'tesayoñob. Jini cha'an tsac ña'ta tilel c pejcan jini rey. “Tic'ʌl mi muq'uix i jac'beñon c t'an”, cho'on tic pusic'al.

¹⁶Tsac ña'ta ja'el isujm muq'uix cajel a coltañon loq'uel ti' p'ʌtʌlel jini yomo' bʌ i jisañon quic'ot calobil ti' tojlel Israel i tejclum Dios.

¹⁷Jini cha'an mic subeñet, c yum, cha'an yom ma' wʌc' a t'an cha'an mi' cha' tilel i ñuclel c pusic'al, come reyet wʌle. Lajalet bajche' juntiquil i yángel Dios mu' bʌ mejlel i ña'tan chuqui wen yic'ot chuqui jontol. Jini cha'an la' ajnic a wic'ot lac Yum Dios. Che' tsi' yʌlʌ jini x'ixic.

¹⁸David tsi' sube jini x'ixic: Mach comic ma' wis mucbeñon mi ts'ita'ic jini mu' bʌ cajel j c'ajtibeñet, che'en. Jini x'ixic tsi' jac'ʌ: Muq'uix c laj subeñet, c rey, che'en.

¹⁹Jini rey tsi' c'ajtibe: ¿Mach ba jinic Joab tsa' bʌ i subeyet tilel ilayi? che'en. Jini x'ixic tsi' jac'be: Jincuyi. Isujm che' bajche' tsa' subeyon c rey. Joab tsi' chocoyon tilel. Tsi' laj cʌntesayon bajche' yom mic subeñet.

²⁰Jini cha'an tsi' chocoyon tilel a winic Joab cha'an mi' q'uextʌyel a pusic'al. Cabʌl a ña'tʌbal che' bajche' juntiquil i yángel Dios. Wen a wujil chuqui an ti pañimil. Che' tsi' yʌlʌ jini x'ixic.

²¹Jini rey tsi' choco ti pʌyol Joab. Tsi' sube: Wʌle tsa'ix c ña'ta bajche' yom mic mel. Cucu, cha' pʌyʌ tilel Absalón, che'en.

²²Joab tsi' ñocchoco i bʌ ti' tojlel rey. Tsi' yʌq'ue i yutslel i t'an. Joab tsi' yʌlʌ: Wʌle cujilix tsa'ix c taja i yutslel a pusic'al, c yum rey, come tsa'ix a melbeyon chuqui tsaj c'ajtibeyet, che'en.

²³Ti ora tsa' majli Joab ti Gesur cha'an mi' pʌy tilel Absalón ti Jerusalén.

²⁴Pero jini rey tsi' yʌlʌ: Che' mi' julel calobil, la' majlic ti' yotot. Mach comic mi' tilel i q'uelon, che'en. Jini cha'an che' bʌ tsa' c'oti Absalón, toj jach tsa' majli ti' yotot. Ma'anic tsa' majli ba'an jini rey.

²⁵Ti jim bʌ ora ma'anic yambʌ winic ti Jerusalén wen i t'ojol bʌ bajche' Absalón, come c'ʌlʌl ti' xin jol, c'ʌlʌl ti' mal i yoc, ma'anic chuqui wis leco.

²⁶Junyajl ti jujump'ejl jab tsi' yʌc'ʌ ti loq'uel i jol, come tsa' wen tam'a. An i yalel i tsutsel i jol che' bajche' ojlil i cha'p'ejl kilo.

²⁷Tsi' yila pañimil uxtiquil ch'iton bʌ i yalobil Absalón yic'ot juntiquil xch'oc i c'aba' Tamar. Che' colemix wen i t'ojol jax.

²⁸Cha'p'ejl jab ya'an Absalón ti Jerusalén. Ma'anic tsi' wis q'uelbe i wut jini rey.

²⁹Jini cha'an Absalón tsi' pʌyʌ tilel Joab cha'an mi' majlel i pejcan jini rey, pero Joab ma'anic tsi' jac'ʌ tilel ti' yotot Absalón. Ti' cha'yajlel tsi' cha' pʌyʌ, pero ma'anic tsi' wis jac'ʌ majlel Joab.

³⁰Che' jini Absalón tsi' sube jini x'e'telob i cha'an: Cucula ti' jamil Joab ya' ba' pʌc'bil i cebada. Yom mi la' majlel la' wotsʌben c'ajc, che'en. Jini cha'an tsa' majliyob i winicob Absalón i yotsan c'ajc.

³¹Che' bʌ tsi' q'uele Joab pulemix i jamil, tsa' tili i pejcan Absalón. Tsi' sube: ¿Chucoch tsi' puluyob c jamil a winicob? che'en.

³²Absalón tsi' jac'be: Come anix cha'yajl uxyajl tsac pʌyʌyet tilel cha'an mic choquet majlel ba'an rey, pero ma'anic tsa' jac'ʌ. Cucu c'ajtiben chucoch tsi' to'o chocoyon ti pʌyol ti Gesur. Come ñumen uts'at tsa'ic cʌleyon ti Gesur. Lolom jach mic to'ol ajñel ilayi ba' ma'anic mij q'uelben i wut rey. Mi añʌch c mul, la' i tsʌnsañon, che'en.

³³Joab tsa' majli i suben jini rey chuqui tsa' ujti. David tsi' choco ti pʌyol Absalón. Che' bʌ tsa' c'oti Absalón ba'an jini rey, tsi' ñocchoco i bʌ. David tsi' ts'ujts'u Absalón.