Read Chol 2 Samuel 24 Bible Online

2 Samuel 24 - Chol bible

2 Samuel 24

¹Tsa' cha' caji ti mich' lac Yum yic'ot pejtelel israelob. Tsi' ña'ta i yʌq'ueñob wocol. Tsi' yotsa ti' pusic'al David cha'an mi' choc ñumel x'e'telob i cha'an, cha'an mi' melob censo ti tejclum tac.

²Jini cha'an jini rey tsi' sube Joab yic'ot jini soldadojob ñuco' bʌ i ye'tel cha'an mi' ñumelob ti pejtelel i lumal Israel c'ʌlʌl ti Dan c'ʌlʌl ti Beerseba, cha'an mi' q'uelob jaytiquilob jini winicob cha'an yom i ña'tan David.

³Joab tsi' jac'be jini rey: La' i p'ojlesan lac Yum Dios i yonlel a winicob ti jo'jo'c'al che' bajche' añonla che' cuxulet to, pero ¿chucoch wersa a wom ili censo? che'en.

⁴Pero tsa' wersa chojqui majlel Joab yic'ot jini ñuc taco' bʌ i ye'tel cha'an mi' tsicob jini winicob. Tsa' loq'uiyob ti' tojlel jini rey.

⁵Che' bʌ tsa' c'axiyob ya' ti Jordán ja', tsa' c'oti i techob i tsicol winicob ya' ti joctʌl i c'aba' Aroer. Tsa' majliyob ti Gad yic'ot ti Jazer.

⁶Che' bʌ tsa' ujti ya'i, tsa majliyob ti Galaad yic'ot ti tejclum i c'aba' Hodsi. Tsa' ñumiyob ya' ti Danjaán yic'ot ti' joytʌlel Sidón.

⁷Tsa' majliyob ti Tiro jini ts'ajquibil bʌ tejclum. Tsa' ñumiyob ba'an pejtelel i lumalob jini heveojob yic'ot jini cananeojob. Che' jini tsa' c'otiyob c'ʌlʌl ti Neguev ti Judá c'ʌlʌl ti Beerseba.

⁸Che' ujtemobix ti laj ñumel ya' ti tejclum tac, tsa' cha' sujtiyob ti Jerusalén. Bolomp'ejl uw yic'ot junc'al q'uin tsi' xʌñʌyob ti pejtelel jini tejclum tac.

⁹Joab tsa' c'oti i yʌq'uen jini rey i juñilel jini winicob tsa' bʌ chujquiyob ti censo. Ti pejtelel Israel añob cha'bajc' mil (800,000) winicob ch'ejlo' bʌ cha'an guerra. Jini año' bʌ ti Judá añob jo'c'al i cha'bajc' mil (500,000) winicob ti pejtelelob.

¹⁰Che' bʌ tsa'ix ujti i tsicob jini winicob, David tsa' caji' ña'tan i mul. Tsi' sube lac Yum: C Yum tsa'ix c taja c mul ti a tojlel. Leco chuqui tsac mele. Ti wocol t'an mij c'ajtibeñet cha'an ma' ñusʌbeñon c mul, come tsa'ix c lon ñusa a t'an, che'en.

¹¹Che' bʌ tejchemix ch'ojyel ti wʌyel David che' ti sʌc'ajel, tsa' tili i t'an lac Yum ba'an jini x'alt'an Gad, jini am bʌ i ña'tʌbal ti' tojlel David. Tsa' subenti:

¹²Cucu suben David: “Che'ʌch woli' yʌl lac Yum: An uxchajp jini wocol woli bʌ cʌc'. Wersa mi caj a yajcan junchajp cha'an mic chocbeñet tilel”, che'en.

¹³Jini cha'an Gad tsa' tili ba'an David cha'an mi' suben jini t'an. Tsi' sube: ¿A wom ba mi' tilel wi'ñal wucp'ejl jab ila ti lac lumal? ¿A wom ba puts'el uxp'ejl uw ti' tojlel a contrajob mu' bʌ i contrajiñetob? ¿A wom ba mi' yujtel chʌmel uxp'ejl q'uin ti lac lumal? Yom ma' wen ña'tan bajche' yom, cha'an mic cha' suben lac Yum tsa' bʌ i chocoyon tilel, che'en Gad.

¹⁴David tsi' jac'be Gad: Wen cabʌl jax wolic mel c pusic'al. La' i yʌq'ueñonla wocol lac Yum come cabʌlʌch i c'uxbiya. Pero mach yomic mic yajlel ti' p'ʌtʌlel j contrajob, che'en.

¹⁵Che' jini lac Yum tsi' choco tilel c'amʌjel tsa' bʌ i tsʌnsa israelob. Tsa' tejchi ti sʌc'ajel. Tsa' jal'a uxp'ejl q'uin. Tsa' chʌmiyob lujump'ejl i chʌnc'al mil (70,000) winicob ti Dan c'ʌlʌl ti Beerseba.

¹⁶Che' bʌ tsi' chajpa i bʌ jini ángel cha'an mi' jisan jini año' bʌ ti Jerusalén, lac Yum tsi' cha' mele i pusic'al. Tsi' sube jini ángel: Jasʌlix wʌle. Cʌyʌx a jisan jini winicob, che'en. Awilan ya'ix wa'al jini ángel i cha'an lac Yum ti patio ba' mi' jajts'el trigo. Jini patio i cha'añʌch Arauna jini jebuseo.

¹⁷David tsi' q'uele jini ángel. Tsi' sube lac Yum: Tsac cha'le mulil joñon, pero ili tiñʌme'ob, ¿chuqui tsi' meleyob? Yom ma' jisañon quic'ot c pi'ʌlob, che'en David.

¹⁸Gad tsa' tili ba'an David ti jini jach bʌ q'uin cha'an mi' suben: Yom ma' majlel cha'an ma' ts'ʌlben letsel i pulʌntib lac Yum ya' ti patio i cha'an bʌ Arauna jini jebuseo, ya' ba' mi' jajts'el trigo, che'en.

¹⁹Jini cha'an tsa' majli David cha'an mi' mele' che' bajche' tsi' sube lac Yum.

²⁰Che' bʌ tsi' q'uele Arauna, ya'ix woli' tilel jini rey yic'ot pejtelel jini x'e'telob i cha'an, tsa' tili i tajob. Tsi' pʌcchoco i bʌ ti lum ti' tojel jini rey.

²¹Arauna tsi' sube jini rey: ¿Chucoch tsa' tiliyet? che'en. David tsi' jac'be: Tsa' tili c mʌn a patio ba' ma' jats' jini trigo cha'an com c melben lac Yum jump'ejl pulʌntib, cha'an mi' lajmel jini c'amʌjel woli' bʌ i tsʌnsan winicob, che'en.

²²Arauna tsi' sube David: Yom ma' c'ʌn pejtelel chuqui tac a wom am bʌ tic wenta. Wʌ'an wacax cha'an mi' pulel, yic'ot ja'el jini te' am bʌ i c'ʌjñibal cha'an mic jats' trigo yic'ot cha'an mic top' lum. Yom ma' lu' ch'ʌm cha'an i si'il jini majtañʌl, che'en.

²³Muq'uix cʌq'ueñet pejtelel iliyi. La' i q'uel jini majtañʌl ti uts'at lac Yum Dios, che'en.

²⁴Pero jini rey tsi' sube Arauna: Ma'anic mic ch'ʌm ti che jach che' bajche' c majtan. Muq'uix c tojbeñet, come mach comic c pulben i majtan lac Yum Dios mach bʌ anic i tojol, che'en. Jini cha'an David tsi' tojo jini patio yic'ot jini tat wacax. Tsi' tojo lujump'ejl i yuxc'al (50) plata.

²⁵Che' jini David tsi' wa'chocobe i pulʌntib lac Yum. Tsi' pulbe i majtan tac lac Yum. Tsi' yʌq'ue majtañʌl ja'el cha'an mi' yuts'esʌben i pusic'al. Che' jini tsa' lajmi jini c'amʌjel woli bʌ i tsʌnsañob.