Read Chol 2 Samuel 5 Bible Online

2 Samuel 5 - Chol bible

2 Samuel 5

¹Tsa' c'oti i pejcañob David ya' ti Hebrón pejtelel israelob ti mojt ti mojt. Tsi' yʌlʌyob: Wʌ' añon lojon. Junsujm jach c bʌc'tal lojon yic'ot a bʌc'tal. Junsujm jach c bʌquel lojon yic'ot a bʌquel.

²Come ti yambʌ ora che' woli to i cha'len yumʌl Saúl tic tojlel lojon, jatet tsa' majliyet ti guerra yic'ot soldadojob. Tsa' cha' sujtiyob a wic'ot. Mach jinic jach, pero lac Yum tsi' subeyet ja'el: “Yom ma' cʌntʌbeñon c tejclum Israel. Mux caj a cha'len ñuc bʌ yumʌl ti' tojlelob”, che'en lac Yum. Che' tsi' yʌlʌyob israelob.

³Che' jini tsa' c'otiyob ti Hebrón pejtelel jini xñoxob. Jini rey David tsi' laja i t'an yic'otob ti' wut lac Yum. Tsi' wa'chocoyob David ti rey ti' tojlel israelob.

⁴Anix lujump'ejl i cha'c'al i jabilel David che' bʌ tsa' caji i tech i yumʌntel. Cha'c'al jab tsi' cha'le i yumʌntel.

⁵Ojlil i waxʌcp'ejl jab tsi' cha'le i yumʌntel ti Hebrón ti' tojlel año' bʌ ti Judá. Uxlujump'ejl i cha'c'al (33) jab tsi' cha'le i yumʌntel ti Jerusalén ti' tojlel pejtel Israel yic'ot Judá.

⁶Tsa' majli ti guerra jini rey David yic'ot i winicob ti contra Jerusalén ba' chumulob jini jebuseojob. Come jini jebuseojob tsi' subeyob David: Mach mejlic a wochel ilayi, come jini xpots' yic'ot mach bʌ weñobic i yoc mi caj i choquetob loq'uel, che'ob. Tsi' lon ña'tayob mach mejlic ti ochel David.

⁷Pero David tsi' subeyob i soldadojob: Cucula ti letsel ti' bej yoc ja' c'ʌlʌl mi la' c'otel ti tejclum. Yom mi la' tsʌnsan jini xpots' bʌ yic'ot mach bʌ weñobic i yoc. Muc' abi i choquetla loq'uel, che'en. Che' jini David tsi' ch'ʌmʌ jini wen melbil bʌ tejclum i c'aba' Sion. Jiñʌch i tejclum David. Jini cha'an mi la cʌl: Jini xpots'ob yic'ot mach bʌ weñobic i yoc mi' mʌjlelob i cha'an, cho'onla.

⁹Jini cha'an David tsa' caji ti chumtʌl ti jini wen melbil bʌ tejclum. Tsi' yotsʌbe i c'aba' I Tejclum David. Tsi' ts'ajqui wen tac bʌ otot c'ʌlʌl ti Milo c'ʌlʌl ti' yojlil tejclum.

¹⁰Che' jini tsa' utsi p'ojli i p'ʌtʌlel David. Jini lac Yum Dios, jini Yumʌl ti Panchan yic'ot ti Pañimil, an yic'ot David.

¹¹Hiram i rey jini año' bʌ ti Tiro, tsi' choco majlel x'ac' juñob ba'an David. Tsi' choco majlel ch'ujte', yic'ot xjuc' te'ob yujilo' bʌ i melol otot, yic'ot yujilo' bʌ i ts'ajquintel otot, cha'an mi' melbeñob i yotot David.

¹²Jini cha'an David tsi' ña'ta isujm lac Yum tsi' wa'choco ti rey. Tsi' ñuq'uesʌbe i yumʌntel come c'ux tsi' yubi Israel, jini tejclum yajcʌbil bʌ i cha'an.

¹³Che' bʌ tsa' loq'ui David ti Hebrón cha'an mi' chumtʌl ti Jerusalén, tsa' to i cha' pʌyʌ yan tac bʌ i yijñam David. Tsi' yila pañimil ch'iton bʌ yic'ot xch'oc bʌ i yalobilob.

¹⁴Jiñʌch i c'aba' i yalobilob tsa' bʌ i yilayob pañimil ti Jerusalén: Samúa, Sobab, Natán, Salomón,

¹⁵Ibhar, Elisúa, Nefeg, Jafía,

¹⁶Elisama, Eliada yic'ot Elifelet.

¹⁷Che' bʌ tsi' yubiyob filisteojob wa'chocobilix David ti rey ti' tojlel israelob, tsa' caji i contrajiñob David yic'ot pejtelel i soldadojob. Che' bʌ tsi' yubi David, ti ora tsa' majli ba' wen ts'ajquibil.

¹⁸Tsa' tiliyob jini filisteojob. Tsa' pam jijliyob ti joctʌl i c'aba' Refaim.

¹⁹David tsi' pejca lac Yum: ¿Yom ba mic majlel c cha'len guerra ti' contra filisteojob? ¿Mu ba caj a wʌc'ob tij c'ʌb? che'en. Lac Yum tsi' sube David: Cucu come ti isujm mi caj c'ʌc' jini filisteojob ti a c'ʌb, che'en.

²⁰Che' jini tsa' majli David ba'an Baal Perazim. Ya'i tsi' mʌlʌ David. Tsi' yʌlʌ: Lac Yum tsa'ix i jisʌbeyon j contrajob ti' tojel c wut che' bajche' but'ja' mu' bʌ i pajmel loq'uel ti' ti' pa', che'en. Jini cha'an tsa' otsʌbenti i c'aba' Baal Perazim.

²¹Ya' tsi' cʌyʌyob i dioste'ob. David yic'ot i soldadojob tsi' laj puluyob.

²²Pero tsa' cha' tiliyob ti guerra jini filisteojob. Tsa' cha' ochiyob ti joctʌl i c'aba' Refaim.

²³David tsi' cha' c'ajtibe lac Yum. Lac Yum tsi' yʌlʌ: Mach yomic ma' letsel majlel. Yom mi la' joy mʌctañob ti' pat ya' ti' tojel jini bálsama te'.

²⁴Che' ma' wubin t'an che' bajche' xʌmbal ti' pam jini bálsama te', ti jim bʌ ora yom ma' cha'len wersa, come che' jini loq'uemonix ti' tojel a wut cha'an mic jisan jini filisteojob. Che' tsi' yʌlʌ lac Yum.

²⁵Che'ʌch tsi' mele David che' bajche' tsi' sube lac Yum. Tsi' laj jisa jini filisteojob c'ʌlʌl ti Geba, c'ʌlʌl ba' mi la cochel ti Gezer.