Read Chol 2 Samuel 6 Bible Online

2 Samuel 6 - Chol bible

2 Samuel 6

¹David tsi' cha' much'qui pejtel jini yajcʌbilo' bʌ ti' tojlel israelob, lujuntiquil i cha'c'al mil (30,000) winicob.

²Tsi' teche xʌmbal yic'ot pejtelel jini yajcʌbilo' bʌ winicob ti Israel. Tsa' majliyob ti Baala ti Judá cha'an mi' ch'ʌmob tilel jini Arca i cha'an lac Yum. Jiñʌch Arca* ba' mi' tsictiyel i c'aba' lac Yum, i Yum Panchan yic'ot Pañimil, buchul bʌ ti' yumʌntel ti' tojlel jini querubiñob.

³Tsi' c'ʌcchocoyob jini Arca ti' pam jump'ejl tsiji' bʌ carreta. Tsi' ch'ʌmʌyob loq'uel ti' yotot Abinadab, ya' ti bujtʌl. Uza yic'ot Ahío i yalobilob Abinadab woli' toj'esañob majlel jini carreta ba' c'ʌcʌl jini Arca i cha'an Dios.

⁴Che' bʌ tsi' cʌyʌyob i yotot Abinadab am bʌ ti bujtʌl, Ahío tsa' majli ti ñaxan ti' tojel jini Arca.

⁵David yic'ot pejtelel israelob woliyob ti son ti' tojlel lac Yum cha'an mi' ch'ujutesañob yic'ot c'ay, yic'ot arpa, yic'ot salterio, yic'ot pandero, yic'ot flauta, yic'ot címbalo.

⁶Pero che' bʌ tsa' c'otiyob ba' mi' jats'ob trigo ti' lum Nacón, jini wacax tsi' p'ojqui i yoc. Colel i yajlel. Jini cha'an Uza tsi' sʌts'ʌ i c'ʌb ya' ba'an i yArca lac Yum. Tsʌts tsi' chucu.

⁷Che' jini tsa' bʌc' c'oti i mich'lel lac Yum ti' tojlel Uza. Ti ora jach tsa' chʌmi ya' ti' t'ejl jini Arca.

⁸Che' jini tsa' mich'a David che' bʌ tsi' tsʌnsa Uza lac Yum. Jini cha'an tsa' otsʌbenti i c'aba' jini ajñibʌl Pérezuza. Che'ʌch i c'aba' c'ʌlʌl wʌle.

⁹Ti jim bʌ q'uin David tsa' caji i wen bʌc'ñan lac Yum. Tsi' yʌlʌ: ¿Bajche' mi mejlel i tilel tic tojlel jini Arca i cha'an lac Yum? che'en.

¹⁰Mach chʌn yomix i ch'ʌm tilel jini Arca ya' ti Jerusalén. Jini cha'an tsi' xoyoyob i bijlel. Tsa' majliyob ti' yotot Obed Edom jini geteo.

¹¹Ya' tsa' cʌle jini Arca i cha'an lac Yum ti' yotot Obed Edom jini geteo uxp'ejl uw. Lac Yum tsi' wen colta Obed Edom yic'ot pejtelel año' bʌ ti' yotot.

¹²An majqui tsi' sube David: Lac Yum woli' wen coltan jini año' bʌ ti' yotot Obed Edom yic'ot pejtelel chuqui tac an i cha'an, cha'an ti' caj jini Arca i cha'an Dios, che'en. Jini cha'an tsa' majli David ti' tijicñʌyel i pusic'al cha'an mi' loc'san ti' yotot Obed Edom, cha'an mi' cha' ch'ʌm tilel ti Jerusalén.

¹³Che' an jax to wʌcxajc tsi' yʌc'ʌyob i yoc jini woli bʌ i q'uechob majlel jini Arca, tsa' wa'leyob ti bij. David tsa' caj i tsʌnsʌben i majtan lac Yum, juncojt tat wacax yic'ot tat tiñʌme'.

¹⁴David tsi' chʌn cha'le tijp'ejl ti' tijicñʌyel i pusic'al ti' tojlel lac Yum, lʌpbil i cha'an jump'ejl bujcʌl lino bʌ pisil.

¹⁵Tijicñayob i pusic'al tsi' cha' ch'ʌmʌyob sujtel jini Arca i cha'an lac Yum. Tsi' wusuyob majlel trompeta tac, tsi' cha'leyob c'ay.

¹⁶Che' bʌ woli' c'otel ti Jerusalén jini Arca i cha'an lac Yum, ya' wa'al Mical i yixic'al Saúl ti ventana. Tsi' q'uele che' woli ti ñuqui tijp'el David ti' tojlel lac Yum. Mical i yijñam David tsi' mucu ts'a'le i ñoxi'al ti' pusic'al.

¹⁷Che' jini tsi' yotsayob jini Arca i cha'an lac Yum ya' ti' yojlil i mal Tabernáculo. David tsi' wa'choco. Tsi' pulbe tsʌnsʌbil bʌ i majtan* lac Yum.

¹⁸Che' bʌ ujtemix i yʌq'uen pulbil bʌ i majtan lac Yum, David tsi' yʌq'ue i yutslel i t'an pejtelel winicob ti' c'aba' lac Yum.

¹⁹Tsa' caji i pucbeñob waj yic'ot we'elʌl, yic'ot tiquin bʌ ts'usub jini israelob. Che' ujtemix ti pejtelel, jini winicob x'ixicob tsa' sujtiyob majlel ti' yotot ti jujuntiquilob.

²⁰Tsa' sujti majlel David ti' yotot cha'an mi' yʌc' i yutslel i t'an. Pero Mical tsa' tili i taj David. Tsi' yʌlʌ: ¿I t'ojol ba chuqui tsa' mele sajmʌl? ¿Che' ba yom mi' mel i rey israelob? Che' bʌ tsa' jocho a pislel ti' wut jini xch'ocob, tsa' pʌsʌ a bʌ bajche' tonto bʌ winic, che'en.

²¹David tsi' jac'be Mical: Che'ʌch tsac cha'le ti' tojlel lac Yum tsa' bʌ i yajcayon che' cuxul to a tat yic'ot pejtelel i pi'ʌlob. Tsi' yʌq'ueyon c yumʌntel ti' tojlel Israel i tejclum lac Yum. Jini cha'an yom tijicña mic pʌs c bʌ ti' tojlel lac Yum.

²²Tijicñayon che' mi cʌc' ti ñuc lac Yum anquese ts'a'lebilon. Mach ñuquic mij q'uel c bʌ, pero jini xch'ocob woli bʌ a taj ti a t'an mi caj i q'ueloñob ti ñuc, che'en.

²³Mical i yixic'al Saúl ma'anic i yalobil. Jochol tsa' cʌle c'ʌlʌl tsa' chʌmi.