Read Chol 2 Samuel 9 Bible Online

2 Samuel 9 - Chol bible

2 Samuel 9

¹David tsi' yʌlʌ: ¿Anto ba majqui tsa' cʌle ti' yotot Saúl cha'an mi cʌq'uen i yutslel c pusic'al ti' q'uexol Jonatán? che'en.

²An juntiquil xq'uel e'tel ti' yotot Saúl i c'aba' Siba. Tsa' pʌjyi tilel ba'an David. Jini rey tsi' c'ajtibe: ¿Jatet ba Siba? che'en. Tsi' jac'be: Joñon cu, che'en.

³Jini rey tsi' c'ajtibe: ¿Cuxul to ba juntiquil i pi'ʌl Saúl cha'an mic pʌsben i yutslel c pusic'al che' bajche' Dios woli' pʌsbeñon? che'en. Siba tsi' jac'be: Cuxul cu juntiquil i yalobil Jonatán mach bʌ wenic i yoc, che'en.

⁴Jini rey tsi' c'ajtibe: ¿Baqui an? che'en. Siba tsi' jac'be: Ya'an ti' yotot Maquir (i yalobil Amiel am bʌ ti Lodebar), che'en.

⁵Jini cha'an jini rey David tsi' choco ti pʌyol ti' yotot Maquir.

⁶Tsa' c'oti Mefiboset (i yalobil Jonatán i yalobil bʌ Saúl) ba'an David. Tsi' pʌcchoco i bʌ, pero David tsi' sube: Mefiboset, che'en. Tsi' jac'ʌ: Wʌ' añon a winicon, che'en.

⁷David tsi' sube: Mach a cha'len bʌq'uen, come ti isujm mi caj c pʌsbeñet i yutslel c pusic'al cha'an tsaj c'uxbi a tat, Jonatán. Mi caj c cha' sutq'uibeñet pejtelel i lumal a tatuch Saúl. Mi caj a cha'len we'el quic'ot tic mesa ti pejtelel ora, che'en.

⁸Mefiboset tsi' cha' c'uchchoco i bʌ. Tsi' yʌlʌ: Cabʌl jax i yutslel a pusic'al tic tojlel anquese ma'anic j c'ʌjñibal. Lajalon bajche' chʌmen bʌ ts'i', pero wola' p'untañon, che'en.

⁹David tsi' pʌyʌ tilel Siba, i winic Saúl. Tsi' sube: Q'uele i yalobil a yum. Tsa'ix cʌq'ue pejtelel chuqui tac tsa' cʌle am bʌ ti' wenta Saúl ti yambʌ ora.

¹⁰Jatet yic'ot a walobilob yic'ot a winicob mi caj la' melben i ye'tel ti' chol. Mi caj la' mʌc'lan i yalobilob a yum ti pejtelel ora, pero Mefiboset mi caj i cha'len we'el quic'ot ti pejtelel ora, che'en. Ti jim bʌ ora an jo'lujuntiquil i yalobilob Siba yic'ot junc'al i winicob.

¹¹Siba tsi' sube: Ts'ʌcʌl mi cajel c mel che' bajche' tsa' wʌlʌ, che'en. Che' jini Mefiboset tsi' c'uxu waj ya' ti' mesa David che' bajche' i yalobilob rey.

¹²An juntiquil ch'iton bʌ i yalobil Mefiboset i c'aba' Micaía. Siba yic'ot pejtelel i pi'ʌlob año' bʌ ti' yotot tsa' ochiyob ti' winic Mefiboset.

¹³Ya' tsa' chumle Mefiboset ti Jerusalén, come tsi' c'uxu waj ti' mesa jini rey. Mach wenic i yoc ti cha'ts'ijtlel.