Read Chol 1 Reyob 11 Bible Online

1 Reyob 11 - Chol bible

1 Reyob 11

¹Salomón mach cojic jach tsi' pʌyʌ ti' yijñam i yalobil Faraón. Tsi' cha'le ñujpuñel yic'ot yaño' bʌ ch'oyolo' bʌ ti Moab, yic'ot ti Amón, yic'ot ti Edom, yic'ot ti Sidón, yic'ot ti Het,

²anquese tic'bil cha'an mi' pʌyob ti' yijñam jini ch'oyolo' bʌ ti yan tac bʌ lum. Come i tilel jini x'ixicob mi' subeñob i ñoxi'al cha'an mi' ch'ujutesan dioste' tac. Pero Salomón ma'anic tsi' jac'ʌ i tic'ol.

³An jo'lujunc'al i cha'bajc' (700) i yijñam Salomón ti pejtelelob. Che' ja'el an jo'lujunc'al (300) i majan ijñam. I yijñamob Salomón tsa' caji i socbeñob i pusic'al cha'an mi' cʌy lac Yum.

⁴Che' anix i jabilel Salomón, i yijñamob tsi' xiq'uiyob cha'an mi' ch'ujutesan i diosob. Ma'anic tsi' ñopo lac Yum Dios che' bajche' tsi' ñopo i tat David.

⁵Salomón tsi' ch'ujutesa Astoret jini x'ixic bʌ dios mu' bʌ i c'uxbiñob sidoñob, yic'ot Milcom, jini leco bʌ i dios amoñob.

⁶Che' jini mach tojic tsi' mele. Tsi' cʌyʌ lac Yum. Ma'anic tsi' tsajca che' bajche' David i tat.

⁷Tsi' melbe i yotlel dioste' i c'aba' Quemos ya' ti Olivo wits am bʌ ti' tojel Jerusalén. Jiñʌch leco bʌ i dios moabob. Tsi' melbe i yotlel Moloc, i dios amoñob.

⁸Tsi' mele ja'el pulʌntib tac ba' mi' pulob pom i yijñamob, ba' mi' tsʌnsʌbeñob i majtan tac i diosob.

⁹Lac Yum tsi' wen mich'le Salomón, come tsi' tʌts'ʌ loq'uel i bʌ ba'an lac Yum i Dios Israel. Cha'yajl tsi' wʌn sube cha'an ma'anic mi' ch'ujutesan yambʌ diosob. Pero ma'anic tsi' jac'ʌ i tic'ol.

¹¹Jini cha'an lac Yum tsi' sube Salomón: Tsa' ñusʌbeyon c mandar. Jini cha'an mi caj c chilbeñet a yumʌntel cha'an ti' caj a mul. Mi caj cʌq'uen juntiquil x'e'tel a cha'an.

¹²Cha'an i c'uxbintel a tat ma'anic mi caj c mel che' cuxulet to. Mi caj c chilben i yumʌntel a walobil. Mi caj j cʌyben a walobil junmojt israelob cha'an c'ux mi cubin David yic'ot Jerusalén, jini tejclum tsa' bʌ c yajca. Che' tsi' yʌlʌ lac Yum.

¹⁴Lac Yum tsi' yʌq'ue i p'ʌtʌlel Hadad cha'an mi' contrajin Salomón. Hadad i yalobilʌch jini rey ti Edom.

¹⁵Che' cuxul to David tsajni ti Edom yic'ot Joab cha'an mi' mucob jini soldadojob israelo' bʌ tsa' bʌ chʌmiyob ti guerra. Ti jim bʌ ora jini israelob tsa' yʌlʌ i laj jisañob jini winicob año' bʌ ti Edom.

¹⁶Tsa' cʌleyob jini soldadojob israelo' bʌ wʌcp'ejl uw che' bʌ tsi' jisayob jini winicob ti Edom.

¹⁷Pero cuxul tsa' cʌle Hadad yic'ot cha'tiquil uxtiquil año' bʌ i ye'tel tsa' bʌ puts'iyob. Jini año' bʌ i ye'tel tsi' pʌyʌyob majlel Hadad ti Egipto come alob to.

¹⁸Tsa' loq'uiyob ti Madián, tsa' c'otiyob ti Parán. Ya'i tsi' tajayob yaño' bʌ. Temel tsa' majliyob ti Egipto. Faraón tsi' yʌq'ueyob otot yic'ot i bʌl i ñʌc'.

¹⁹Hadad tsa' ajni ti jump'ejl i pusic'al yic'ot Faraón. Faraón tsi' yʌq'ue i mu' cha'an i yijñam. Jiñʌch i yijts'in Tahpenes i yijñam bʌ Faraón.

²⁰Tsa' tili ti pañimil ch'iton bʌ i yalobil i c'aba' Genubat. Tsa' caji ti colel ti' yotot Faraón yic'ot i yalobilob Faraón.

²¹Ya' ti Egipto Hadad tsa' caji i yubin chʌmenix David yic'ot Joab. Tsi' c'ajtibe wocol t'an Faraón cha'an mi' sujtel ti Edom.

²²Faraón tsi' c'ajtibe: ¿Chucoch a wom majlel? ¿Chuqui anto yom ilayi? che'en Faraón. Hadad tsi' jac'ʌ: Ma'anic chuqui anto yom. Che' jach com majlel ba'an c pi'ʌlob, che'en Hadad.

²³Dios tsa' caji i yʌq'uen i p'ʌtʌlel yambʌ i contra Salomón, i c'aba' Rezón (i yalobil Eliada) tsa' bʌ puts'i loq'uel ti' tojlel i yum. I yum jiñʌch Hadadezer rey ti Soba.

²⁴Rezón tsa' ochi ti' yum xujch'ob. Che' bʌ David tsi' jisa Soba, tsa' puts'iyob majlel ti Damasco. Ya'i tsi' yotsa i bʌ ti rey Rezón.

²⁵Ti pejtelel i jabilel Salomón, jini Rezón yic'ot Hadad tsi' contrajiyob, come tsi' ts'a'leyob israelob. Rezón tsi' cha'le yumʌl ti Siria.

²⁶Jeroboam (i yalobil Nabat) jiñʌch yambʌ i contra Salomón ch'oyol bʌ ti Sereda am bʌ ti Efraín. Meba' i ña' i c'aba' Zerúa.

²⁷Jeroboam tsa' caji i contrajin Salomón. Salomón tsi' wa'choco jini Milo i tejclum soldadojob. Tsi' cha' weñ'esa i ts'ajquil jini tejclum tsa' bʌ i mele David i tat. Tsi' yʌq'ue i ye'tel Jeroboam che' bʌ tsi' q'uele ch'ejl i pusic'al, cabʌl i ña'tʌbal. Tsi' yʌq'ue i ye'tel cha'an mi' q'uel x'e'telob, i p'olbalo' bʌ José, junmojt bʌ israelob.

²⁹Ti jump'ejl q'uin che' woli' loq'uel majlel ti Jerusalén Jeroboam, tsi' taja jini x'alt'an i c'aba' Ahías ch'oyol bʌ ti Silón, lʌpbil bʌ i cha'an tsiji' bʌ i bujc. Tsa' caji i pejcañob i bʌ ya' ti bij. I bajñel jach ya' añob.

³⁰Ahías tsi' wʌc' tsili i bujc lʌpbil bʌ i cha'an, lajchʌntsijl i bujc.

³¹Ahías tsi' sube Jeroboam: Ch'ʌmʌ lujuntsijl, come lac Yum i Dios Israel woli' yʌl: “Mi caj c chilben i yumʌntel Salomón. Mi caj cʌq'ueñet lujunmojt israelob.

³²Junmojt jach mi caj i cʌytʌl ti' wenta Salomón cha'an ti' caj David yic'ot Jerusalén. Come tsac yajca Jerusalén ti' tojlel pejtelel Israel.

³³Che'ʌch mic mel cha'an tsi' cʌyʌyon Salomón. Tsi' ch'ujutesa Astoret, jini x'ixic bʌ dios i cha'an sidoñajob, yic'ot Quemos i dios moabob, yic'ot Milcom i dios amoñob. Ma'anic tsi' jac'ʌ c mandar. Ma'anic woli' mel chuqui toj tic wut. Ma'anic woli' jac'beñon c t'an che' bajche' David i tat.

³⁴Pero ma'anic mi caj c chilben i yumʌntel che' cuxul to cha'an ti' caj mij c'uxbin c winic David tsa' bʌ c yajca, come tsi' jac'beyon c t'an yic'ot c mandar.

³⁵Che' woli ti yumʌntel i yalobil, mi caj c chilben lujunmojt israelob. Mi caj cʌq'ueñet.

³⁶Mi caj cʌq'uen junmojt israelob cha'an c'ux mi cubin c winic David tsa' bʌ c yajca. Jini cha'an ma'anic mi caj i yajpel i c'ʌc'al David ya' ba' tsa cʌc'ʌ j c'aba' ti Jerusalén.

³⁷Mi caj c wa'chocoñet ti rey ti' tojlel israelob.

³⁸Mi xuc'ul ma' jac' pejtel c mandar cha'an ma' mel chuqui uts'at tic wut che' bajche' tsi' mele c winic David, che' jini mi caj cajñel a wic'ot. Mi caj cʌq'ueñob i yumʌntel a walobilob ti' tojlel Israel ti pejtelel ora che' bajche' tsac sube David.

³⁹Pero mi caj c poj peq'uesan i p'olbal David cha'an ti' caj i mul Salomón, pero mach ti pejtelelic ora”, che'en lac Yum Dios. Che' tsi' yʌlʌ jini x'alt'an Ahías.

⁴⁰Che' bʌ tsi' ña'ta Salomón tsi' ñopo i tsʌnsan Jeroboam, pero tsa' puts'i ba'an Sisac jini rey am bʌ ti Egipto. Ya' tsa' jal'a jinto tsa' chʌmi Salomón.

⁴¹An i juñilel Salomón ba' ts'ijbubil pejtel i melbal yic'ot pejtel i subal mu' bʌ i tsictesan i ña'tʌbal.

⁴²Cha'c'al jab tsi' cha'le yumʌl Salomón ya' ti Jerusalén ti' tojlel pejtelel israelob.

⁴³Tsa' chʌmi che' bajche' i ñojte'elob. Tsa' mujqui ya' ti Jerusalén ti' tejclum David i tat. Che' jini tsa' caji i cha'len yumʌl Roboam i yalobil.