Read Chol 1 Reyob 13 Bible Online

1 Reyob 13 - Chol bible

1 Reyob 13

¹Che' ya' wa'al Jeroboam ti' t'ejl i pulʌntib wacax ba' woli' pulben pom, tsa' tili winic ch'oyol bʌ ti Judá, chocbil tilel ti Dios. Tsa' c'oti ti Betel.

²Cʌntesʌbil ti lac Yum tsi' cha'le t'an ti' contra jini pulʌntib. Tsi' yʌlʌ: Ubin i t'an lac Yum: “Mi caj i yilan pañimil juntiquil i p'olbal David i c'aba' Josías. Josías mi caj i yʌc' ti ili pulʌntib i bʌquel jini payxo motomajob mu' bʌ i pulob pom ilayi. Mi caj i pulben i bʌquel jini payxo bʌ motomajob ti ili pulʌntib”, che'en lac Yum. Che' tsi' yʌlʌ jini x'alt'an.

³Tsi' subu ja'el bajche' mi caj i ña'tañob mi tilem ti lac Yum ili t'an: “Mi caj i jajwel ili pulʌntib. Mi caj i pujquel majlel i tʌñil c'ajc am bʌ ti mal”, che'en. Che' tsi' yʌlʌ jini x'alt'an.

⁴Jini rey Jeroboam tsi' yubibe i t'an i winic Dios ti' contra jini pulʌntib am bʌ ti Betel. Jeroboam tsi' tuch'u jini x'alt'an. Tsi' yʌlʌ: Chucu jini winic, che'en. Ti ora jach tsa' tuch' señ'a i c'ʌb.

⁵Tsa' jajwi jini pulʌntib. Tsa' pam pujqui i tʌñil c'ajc am bʌ ti mal. Che'i tsa' ts'ʌctiyi i t'an i winic lac Yum che' bajche' tsi' yʌlʌ lac Yum.

⁶Jini rey tsi' c'ajtibe jini x'alt'an cha'an mi' pejcan i Dios cha'an mi' q'uejlel ti uts'at: Cha'len oración cha'an mi' cha' lajmel j c'ʌb, che'en. I winic Dios tsi' mele che' bajche' tsa' c'ajtibenti. Che' jini tsa' cha' lajmi i c'ʌb jini rey. Tsa' cha' ajni che' bajche' ti ñaxan.

⁷Jini rey tsi' sube i winic Dios: Conla ti cotot cha'an ma' c'ux waj quic'ot. Mi caj cʌq'ueñet a majtan, che'en.

⁸Pero i winic Dios tsi' jac'ʌ: Anquese mux a wʌq'ueñon ojlil a wotot, ma'anic mic majlel a wic'ot. Ma'anic mi caj c cha'len we'el uch'el ilayi.

⁹Come lac Yum tsi' tiq'uiyon ame anic chuqui mij c'ux mic jap ilayi. Tsi' subeyon ja'el cha'an mach ya'ic mic cha' sujtel ba' tsa' tiliyon. Che' tsi' yʌlʌ jini x'alt'an.

¹⁰Jini cha'an tsa' sujti majlel ti yambʌ bij, mach ya'ic ba' tsa' tili.

¹¹Ya' chumul ti Betel ñoxix bʌ x'alt'an. I yalobilob tsi' subeyob pejtel chuqui tsi' cha'le i winic Dios ya' ti Betel ti jim bʌ q'uin yic'ot pejtel chuqui tsi' sube rey jini x'alt'an.

¹²I tat tsi' c'ajtibeyob: ¿Baqui bʌ bij tsa' cha' sujti? che'en. Tsi' pʌsʌyob ti' c'ʌb ya' ba' tsa' majli i winic Dios tilem bʌ ti Judá.

¹³Jini ñoxix bʌ x'alt'an tsi' sube i yalobilob: Chajpʌbeñon jini burro, che'en. Tsi' chajpʌbeyob. C'ʌchʌl tsa' majli i taj i winic Dios ya' ba' woli' sujtel. Tsa' c'oti i taj ya' ba' buchul ti' yebal c'olol te'. Tsi' c'ajtibe: ¿I winiquet ba Dios tilemet bʌ ti Judá? che'en. Tsi' jac'ʌ: Joñon cu, che'en.

¹⁵Jini ñoxix bʌ x'alt'an tsi' sube: Conla ti cotot ti c'ux waj, che'en. Jini yambʌ tsi' jac'ʌ: Mach mejlicon come tic'bilon ti we'el uch'el ilayi. Jini cha'an ma'anic mic majlel awic'ot,

¹⁷come lac Yum tsi' subeyon: “Mach yomic ma' cha'len we'el uch'el ya'i. Mach yomic ma' cha' sujtel majlel ba' tsa' tiliyet”, che'en lac Yum. Che' tsi' yʌlʌ x'alt'an.

¹⁸Jini ñoxix bʌ winic tsi' sube: X'alt'añon ja'el che' bajche'et. Juntiquil i yángel lac Yum tsi' subeyon cha'an mic pʌyet ti cotot ti we'el uch'el, che'en.

¹⁹Jiñʌch lot pero jini winic ch'oyol bʌ ti Judá tsi' ñopo. Tsa' majli yic'ot. Tsi' cha'le we'el uch'el.

²⁰Che' buchulob to ti mesa, tsa' c'oti i t'an lac Yum ti' tojlel jini ñoxix bʌ x'alt'an.

²¹Ti c'am bʌ t'an tsi' sube i winic Dios tilem bʌ ti Judá: Jiñʌch i t'an lac Yum: “Tsa' ñusʌbe i t'an a Yum Dios. Ma'anic tsa' jac'be i mandar.

²²Come tsa'ix cha' sujtiyet tilel ti we'el uch'el wʌ' ba' tic'bilet. Jini cha'an ma'anic mi caj a mujquel ti a lumal ba' muculob a ñojte'elob”, che'en lac Yum. Che' tsi' yʌlʌ jini ñoxix bʌ x'alt'an.

²³Che' bʌ ujtemix ti we'el jini ñoxix bʌ x'alt'an, tsi' chajpʌbe i burro jini x'alt'an tsa' bʌ i jac'ʌ i pʌyol ti' yotot.

²⁴Che' woli' majlel ti bij i winic Dios, tsi' taja bajlum. Jini bajlum tsi' tsʌnsa. Tsa' chʌmi jini x'alt'an. Cotol jini burro yic'ot jini bajlum ti' t'ejl jini ch'ujlelʌl ya' ba' ñolol ti bij.

²⁵Cha'tiquil uxtiquil xñumelob tsa' c'oti i tajob ti bij. Ya' cotocña jini bajlum ti' t'ejl ch'ujlelʌl. Tsa' majli i subob ti tejclum ba' chumul jini ñoxix bʌ x'alt'an.

²⁶Jiñʌch tsa' bʌ i cha' pʌyʌ tilel ti' yotot. Che' bʌ tsi' yubi, tsi' yʌlʌ: Jiñʌch i winic Dios tsa' bʌ i ñusʌbe i t'an lac Yum. Lac Yum tsi' sube jini bajlum cha'an mi' tsʌnsan. Tsi' tsʌnsa cha'an mi' ts'ʌctiyel i t'an lac Yum, che'en jini ñoxix bʌ x'alt'an.

²⁷Tsi' sube i yalobilob cha'an mi' chajpʌbeñob i burro. C'ʌchʌl tsa' majli. Tsi' taja jini ch'ujlelʌl ti bij. Cotol jini burro yic'ot jini bajlum ti' t'ejl ch'ujlelʌl. Jini bajlum ma'anic tsi' c'uxu jini ch'ujlelʌl. Ma'anic tsi' tic'la burro ja'el.

²⁹Jini x'alt'an tsi' ch'uybe letsel i bʌc'tal i winic Dios. Tsi' yʌc'ʌ ti' pat burro cha'an mi' ch'ʌm majlel ti tejclum cha'an mi' yuc'tañob.

³⁰Tsi' mucu ya' ti mucoñibʌl i cha'an bʌ. Tsi' yuc'tayob. Tsi' yʌlʌyob: Mach cha'leyajix, quijts'in, quijts'in, che'ob.

³¹Che' jini tsi' mucuyob. Jini x'alt'an tsi' sube i yalobilob: Che' mic chʌmel, yom mi la' mucon wʌ' ba' mucul i winic Dios. Yom ma' wʌc' c bʌquel ti' t'ejl i bʌquel i winic Dios,

³²come mi caj i ts'ʌctiyel i t'an lac Yum tsa' bʌ ajli ti' contra jini pulʌntib am bʌ ti Betel, ti' contra jini bujbujtʌl ba' mi' ch'ujutesañob dioste' tac ti pejtelel tejclum ti Samaria. Che' tsi' yʌlʌ jini ñoxix bʌ x'alt'an.

³³Jeroboam ma'anic tsi' cʌyʌ i mel jontolil bajche' jach yom i pusic'al. Tsi' chʌn wa'choco motomajob loq'uemo' bʌ ti jujunmojt israelob cha'an mi' cha'leñob ch'ujutesaya ti bujbujtʌl. Tsa' ochiyob ti motomaj jini mach bʌ levíjobic.

³⁴Jini cha'an Dios tsi' jisa i p'olbal Jeroboam. Che' jini tsa' chilbenti i yumʌntel.