Read Chol 1 Reyob 14 Bible Online

1 Reyob 14 - Chol bible

1 Reyob 14

¹Tsa' c'am'a i yalobil Jeroboam i c'aba' Abías.

²Jeroboam tsi' sube i yijñam: Yʌñʌ a wut, lʌpʌ yambʌ a bujc cha'an ma'anic mi' cʌñetob winicob x'ixicob, cha'an ma'anic mi' tsictiyel mi quijñamet. Cucu ti Silo ba'an jini x'alt'an i c'aba' Ahías. Jiñʌch tsa' bʌ i subeyon mi caj cochel ti rey ti' tojlel israelob.

³Ch'ʌmʌ majlel lujunlʌjts pan yic'ot tiquin bʌ ts'usub yic'ot junwojl chab. Aq'uen jini x'alt'an. Jini mi caj i subeñet mi mu'to i c'oc'an la calobil. Che' tsi' yʌlʌ Jeroboam.

⁴Che'ʌch tsi' mele i yijñam Jeroboam. Tsa' majli ti' yotot Ahías ya' ti Silo. Ñoxix Ahías. Ma'anix mi' c'otel i wut.

⁵Lac Yum tsi' sube: Tal i yijñam Jeroboam cha'an mi' c'ajtibeñet mi mu'to i c'oc'an i yalobil come c'am, che'en lac Yum. Tsi' sube ja'el bajche' yom mi' jac'ben.

⁶Che' bʌ tsa' c'oti jini x'ixic yʌñʌl bʌ i wut yic'ot i pislel cha'an mach yomic i yʌc' i bʌ ti cʌjñel, Ahías tsi' yubi ya' ch'ojch'ojña tilel i yoc ti' ti' otot. Tsi' pejca: Ochen, i yijñam Jeroboam. ¿Chucoch tsa' yʌñʌ a bʌ? Mi caj c subeñet ch'ijiyem bʌ t'an.

⁷Cucu suben Jeroboam: “Jiñʌch i t'an lac Yum i Dios Israel: Tsac yajcayet ti' tojlel israelob. Tsac wa'chocoyet cha'an ma' cha'len yumʌl ti' tojlel c cha'año' bʌ.

⁸Tsac chilbe i yumʌntel i p'olbal David cha'an mi cʌq'ueñet. Pero ma'anic tsa' jac'beyon c mandar che' bajche' tsi' jac'ʌ c winic David. David tsi' tsajcayon ti pejtelel i pusic'al. Tsi' cha'le chuqui toj tic wut.

⁹Ñumen jontolet che' bajche' pejtel yumʌlob. Cʌlʌx jax c mich'ajel, come tsa' mele i yejtal dios tac. Tsa' ch'ujutesa. Tsa' cʌyʌyon.

¹⁰Jini cha'an mi caj cʌq'ueñob wocol año' bʌ ti' yotot Jeroboam. Mi caj c jisan pejtel ch'iton bʌ i yalobilob cha'an ma'anic mi' cʌytʌl mi juntiquilic. Mi caj c misun loq'uel ti Israel pejtel i cha'año' bʌ Jeroboam che' bajche' mi' misuntel loq'uel i ta' alʌc'ʌl.

¹¹Jini mu' bʌ i chʌmel ti mal tejclum mi caj i c'uxtʌl ti ts'i'. Jini mu' bʌ i chʌmel ti bij mi caj i c'uxtʌl ti xta'jol. Jiñʌch i t'an lac Yum.

¹²Cucux ti a wotot. Che' ma' wochel ti tejclum, mi caj i chʌmel a walobil.

¹³Mi caj i yuc'tañob pejtelel israelob. Mi caj i mucob. Pero cojach jini mi caj i mujquel. Come ti' tojlel pejtelel a pi'ʌlob ti' yotot Jeroboam cojach jini tsa' q'uejli ti uts'at ti' wut Dios.

¹⁴Lac Yum mi caj i wa'chocon yambʌ rey ti' tojlel israelob. Jini mi caj i tsʌnsan pejtel i p'olbal Jeroboam.

¹⁵Lac Yum mi caj i yʌq'uen wocol Israel che' bajche' amʌy jats'bil bʌ ti ja'. Mi caj i boc loq'uel che' bajche' te'. Mi caj i loc'sañob ti jini uts'at bʌ lum tsa' bʌ i yʌq'ueyob i ñojte'elob. Mi caj i laj pucob majlel ti junwejl Eufrates, come tsi' meleyob i yejtal dios tac. Tsi' techbeyob i mich'ajel lac Yum.

¹⁶Jini cha'an lac Yum mi caj i cʌy israelob cha'an ti' caj i mul Jeroboam, cha'an tsi' xiq'ui ti mulil jini israelob”. Che' yom ma' suben, che'en Ahías.

¹⁷Jini cha'an tsa' sujti ti Tirsa i yijñam Jeroboam. Che' woli' c'otel ti' ti' i yotot, tsa' chʌmi i yalobil.

¹⁸Tsi' mucuyob. Pejtelel israelob tsi' yuc'tayob che' bajche' lac Yum tsi' sube jini x'alt'an Ahías.

¹⁹Ts'ijbubil ti' juñilel i reyob Israel yan tac bʌ i melbal Jeroboam yic'ot bajche' tsa' ujti guerra ti' tojlel.

²⁰Jeroboam tsi' cha'le yumʌntel cha'p'ejl i cha'c'al jab. Che' bʌ tsa' chʌmi Jeroboam, tsi' ch'ʌmbe i ye'tel i yalobil i c'aba' Nadab.

²¹Ya' ti Judá tsi' cha'le yumʌl Roboam (i yalobil Salomón). Anix jump'ejl i yuxc'al (41) i jabilel che' bʌ tsa' caji ti yumʌntel. Wuclujump'ejl (17) jab tsi' cha'le yumʌl ya' ti Jerusalén, jini tejclum tsa' bʌ i yajca lac Yum ti' tojlel pejtel Israel cha'an mi' cʌjñel i c'aba'. I ña' Roboam jiñʌch Naama ch'oyol bʌ ti Amón.

²²Jini año' bʌ ti Judá ja'el tsi' cha'leyob jontolil ti' wut lac Yum. Tsi' techbeyob i mich'ajel lac Yum cha'an cabʌl i mul, ñumen bajche' i ñojte'elob.

²³Tsi' wa'chocoyob oy ba' mi' cha'leñob ch'ujutesaya ya' ti bujbujtʌl. Tsi' meleyob dios tac. Tsi' yʌc'ʌyob ti jujump'ejl chan bʌ bujtʌl yic'ot ti yebal jujuntejc jupul bʌ te'.

²⁴An winicob ti Judá tsa' bʌ i pi'leyob i bʌ ti' ts'i'lel. Jini chumulo' bʌ ti Judá leco tsi' meleyob che' bajche' tsi' meleyob jini ñaxan bʌ i yumob jini lum. Lac Yum tsi' chocoyob loq'uel cha'an i mul cha'an mi' ch'ʌmob i lum jini israelob.

²⁵Che' ti' jo'p'ejlel i jabilel i yumʌntel Roboam, jini rey ti Egipto i c'aba' Sisac tsi' teche guerra ti' contra Jerusalén.

²⁶Tsi' loc'sa jini letsem tac bʌ i tojol am bʌ ti' yotot lac Yum yic'ot ti' yotot jini rey. Tsi' lu' xujch'i majlel yic'ot jini mʌctʌjibʌl cha'an guerra tsa' bʌ i mele Salomón ti oro.

²⁷Roboam tsi' mele yambʌ mʌctʌjibʌl ti bronce cha'an i q'uexol. Tsi' yʌq'ueyob i yumob xcʌntayajob mu' bʌ i cʌntañob i ti' i yotot rey.

²⁸Che' bʌ tsa' majli jini rey ti' yotot lac Yum, jini xcʌntayajob tsi' ye'eyob majlel jini mʌctʌjib. Che' bʌ tsa' sujti tsi' cha' lotoyob ti' yajñib.

²⁹Ts'ijbubil ti' juñilel i reyob Judá jini yan tac bʌ i melbal Roboam yic'ot pejtel tsa' bʌ ujti che' woli' mel i ye'tel.

³⁰Tsi' contrajiyob i bʌ Roboam yic'ot Jeroboam che' cuxulob to.

³¹(I ña' Roboam jiñʌch Naama jini ch'oyol bʌ ti Amón.) Che' bʌ tsa' chʌmi Roboam, tsa' mujqui ba' mucul i ñojte'elob ya' ti Jerusalén. I yalobil i c'aba' Abiam tsi' ch'ʌmbe i ye'tel.