Read Chol 1 Reyob 15 Bible Online

1 Reyob 15 - Chol bible

1 Reyob 15

¹Che' ti' waxʌclujump'ejl (18) i jabilel i yumʌntel Jeroboam (i yalobil Nabat), Abiam tsa' wa'choconti ti rey ti Judá.

²Uxp'ejl jab tsi' cha'le yumʌl ti Jerusalén. I ña' Abiam jiñʌch Maaca, i yixic'al Abisalom.

³Abiam tsi' cha'le mulil lajal bajche' i tat. Ma'anic tsi' ñopo lac Yum Dios ti jump'ejl i pusic'al che' bajche' David i ñojte'el.

⁴Pero cha'an ti' caj David, lac Yum Dios tsi' yʌq'ue i p'olbal tsa' bʌ i cha'le i ye'tel ti' q'uexol ya' ti Jerusalén, come David tsi' c'uxbi lac Yum.

⁵Tsi' cha'le chuqui uts'at ti' wut lac Yum. Ma'anic tsi' ñusʌbe i t'an lac Yum ti pejtelel i jabil, cojach tsi' ñusa che' bʌ tsi' taja i mul ti' tojlel Urías jini heteo.

⁶Che' yumʌlʌch Abiam ti Judá, tsi' chʌn contrajiyob i bʌ ti guerra jini israelob.

⁷Ts'ijbubil ti' juñilel i reyob Judá yan tac bʌ i melbal Abiam yic'ot pejtel tsa' bʌ ujti ti' yumʌntel.

⁸Che' bʌ tsa' chʌmi Abiam, tsa' mujqui ya' ti Jerusalén. I yalobil i c'aba' Asa tsi' ch'ʌmbe i ye'tel.

⁹Che' ñumeñix bolonlujump'ejl (19) i jabilel i yumʌntel Jeroboam jini rey ti Israel, Asa tsa' wa'choconti ti rey ti Judá.

¹⁰Tsi' cha'le yumʌl ti Jerusalén jump'ejl i yuxc'al (41) jab.

¹¹Asa tsi' mele chuqui uts'at ti' wut lac Yum che' bajche' David i ñojte'el.

¹²Tsi' choco loq'uel ti' lumal jini winicob tsa' bʌ i laj bʌ pi'leyob i bʌ. Tsi' choco pejtel jini dioste' tac tsa' bʌ i meleyob i tatob.

¹³Tsi' chilbe i ye'tel x'ixic bʌ yumʌl i c'aba' Maaca, i chuchu', come tsi' mele dioste' i c'aba' Asera. Asa tsi' tsepe. Tsi' pulu ya' ti' bijlel ja' i c'aba' Cedrón.

¹⁴Ma'anic tsi' jisa i yajñib tac dioste' ti bujbujtʌl, pero xuc'ul tsi' ñopo lac Yum ti pejtelel i jabilel.

¹⁵Asa tsi' loto jini mʌctʌjibʌl tac ti Templo cha'an mi' q'uejlel. Jiñʌch mʌctʌjibʌl melbil bʌ ti bronce tsa' bʌ i yʌq'ue lac Yum i tatuch. Ya' tsi' loto ja'el jini p'ejt tac melbil bʌ ti plata yic'ot ti oro.

¹⁶Asa tsi' chʌn cha'le guerra yic'ot Baasa jini rey ti Israel.

¹⁷Baasa tsi' wen ñup'u jini tejclum i c'aba' Ramá cha'an mach chʌn mejlix ti ñumel jini año' bʌ ti Judá.

¹⁸Jini cha'an Asa tsi' ch'ʌmʌ pejtel jini oro yic'ot plata tsa' bʌ cʌle ti' yotot lac Yum yic'ot ti' yotot rey. Tsi' yʌc'ʌ ti' c'ʌb i winicob cha'an mi' ch'ʌmbeñob majlel Benadad ya' ba' chumul ti Damasco. Benadad jiñʌch i yalobil Tabrimón, i yalobil bʌ Hezión jini rey ti Siria.

¹⁹Asa tsi' choco ti subentel ja'el: La' lac laje' lac t'an che' bajche' lac tatob. Wolic chocbeñet majlel plata yic'ot oro cha'an a majtan. Yom ma' jem a t'an yic'ot Baasa jini rey ti Israel cha'an mi' cʌy i contrajiñon ti guerra, che'en Asa.

²⁰Benadad uts'at tsi' yubibe i t'an jini rey Asa. Tsi' yʌq'ue mandar i yumob soldadojob cha'an mi' majlelob ti guerra ti' contra i tejclum tac Israel. Che' jini tsi' cha'leyob guerra ti' contra Ijón, yic'ot Dan, yic'ot Abelbet Maaca, yic'ot pejtel Cineret, yic'ot pejtel tejclum tac am bʌ ti Neftalí.

²¹Che' bʌ tsi' yubi Baasa, tsi' cʌyʌ i cha' mel jini tejclum i c'aba' Ramá. Tsa' sujti ti Tirsa.

²²Jini rey Asa tsi' yʌc'ʌ i t'an cha'an mi' pʌjyelob tilel pejtelel winicob ti Judá. Tsi' comol jemeyob jini xajlel tac yic'ot te' ya' ti Ramá tsa' bʌ i c'ʌñʌyob israelob cha'an i mʌjquil Ramá. Asa tsi' c'ʌñʌ cha'an mi' wen mel ti uts'at jini tejclum Geba am bʌ ti Benjamín yic'ot Mizpa.

²³Ts'ijbubil ti' juñilel i reyob Judá pejtel yan tac bʌ i melbal Asa yic'ot bajche' tsi' mele tejclum tac. Che' ñoxix tsa' caji i tejchel i c'amʌjel i yoc.

²⁴Tsa' chʌmi Asa. Tsa' mujqui ba' mucul i ñojte'elob ya' ti' tejclum David. Josafat i yalobil tsi' ch'ʌmbe i ye'tel i tat.

²⁵Che' ñumeñix jump'ejl jab i yumʌntel Asa, tsa' wa'choconti ti rey Nadab i yalobil Jeroboam ya' ti Israel. Tsi' cha'le yumʌl cha'p'ejl jab.

²⁶Tsi' cha'le jontolil ti' wut lac Yum che' bajche' i tat. Tsi' ch'ujutesa dios tac. Tsi' xiq'ui ti mulil jini israelob.

²⁷Baasa (i yalobil Ahías i p'olbal Isacar) tsa' caji i contrajin Nadab. Nadab tsi' pʌyʌ majlel jini israelob ti guerra ya' ti Gibetón, jump'ejl tejclum i cha'an bʌ filisteojob. Che' woli ti guerra ti' contra Gibetón,

²⁸Baasa tsi' tsʌnsa Nadab. Tsi' chilbe i yumʌntel che' i yuxp'ejlel jab i yumʌntel Asa, jini rey ti Judá.

²⁹Che' bʌ ochemix ti rey, Baasa tsi' tsʌnsa pejtel i pi'ʌlob Jeroboam. Ma'anic tsa' cʌle mi juntiquilic. Che'i tsa' ts'ʌctiyi i t'an lac Yum tsa' bʌ subenti jini x'alt'an Ahías ch'oyol bʌ ti Silo.

³⁰Che'ʌch tsa' ujti cha'an ti' caj i mul Jeroboam, cha'an tsi' xiq'ui ti mulil jini israelob. Tsi' techbe i mich'ajel lac Yum i Dios Israel.

³¹Laj ts'ijbubil ti' juñilel i reyob israelob chuqui tsa' ujti che' bʌ tsi' cha'le yumʌl Nadab.

³²Ma'anic tsa' lajmi guerra ti' tojlel Asa yic'ot Baasa jini rey ti Israel.

³³Che' ti' yuxp'ejlel jab i yumʌntel Asa, rey bʌ ti Judá, tsa' wa'choconti Baasa (i yalobil Ahías) ti' rey jini israelob ya' ti Tirsa. Tsi' cha'le yumʌl chʌmp'ejl i cha'c'al (24) jab.

³⁴Tsi' cha'le jontolil ti' wut lac Yum. Tsi' mele che' bajche' i melbal Jeroboam. Tsi' xiq'ui jini israelob cha'an mi' ch'ujutesañob dioste' tac.