Read Chol 1 Reyob 16 Bible Online

1 Reyob 16 - Chol bible

1 Reyob 16

¹Lac Yum tsi' sube jini x'alt'an Jehú (i yalobil Hanani) cha'an mi' cha' suben Baasa:

²Tsa cʌq'ueyet a ñuclel, Baasa, che' mach cʌmbiletic. Tsac wa'chocoyet ti' yum israelob, pero lajal tsa' mele che' bajche' Jeroboam. Tsa' xiq'ui ti mulil israelob. Tsa' techbeyon c mich'ajel cha'an cabʌl a mul.

³Wʌle mi caj c jisan a p'olbal che' bajche' tsac jisʌbe i p'olbal Jeroboam.

⁴Jini a pi'ʌlob mu' bʌ i chʌmelob ti tejclum mi caj i c'uxtʌlob ti ts'i'. Jini mu' bʌ i chʌmelob ti jochol bʌ lum, jini xta'jol mi caj i c'uxob, che'en lac Yum. Che'ʌch tsa' subenti Baasa come tsi' techbe i mich'ajel lac Yum cha'an ti' caj i jontolil. Anquese lac Yum tsi' jisa i p'olbal Jeroboam cha'an ti' caj i mul, lajal tsi' cha'le jontolil Baasa che' bajche' Jeroboam. Tsa' chʌmi Baasa. Ya' tsa' mujqui ti Tirsa. Ts'ijbubil ti' juñilel i reyob Israel jini yan tac bʌ i melbal Baasa yic'ot chuqui tsa' ujti ti' tojlel. Tsa' ochi ti rey i yalobil i c'aba' Ela.

⁸Che' ti wʌcp'ejl i cha'c'al (26) jab i ye'tel Asa i rey Judá, tsa' caji ti yumʌntel Ela (i yalobil Baasa) ti Israel. Tsi' cha'le yumʌl cha'p'ejl jab ya' ti Tirsa.

⁹An i winic Ela i c'aba' Zimri am bʌ ti' wenta lamital jini xñijca carretajob. Zimri tsa' caji i tem i t'an yic'ot i winicob cha'an mi' chilben i ye'tel Ela. Ti jump'ejl q'uin ya'an jini rey ti' yotot Arsa ya' ti Tirsa. Jini Arsa jiñʌch jini x'ac' e'tel ti' yotot rey. Che' woli' yʌc'an jini rey,

¹⁰tsa' c'oti Zimri i lowe'. Tsi' tsʌnsa. Che' jini tsi' yotsa i bʌ ti rey ti Israel che' ti' wucp'ejl i cha'c'al (27) i jabilel i yumʌntel jini Asa am bʌ ti Judá.

¹¹Zimri tsi' tsʌnsa pejtel i pi'ʌlob jini rey Ela, yic'ot pejtelel i cʌñʌ bʌ ja'el. Ma'anic tsa' cʌle mi juntiquilic winic.

¹²Zimri tsi' laj jisa pejtelel i pi'ʌlob Baasa che' bajche' lac Yum tsi' sube jini x'alt'an Jehú.

¹³Tsa' ujti pejtel iliyi cha'an ti' caj i mul Baasa, ti' caj i mul i yalobil i c'aba' Ela. Tsi' xiq'uiyob ti mulil israelob cha'an mi' ch'ujutesañob dioste' tac. Tsi' techbeyob i mich'ajel lac Yum i Dios Israel.

¹⁴Ts'ijbubil ti' juñilel i reyob Israel pejtel i melbal Ela.

¹⁵Wucp'ejl jach q'uin tsi' cha'le yumʌntel Zimri. Jini soldadojob israelo' bʌ woliyob ti guerra ti' contra Gibetón, jump'ejl tejclum i cha'an filisteojob, che' bʌ tsi' yubiyob chʌmenix i rey come Zimri tsi' tsʌnsa. Tsi' temeyob i t'an cha'an mi' yotsañob ti rey Omri, i yum soldadojob.

¹⁷Jini cha'an Omri tsi' pʌyʌ majlel jini soldadojob año' bʌ ti Gibetón. Tsa' majli i joy mʌctañob Tirsa i tejclum jini rey.

¹⁸Che' bʌ tsi' q'uele Zimri tsa'ix chijli jini tejclum, tsa' ochi ti mal jini colem bʌ i yotot. Tsi' tsuc'u ti c'ajc. Ya' tsa' chʌmi ti c'ajc.

¹⁹Come Zimri tsi' cha'le jontolil che' bajche' Jeroboam ja'el. Tsi' ch'ujutesa dioste' tac. Tsi' xiq'ui ti mulil jini israelob.

²⁰Ochem ti' juñilel i reyob israelob yan tac bʌ i melbal Zimri yic'ot bajche' tsi' mele ti' tojlel Ela.

²¹Tsi' t'oxoyob i bʌ jini israelob ti cha'mojt. Ojlil tsi' tsajcayob Omri. Ojlil tsi' tsajcayob Tibni (i yalobil Ginat).

²²I winicob Omri tsa' mʌjliyob i cha'an. Tsa' tsʌnsʌnti Tibni. Tsa' ochi ti rey Omri.

²³Che' ñumeñix lujump'ejl i cha'c'al (30) jab i yumʌntel Asa ti Judá, tsa' caji ti yumʌntel Omri ti Israel. Wʌcp'ejl jab tsi' cha'le yumʌl ya' ti Tirsa. Wʌcp'ejl jab tsi' cha'le yumʌl ti Samaria. Tsi' mʌñʌ jini wits i c'aba' Samaria am bʌ i yum i c'aba' Semer. Tsi' tojbe lujump'ejl i yuxc'al mil (50,000) peso. Tsi' mele tejclum ya'i. Tsi' yotsʌbe i c'aba' Samaria cha'an mi' ña'tʌntel i c'aba' Semer.

²⁵Cabʌl tsi' cha'le jontolil Omri ñumen bajche' yambʌ reyob.

²⁶Tsi' ch'ujutesa dioste' tac che' bajche' Jeroboam. Tsi' xiq'ui jini israelob ti lajal bʌ mulil. Tsi' techbeyob i mich'ajel lac Yum i Dios Israel.

²⁷Ts'ijbubil ti' juñilel i reyob israelob jini yan tac bʌ i melbal Omri.

²⁸Che' bʌ tsa' chʌmi Omri tsa' mujqui ya' ti Samaria. I yalobil i c'aba' Acab tsi' ch'ʌmbe i ye'tel ti rey.

²⁹Che' ñumeñix waxʌclujump'ejl i cha'c'al (38) jab i yumʌntel Asa ti Judá, tsa' caji ti yumʌntel Acab. Acab tsi' cha'le yumʌntel cha'p'ejl i cha'c'al (22) jab ti Samaria.

³⁰Pero tsi' mele jontolil ti' wut lac Yum ñumen bajche' pejtelel i reyob Israel.

³¹Mach jinic jach, pero tsi' cha'le ñuc bʌ mulil che' bʌ tsi' pʌyʌ Jezabel cha'an i yijñam. Jiñʌch i yixic'al Etbaal i rey sidoñob. Acab tsa' caji i ch'ujutesan Baal.

³²Ñaxan tsi' melbe i yotlel yic'ot i pulʌntib Baal ya' ti Samaria.

³³Ti wi'il tsa' caji i mel yan tac bʌ dioste'. Ñumen tsi' techbe i mich'ajel lac Yum i Dios Israel che' bajche' yaño' bʌ i reyob Israel.

³⁴Che' woli ti yumʌntel Acab, juntiquil winic ch'oyol bʌ ti Betel i c'aba' Hiel tsi' cha' mele Jericó. Che' bʌ tsi' melbe i ts'ajquil i yebal otot, tsa' chʌmi Abiram jini ascuñʌl bʌ i yalobil. Che' bʌ tsi' melbe i ti' tac tejclum, tsa' chʌmi Segub, jini ijts'iñʌl bʌ i yalobil. Che' jini tsa' ujti che' bajche' lac Yum tsi' sube Josué (i yalobil Nun).