Read Chol 1 Reyob 18 Bible Online

1 Reyob 18 - Chol bible

1 Reyob 18

¹Ñumeñix uxp'ejl jab lac Yum tsi' sube Elías: Cucu ba'an Acab. Suben mi caj c cha' choc tilel ja'al, che'en.

²Jini cha'an Elías tsa' majli i suben Acab. Ti jim bʌ ora wen woli wi'ñal ya' ti Samaria.

³Abdías jiñʌch x'ac' e'tel ti' yotot Acab. Abdías tsi' wen tsajca lac Yum. Che' bʌ tsi' ñopo i tsʌnsan jini x'alt'añob i cha'an lac Yum jini Jezabel, Abdías tsi' colta jo'c'al x'alt'añob. Tsi' t'oxoyob ti cha'mojt, ti lujuntiquil i yuxc'al (50) tac. Tsi' mucuyob ti ch'en. Tsi' yʌq'ueyob chuqui mi' c'uxob yic'ot chuqui mi' japob.

⁴

⁵Tsa' tili Elías cha'an mi' q'uel Acab ti jini jach bʌ q'uin che' woli' loq'uel i sʌclañob ja'. Jini rey tsi' sube Abdías: Cucu ti ñumel ti pejtelel lum. Yom ma' sʌclan jam ba'an pa' am bʌ i ya'lel, ame laj chʌmic cʌlac' ti wi'ñal.

⁶Tsi' t'oxoyob i bʌ cha'an mi' pam ñumelob ti lum. Tsa' majli Acab ti jump'ejl bij. Abdías tsa' majli ti yambʌ bij.

⁷Che' woli' majlel Abdías tsa' c'oti Elías i taj. Abdías tsi' cʌñʌ ti ora. Tsi' ñocchoco i bʌ ti' tojel. Tsi' yʌlʌ: ¿Mach ba jatetic, c yum Elías? che'en.

⁸Elías tsi' jac'ʌ: Joñon cu. Cucu, suben a yum: “Wʌ'ix an Elías”. Che' yom ma' suben, che'en.

⁹Pero Abdías tsi' jac'ʌ: ¿Chuqui c mul cha'an ma' chocon majlel ba'an Acab cha'an mi' tsʌnsañon?

¹⁰Melel chuqui mic subeñet, come mic bʌc'ñan lac Yum Dios. Jini rey tsi' choco majlel winicob ti pejtelel colem tejclum ti pejtelel i lumal cha'an mi' sʌclañet. Che' bʌ tsi' subeyob: “Mach wʌ'ic an Elías ilayi”, che'ob, jini rey Acab tsi' wersa subeyob cha'an mi' wa'chocoñob i t'an ti' tojlel Dios.

¹¹Awilan wolix a subeñon: “Cucu, suben a yum: Wʌ'ix an Elías”, che'et.

¹²Pero che' mic majlel, jini i yEspíritu lac Yum mi caj i pʌyet majlel ba' ma'anic mic ña'tan. Che' mi' tilel Acab i sʌclañet, che' ma'anic mi' tajet, mi caj i tsʌnsañon, anquese c'ʌlʌl che' ch'itoñon to tsac wen tsajca lac Yum.

¹³¿Maxto ba anic tsa' subentiyet chuqui tsac mele che' bʌ tsi' tsʌnsa jini x'alt'añob i cha'an lac Yum jini Jezabel? Tsac subeyob puts'el ya' ti ch'en. Tsac t'oxoyob ti lujuntiquil i yuxc'al. Tsac we'sayob ti waj. Tsa cʌq'ueyob ja'.

¹⁴Wʌle wola' subeñon: “Cucu, suben jini rey: Wʌ'ix an Elías”, che'et. Mi tsac mele bajche' jini, mi caj i tsʌnsañon. Che' tsi' yʌlʌ Abdías.

¹⁵Pero Elías tsi' jac'ʌ: Mi cʌc' c t'an ti' c'aba' lac Yum Dios am bʌ ti panchan come mi cajñel ti' tojlel. Ti wʌle jach mi caj c pʌsben c bʌ Acab, che'en Elías.

¹⁶Jini cha'an Abdías tsa' majli i suben Acab. Ti ora tsa' tili Acab ba'an Elías.

¹⁷Che' bʌ tsi' q'uele, Acab tsi' sube: ¿Jatet ba woli bʌ a tic'lan Israel? che'en.

¹⁸Elías tsi' jac'ʌ: Mach joñonic. Ma'anic wolic tic'lan Israel. Jatet yic'ot a pi'ʌlob woli la' tic'lan Israel, come tsa'ix la' ñusʌbe i t'an lac Yum. Tsa'ix la' tsajca jini dios Baal.

¹⁹Wʌle tempan pejtelel israelob. Pʌyʌyob majlel ya' ti wits i c'aba' Carmelo, yic'ot jini lujuntiquil i yuxc'al i cha'bajc' (450) x'alt'añob i cha'an Baal, yic'ot jini jumbajc' x'alt'añob i cha'an Asera mu' bʌ i c'uxob waj ti' wenta Jezabel.

²⁰Che' jini Acab tsi' pʌyʌ majlel pejtelel israelob yic'ot jini x'alt'añob. Tsi' tempayob ya' ti wits i c'aba' Carmelo.

²¹Elías tsi' c'ajtibeyob: ¿Jayp'ejl to q'uin mi caj la' chʌn ajñel ti cha'chajp la' pensar? Mi jiñʌch Dios jini lac Yum, tsajcanla. Mi jiñʌch lac Yum jini Baal, tsajcanla, che'en. Ma'anic tsa' mejli i jac'ob.

²²Elías tsi' cha' subeyob: Ma'anic yambʌ x'alt'an i cha'an lac Yum, cojachix joñon, pero an jumbajc' yic'ot lujuntiquil i yuxc'al x'alt'añob i cha'an Baal.

²³Pʌyʌla tilel cha'cojt tat wacax. Jini x'alt'añob i cha'an bʌ Baal la' i yajcañob juncojt. La' i bic'ti t'ojob. La' i yʌc'ob ti pam si', pero mach yomic mi' yotsʌbeñob c'ajc ti' yebal. Jini yambʌ juncojt mi caj c chajpan joñon. Mi caj cʌc' ti pam si', pero ma'anic mi caj cotsʌben c'ajc, che'en.

²⁴Yom mi la' pejcan la' dios. Mi caj c pejcan c Yum ja'el. Jini dios mu' bʌ i jac', mu' bʌ i choc tilel c'ajc jiñʌch Dios, che'en. Ti pejtelelob tsi' yʌlʌyob che'ʌch yom.

²⁵Elías tsi' subeyob jini x'alt'añob i cha'an bʌ Baal: Yajcanla juncojt wacax, chajpanla. Ñaxañetla, come cabʌletla. Pejcan la' dios Baal, pero mach yomic mi la' wotsan c'ajc ti' yebal i majtan, che'en.

²⁶Che' jini tsi' ch'ʌmʌyob jini tat wacax tsa' bʌ i yʌq'ueyob. Tsi' pejcayob Baal ti sʌc'ajel c'ʌlʌl ti xinq'uiñil. Tsi' yʌlʌyob: Baal, jac'beñon lojon, che'ob. Pero ma'anic tsi' jac'ʌ. Tsi' cha'leyob tijp'el ti' joytilel i pulʌntib i majtan Baal.

²⁷Che' xinq'uiñilix, Elías tsa caji i wajleñob: Ñumen tsʌts yom mi la' pejcan, come jiñʌch a dios. Tic'ʌl mi woli ti t'an yic'ot i pi'ʌlob o woli' mel i ye'tel o majlem ti bij, o wʌyʌl. Yom mi la' ñijcan ch'ojyel, che'en Elías.

²⁸Tsa' utsi cajiyob ti c'am bʌ t'an. Tsi' lowoyob i bʌ ti cuchillo yic'ot lanza tac che' bajche' i tilel mi' melob jinto tsa' bejq'ui i ch'ich'el.

²⁹Tsa' ñumi xinq'uiñil. Tsi' chʌn cha'leyob oñel c'ʌlʌl tsa' bʌjli q'uin che' ti' yorajlel pulo' majtañʌl. Ma'anic tsi' jac'ʌ. Ma'anic t'an. Ma'anic c'ajc.

³⁰Tsi' yʌlʌ Elías: Lʌc'tesan la' bʌ tic tojlel, che'en. Tsi' lʌc'tesayob i bʌ. Elías tsi' cha' melbe i pulʌntib i majtan Dios, come jejmenix.

³¹Tsi' ch'ʌmʌ lajchʌmp'ejl xajlel jujump'ejl i wentajlel jujunmojt i p'olbal Jacob, jini Jacob tsa' bʌ cha' otsʌbenti i c'aba' Israel che' bajche' tsi' yʌlʌ Dios.

³²Elías tsi' c'ʌñʌ jini xajlel tac ti' melol jump'ejl pulʌntib cha'an mi' c'uxbintel i c'aba' lac Yum. Tsi' mele i bijlel yoc ja' ti' joytʌlel che' bajche' i tamlel cha'cujch pac'.

³³Tsi' ts'ʌlʌ jini si'. Tsi' jacu jini tat wacax. Tsi' yʌc'ʌ ti pam si'.

³⁴Tsi' c'ajti tilel chʌmp'ejl uc'um ja'. Tsi' subeyob: Mulu jini majtañʌl am bʌ ti pam si', che'en. Che'ʌch tsi' cha'leyob. Tsi' yʌlʌ: Cha' mele, che'en. Tsi' cha' meleyob. Tsi' yʌlʌ: Cha' mele, che'en. Tsi' cha' meleyob ti' yuxyajlel.

³⁵Tsa' ts'ʌjmi jini ja' ti' joytʌlel i pulʌntib majtañʌl. Tsa' bujt'i i yoc ja'lel.

³⁶Che' bʌ tsa' c'oti i yorajlel cha'an mi' pulbentel i majtan lac Yum, tsi' lʌc'tesa i bʌ Elías. Tsi' yʌlʌ: C Yum, i Dioset bʌ Abraham yic'ot Isaac yic'ot Israel, la' tsictiyic wʌle a winicon ti isujm. Tsac laj mele che' bajche' tsa' subeyon.

³⁷Jac'beñon c t'an. La' i cʌñetob ili winicob, come jatet jach Dioset, c Yumet lojon. La' ñijcʌbenticob i pusic'al cha'an mi' cha' sutq'uiñob i bʌ ba'añet, che'en.

³⁸Tsa' bʌc' tili c'ajc chocbil tilel ti lac Yum. Tsa' puli i majtan Dios yic'ot si' yic'ot xajlel yic'ot lum. Jini ja' tsa' laj tsʌc'mi.

³⁹Che' bʌ tsi' q'ueleyob pejtel jini winicob, tsi' pʌcchocoyob i bʌ. Tsi' yʌlʌyob: Lac Yum jiñʌch Dios, lac Yum jiñʌch Dios, che'ob.

⁴⁰Elías tsi' yʌlʌ: Chucula i winicob Baal cha'an ma'anic mi' puts'elob mi juntiquilic, che'en. Tsi' chucuyob. Elías tsi' pʌyʌ majlel jini x'alt'añob i cha'an Baal ya' ti pa' i c'aba' Cisón ba' tsi' tsʌnsayob ti pejtelelob.

⁴¹Elías tsi' sube Acab: Cucux ti a wotot. Cha'len we'el uch'el, come tsiquil i t'an ja'al woli bʌ tilel, che'en.

⁴²Acab tsa' majli ti we'el uch'el. Elías tsa' letsi ti wits i c'aba' Carmelo. Tsi' ñocchoco i bʌ ti lum ti oración. Tsi' yʌc'ʌ i wut ti' pix.

⁴³Tsi' sube jini x'e'tel i cha'an: Cucu, q'uele ya' ba' mi' bʌjlel q'uin, che'en. Tsa' majli i q'uel. Ma'anic chuqui tsiquil. Wucyajl tsi' sube Elías cha'an mi' majlel i q'uel. Wucyajl tsa' majli.

⁴⁴Tsi' yʌlʌ: Tsaj q'uele che'ʌch wistʌl tocal che' bajche' i patstilel i c'ʌb winic. Woli' loq'uel letsel ti colem ñajb, che'en. Jini cha'an tsi' sube: Cucu suben Acab: “Chajpan a carreta. Cucu ti ora, ame i mʌctañet ti bij jini colem ja'al”. Che'ʌch yom ma' suben, che'en Elías.

⁴⁵Ti ora tsa' mʌjqui jini panchan ti tocal wets'bil tilel ti ñuqui ic'. Tsa' wen tili ja'al. Acab tsa' majli ti carreta ti' bijlel Jezreel.

⁴⁶Lac Yum tsi' wen p'ʌtesa Elías. Tsi' cʌchʌ i bʌ. Ñaxan tsi' cha'le ajñel majlel Elías ti' tojlel i carreta Acab c'ʌlʌl tsa' c'oti ti Jezreel.