Read Chol 1 Reyob 19 Bible Online

1 Reyob 19 - Chol bible

1 Reyob 19

¹Acab tsi' sube Jezabel pejtel chuqui tsi' mele Elías yic'ot bajche' tsi' tsʌnsa ti espada jini x'alt'añob i cha'an Baal.

²Che' jini Jezabel tsi' choco majlel x'ac'jun ba'an Elías. Tsi' yʌlʌ: Mi caj c tsʌnsañet che' bajche' tsa' tsʌnsa yaño' bʌ. Ijc'ʌl chʌmeñetix che' bajche' ili ora. Machic jini, joñon mic ch'ʌm tic wenta cha'an mic toj ti' tojlel c dios, che'en.

³Elías tsi' bʌc'ña. Tsa' puts'i cha'an ma'anic mi' tsʌnsʌntel. Tsa' c'oti ti Beerseba am bʌ ti Judá. Ya' tsi' cʌyʌ i winic.

⁴Tsa' majli ti ñajt bʌ i tiquiñal pañimil jump'ejl q'uin ti xʌñol. Tsa' c'oti ti buchtʌl ti' yebal juntejc te' i c'aba' enebro. Tsi' cha'le oración cha'an mi' chʌmel. Tsi' yʌlʌ: Jasʌlix, c Yum, tsʌnsañonix, come mach ñumen weñonic bajche' c ñojte'el, che'en.

⁵Tsa' ñole ti' yebal jini enebro. Tsa' wʌyi. Juntiquil ángel tsi' ñijca. Tsi' sube: Ch'ojyen, c'uxu a waj, che'en.

⁶Tsi' q'uele ya'an ti' tojel i jol junq'uejl colem bʌ waj tic'an bʌ yic'ot jump'ejl tsima ja'. Tsi' c'uxu, tsi' japʌ, tsa' cha' wʌyi.

⁷I yángel lac Yum tsa' cha' tili ba'an. Tsi' sube: Ch'ojyen, c'uxu a waj, come wen ñajt baqui ma' majlel, che'en.

⁸Tsa' cha' ch'ojyi. Tsi' c'uxu waj, tsi' japʌ ja'. Tsa' wen p'ʌt'a che' bʌ tsi' c'uxu waj. Tsi' xʌñʌ majlel cha'c'al q'uin cha'c'al ac'ʌlel c'ʌlʌl tsa' c'oti ti Horeb, i wits Dios.

⁹Ya' tsa' ochi ti ch'en ba' tsi' ñusa jump'ejl ac'ʌlel. Tsa' c'oti i t'an lac Yum ti' tojlel: ¿Chuqui woli a mel ilayi? che'en.

¹⁰Elías tsi' jac'ʌ: Tsac wen melbeyet a we'tel i Yumet bʌ Panchan yic'ot Pañimil. Jini israelob tsi' laj tsʌnsayob jini x'alt'añob a cha'an ti oñiyi c'ʌlʌl wʌle. Tsi' cʌyʌyob jini xuc'ul bʌ a t'an. Tsi' jemeyob i pulʌntib a majtan. Tsi' tsʌnsayob x'alt'añob a cha'an. C bajñel jach tsa' cʌleyon. Woli' sʌclañoñob ja'el cha'an mi' tsʌnsañoñob, che'en.

¹¹Lac Yum tsi' jac'ʌ: Loq'uen ti pam lum. Wa'i' ti jini wits ti' tojel c wut, che'en. Awilan tsa' ñumi lac Yum ya'i. Jump'ejl tsʌts bʌ ic' tsi' jawʌ jini wits. Ti' p'ʌtʌlel Dios tsa' tojp'i xajlel, pero mach ya'ic an lac Yum ya' ti jini ic'. Tsa' tili i yujquel lum, pero mach ya'ic an lac Yum ti jini yujquel.

¹²Tsa' tili c'ajc, pero mach ya'ic an lac Yum ti c'ajc. Che' bʌ tsa' ujti jini, tsa' tili c'un bʌ t'an.

¹³Che' bʌ tsi' yubi Elías, tsi' mʌcʌ i wut ti pisil. Tsa' wa'le ti' ti' jini ch'en. Che' jini tsa' caji' yubiben i t'an juntiquil: ¿Chuqui woli a mel ilayi, Elías? che'en.

¹⁴Tsi' jac'ʌ: Tsac wen melbe i ye'tel c Dios i Yum Panchan yic'ot Pañimil, pero jini israelob tsi' cʌyʌyob jini xuc'ul bʌ a t'an. Tsi' jemeyob i pulʌntib a majtan. Tsi' tsʌnsayob jini x'alt'añob a cha'an. C bajñel jax tsa' cʌleyon. Woli' sʌclañoñob ja'el cha'an mi' tsʌnsañoñob, che'en.

¹⁵Lac Yum tsi' sube: Cha' sujten majlel ti' bijlel Damasco ba' tiquin pañimil. Che' ma' c'otel mi caj a wa'chocon jini Hazael cha'an mi' yochel ti rey ti Siria.

¹⁶Yom ma' wa'chocon ja'el Jehú (i yalobil Nimsi) cha'an mi' yochel ti' rey israelob. Wa'chocon ja'el Eliseo (i yalobil Safat) ch'oyol bʌ ti Abelmehola cha'an mi' yochel ti x'alt'an ti a q'uexol.

¹⁷Mi caj i chʌmelob cabʌl winicob. Jini mach bʌ anic mi' tsʌnsʌntel ti' yespada Hazael, Jehú mi caj i tsʌnsan. Jini mu' bʌ i puts'el ti' tojlel Jehú, Eliseo mi caj i tsʌnsan.

¹⁸Pero joñon mi caj j cʌntan jini wucp'ejl mil israelob mach bʌ anic tsi' ñocchocoyob i bʌ ti' tojlel Baal, mach bʌ anic tsi' ts'ujts'uyob, che'en.

¹⁹Che' bʌ tsa' majli Elías, tsi' taja Eliseo (i yalobil Safat). Woli' c'ʌn chʌncojt i cha'c'al (24) tat wacax cha'an mi' top' lum. Eliseo an ti wi'ipat. Woli' toj'esan majlel. Elías tsi' moso ti' bʌjq'uil.

²⁰Eliseo tsi' cʌyʌ jini tat wacax. Ti ajñel tsi' tsajca majlel Elías. Tsi' yʌlʌ: Awocolic la' ñaxan majlic c ts'ujts'un c tat c ña'. Ti wi'il mi caj c tsajcañet majlel, che'en. Elías tsi' yʌlʌ: Cucu. Ma'anic wolic mʌctañet, che'en Elías.

²¹Che' bʌ tsa' sujti Eliseo, tsi' pʌyʌ majlel cha'cojt tat wacax cha'an mi' tsʌnsan. Tsi' pulu jini arado. Tsi' c'ʌñʌ cha'an mi' tiq'uesan jini we'elʌl. Tsi' yʌq'ueyob cha'an mi' c'uxob jini año' bʌ ti tejclum. Ti wi'il tsa' caji i tsajcan majlel Elías. Che' jini Eliseo tsa' ochi ti xcʌnt'an ti' tojlel Elías.