Read Chol 1 Reyob 21 Bible Online

1 Reyob 21 - Chol bible

1 Reyob 21

¹Tsa' caji' taj i mul Acab ti' tojlel Nabot ch'oyol bʌ ti Jezreel. An i ts'usubil Nabot ya' ti' tojel i yotot jini rey Acab ti Samaria.

²Acab tsi' sube Nabot: Aq'ueñon a ts'usubil cha'an mic pʌq'ue yan tac bʌ pimel, come lʌc'ʌl jach an cotot ti' t'ejl. Mi caj cʌq'ueñet yambʌ a ts'usubil ñumen wem bʌ, o mic toj ti taq'uin mi a wom, che'en Acab.

³Nabot tsi' jac'be Acab: La' i coltañon lac Yum. Ma'anic mi caj cʌq'ueñet i lum c ñojte'el, che'en.

⁴Wen ch'ijyem jax i pusic'al Acab. Wen mich' tsa' cha' sujti ti' yotot cha'an ma'anic tsi' jac'ʌ i chon Nabot jini ch'oyol bʌ ti Jezreel, come tsi' sube: Ma'anic mi caj cʌq'ueñet i lum c ñojte'el, che'en. Ma'anix tsi' chʌn c'uxu waj Acab. Tsa' majli ti ñoltʌl ti' wʌyib. Tsi' mʌyʌ majlel i wut ti' ñʌc' bojte'.

⁵Jezabel, i yijñam, tsa' c'oti ba' ñolol. Tsi' c'ajtibe: ¿Chuqui woli a pensarin? ¿Chucoch mach a womix we'el? che'en.

⁶Acab tsi' jac'be i yijñam: Cha'an ma'anic tsi' jac'ʌ i chombeñon i ts'usubil Nabot che' bʌ tsaj c'ajtibe. Tsac sube mi caj cʌq'uen i q'uexol mi yom, pero tsa' jach i subeyon: “Ma'anic mi caj cʌq'ueñet c ts'usubil”, che'en. Che' tsi' yʌlʌ Acab.

⁷Jezabel tsi' jac'be: ¿Isujm ba i reyet israelob? Ch'ojyen, c'uxu a waj. Tijicñesan a pusic'al, come joñon mi caj cʌq'ueñet i ts'usubil Nabot ch'oyol bʌ ti Jezreel, che'en.

⁸I yijñam Acab tsi' mele jump'ejl carta ti' c'aba' Acab i ñoxi'al. Tsi' yʌq'ue i sellojlel. Che' jini tsi' choco majlel jini carta ba'an jini xñoxob yic'ot año' bʌ i ye'tel ya' ti' tejclum Nabot.

⁹Jezabel tsi' yʌlʌ ti carta: Yom mi la' tem cha'len ch'ajb. Yom mi la' pʌy tilel Nabot cha'an mi la' wa'chocon ti' tojlel i pi'ʌlob.

¹⁰La' tilicob cha'tiquil jontol bʌ winicob cha'an mi' jop'beñob i mul Nabot. La' i yʌlob ti' tojel i wut: “Tsa'ix a p'aja Dios yic'ot jini rey”. Che' yom mi' yʌlob. Che' jini yom mi la' choc loq'uel Nabot ti tejclum cha'an mi la' jul ti xajlel cha'an mi' chʌmel, che'en.

¹¹Jini xñoxob yic'ot jini año' bʌ i ye'tel ti tejclum tsi' jac'beyob i t'an Jezabel che' bajche' tsi' subeyob ti jun.

¹²Tsi' yʌc'ʌyob i t'an cha'an mi' cha'leñob ch'ajb. Che' jini tsi' pʌyʌyob tilel Nabot cha'an mi' wa'chocoñob.

¹³Tsa' c'otiyob jini cha'tiquil jontol bʌ winicob. Tsa' buchleyob ti' tojlel i wut Nabot. Jini cha'tiquil tsi' yʌlʌyob: Nabot tsi' p'aja Dios. Tsi' p'aja jini rey, che'ob. Tsi' pʌyʌyob loq'uel ti jini tejclum. Tsi' juluyob ti xajlel. Che' jini tsa' chʌmi Nabot.

¹⁴Che' bʌ ujtemix iliyi tsi' chocbeyob majlel t'an Jezabel: Chʌmenix Nabot cha'an tsa' jujli ti xajlel, che'ob.

¹⁵Che' bʌ tsi' yubi Jezabel chʌmenix Nabot, ti ora jach tsi' sube Acab: Tejchen ti ora. Cucu ch'ʌmben i ts'usubil Nabot ch'oyol bʌ ti Jezreel, come chʌmenix i yum jini lum mach bʌ yomic i chon, che'en.

¹⁶Che' bʌ tsi' yubi Acab chʌmenix Nabot, ti ora jach tsa' majli i ch'ʌmben i ts'usubil cha'an mi' ch'ʌm ti' wenta.

¹⁷Pero ti jim bʌ ora lac Yum tsi' pejca jini x'alt'an Elías: Tejchen ti ora. Cucu q'uele Acab i rey Israel am bʌ ti Samaria, come ya'ix an ti' ts'usubil jini Nabot. Tsa' majli i ch'ʌm ti' wenta.

¹⁹Yom ma' suben ili t'an: “Lac Yum woli' yʌl: Tsa' tsʌnsa winic. Tsa' chilbe i lum. Ya' ba' tsi' lembe i ch'ich'el Nabot jini ts'i' ya' talob ts'i' i lembeñet a ch'ich'el ja'el”. Che' yom ma' suben, che'en lac Yum. Che'ʌch tsi' mele Elías.

²⁰Acab tsi' sube Elías: Tsa'ix a cha' tajayon, j contrajet, che'en. Elías tsi' jac'be: Tsa' cu c tajayet, come tsa'ix a wʌc'ʌ a bʌ cha'an ma' mel chuqui jontol ti' wut lac Yum.

²¹Awilan lac Yum mi caj i chocbeñet tilel tsʌts bʌ wocol. Mi caj i wets'et majlel che' bajche' misujelʌl. Mi caj i laj jisan pejtel ch'iton bʌ a walobilob año' bʌ ti Israel.

²²Lajal mi caj i melbeñet che' bajche' tsi' melbe Jeroboam (i yalobil Nabat), che' bajche' tsi' melbe Baasa (i yalobil Ahías) cha'an ti' caj tsa' techbe i mich'ajel lac Yum. Tsa' xiq'ui ti mulil jini israelob.

²³Lac Yum tsi' yʌlʌ mi caj i toj i mul Jezabel ja'el. Jini ts'i' mi caj i c'uxben i bʌc'tal a wijñam ya' ti Jezreel.

²⁴Mi caj i c'uxbeñob i bʌc'tal a walobilob mu' bʌ i chʌmelob ti tejclum. Jini xta'jol mi caj i c'uxbeñob i bʌc'tal a pi'ʌlob mu' bʌ i chʌmelob ti jochol bʌ lum, che'en Elías.

²⁵Come ti isujm ma'anic yambʌ bajche' Acab tsa' bʌ i yʌc'ʌ i bʌ cha'an mi' mel chuqui jontol ti' wut lac Yum, come i yijñam tsi' xiq'ui ti maña jax bʌ i melbal.

²⁶Wen jontol bajche' tsi' mele. Tsi' ch'ujutesa jini dios tac che' bajche' tsi' meleyob jini amorreojob tsa' bʌ i jisayob lac Yum ti' tojlel israelob.

²⁷Acab tsi' yubibe i t'an Elías. Tsi' jet' tsili i pislel. Tsa' caji i lʌp coxtal ti q'uiñil yic'ot ti ac'ʌlel. Tsi' cha'le ch'ajb. Wen ch'ijiyem tsa' caji ti ajñel.

²⁸Ti jim bʌ ora lac Yum tsi' cha' pejca jini x'alt'an Elías:

²⁹¿Tsa' ba a q'uele bajche' woli' peq'uesan i bʌ Acab tic tojlel? Cha'an ti' caj tsi' peq'uesa i bʌ tic tojlel, ma'anic mi caj cʌq'uen ili wocol che' cuxul to. Mux caj cʌq'uen wocol i yalobilob Acab, che'en lac Yum.