Read Chol 1 Reyob 6 Bible Online

1 Reyob 6 - Chol bible

1 Reyob 6

¹Anix jumbajc' yic'ot chʌnc'al jab che' bʌ loq'uemobix jini israelob ti Egipto. Wolix i majlel ti chʌmp'ejl jab i yumʌntel jini rey Salomón. Ti jini jach bʌ jab Salomón tsa' caji i wa'chocon i yotot lac Yum.

²Jini i p'isol Templo jiñʌch lujump'ejl i cha'c'al (30) metro i tamlel, yic'ot lujump'ejl metro i xujc. Jo'lujump'ejl (15) metro i chanlel.

³An i lejch' otot ya' ti' tojel jini Templo, lujump'ejl metro i tamlel lajal bajche' i xujc otot, yic'ot jo'p'ejl metro i xujc jini coyerol.

⁴Tsi' mele q'ueloñib ti Templo. Tsi' yʌq'ue tac i majc ti jumpat yic'ot yambʌ ti mal.

⁵Tsi' mele jini tsalʌl tac ti jujunwejl i tamlel jini Templo, yic'ot ti' joytilel jini ts'ajc ti jumpat.

⁶I xujc jini tsalʌl tac am bʌ ti yebal jiñʌch ojlil i yuxp'ejl metro. I xujc jini tsalʌl tac am bʌ ti' cha'lajmlel otot jiñʌch uxp'ejl metro. I xujc jini tsalʌl am bʌ ti' yuxlajmlel otot jiñʌch ojlil i chʌmp'ejl metro. I cucujlel tac jini otot bichbich ñumen ts'ita' tac, cha'an ya'i mi' yʌc'ob i cucujlel jini tsalʌl am bʌ ti' cha'wejlel jini Templo.

⁷Ya' baqui tsi' c'oloyob loq'uel jini xajlel tsi' toj'esayob. Jini cha'an che' bʌ tsi' wa'chocoyob, ma'anic tsi' c'ʌñʌyob martillo mi jacha mi yambʌ tsucul taq'uin.

⁸Ya' ti' tojel i ñoj jini otot an i ti' jini tsalʌl tac am bʌ ti yebal. Quejpʌctic jini letsibʌl ti' cha'lajmlel otot yic'ot ti' yuxlajmlel.

⁹Salomón tsa' ujti i wa'chocon jini otot. Puro ch'ujte' jini cucujl tac yic'ot i yoyel otot yic'ot jini bojte' ti' mal ts'ajc.

¹⁰An ojlil i yuxp'ejl metro i chanlel jini tsalʌl tac am bʌ ti' cha'wejlel jini Templo. Lajal i chanlel ti jujunlajm. Ya' jach ñotol jini ch'ujte' bʌ i cucujlel yic'ot i ts'ajquil Templo.

¹¹Tsa' tili i t'an lac Yum ba'an Salomón che' woli' wa'chocon jini Templo. Tsi' yʌlʌ: Mi xuc'ul ma' chʌn jac'beñon c t'an yic'ot j cʌntesa yic'ot pejtel c mandar, mi caj c ts'ʌctesan c t'an ti a tojlel che' bajche' tsac sube David a tat.

¹³Mi caj c chʌn ajñel ti' tojlel pejtelel israelob. Ma'anic mi caj j cʌyob, che'en.

¹⁴Salomón tsa' ujti i mel jini otot.

¹⁵Tsi' c'ʌñʌ ch'ujte' bʌ tabla tac cha'an mi' ñotben i mal jini otot, c'ʌlʌl ti' yebal c'ʌlʌl ti' cucujlel jini otot. Tsi' c'ʌñʌ ciprés bʌ tabla tac cha'an i pisojlel.

¹⁶Che' ja'el ti' mal jini otot tsi' mele yambʌ tsalʌl lujump'ejl metro i tamlel, lujump'ejl metro i xujc, lujump'ejl metro i chanlel. Tsi' yʌc'ʌ jini ch'ujte' bʌ tabla tac ya' ti' yebal i mal c'ʌlʌl ti' jol tsalʌl. Jiñʌch jini C'ax Ch'ujul bʌ Ajñibʌl.

¹⁷Jini ñaxan bʌ i mal jini Templo am bʌ ti tojel jini C'ax* Ch'ujul bʌ Ajñibʌl an junc'al (20) metro i tamlel.

¹⁸Xot mʌcbil ti tabla jini cha'tsajlel i mal. T'obil jini tabla ba' tsi' meleyob i yejtal nich pimel yic'ot nich te'. Ya' ti mal ma'anic tsiquil jini xajlel, come xot mʌcbil ti ch'ujte'.

¹⁹Ya' ti C'ax Ch'ujul bʌ Ajñibʌl mi' yajñel jini Arca ba' lotol jini xuc'ul bʌ i t'an lac Yum.

²⁰Lujump'ejl metro i tamlel jini C'ax Ch'ujul bʌ Ajñibʌl, lujump'ejl metro i xujc, lujump'ejl metro i chanlel. Laj tep'bil ti oro, che' ja'el tep'bil ti oro jini pulʌntib melbil bʌ ti ch'ujte'.

²¹Salomón tsi' tep'e ti oro i mal jini otot yic'ot jini pulʌntib. Tsi' ñup'u cʌytʌl i ti' jini C'ax Ch'ujul bʌ Ajñibʌl ti cadena melbil bʌ ti oro.

²³Tsi' mele cha'tiquil i yejtal ángelob ti olivote'. Jujuntiquil an i chanlel jo'p'ejl metro. Ti jujuntiquil añob i wich' ojlil i yuxp'ejl metro. Jo'p'ejl metro i tamlel che' tich'il i wich'. Junlajalob ti cha'ticlel. Lajal i chanlel, lajal i tamlel i wich'. Tsi' yotsayob jini melbil bʌ ángelob ti' mal Templo. Ti junwejl i wich' tsi' tajayob bojte'. Ti ojlil tsi' tajayob i bʌ i wich'. Laj tep'bil ti oro jini ángelob ja'el.

²⁹T'obil tac i bojte'lel Templo ti cha'tsajlel i mal. Tsi' meleyob i yejtal tac ángelob yic'ot bonxan, yic'ot i nich pimel.

³⁰Tsi' tep'eyob jini piso ti oro ti cha'p'ejl i mal.

³¹Tsi' meleyob cha'q'uejl ñujp'il i ti' cha'an i puertajlel jini C'ax Ch'ujul bʌ Ajñibʌl. Ya' ti' cha'q'uejl bʌ i puerta melbil bʌ ti olivote' tsi' meleyob i yejtal tac ángel yic'ot bonxan yic'ot i nich pimel. Tsi' laj tep'eyob ti oro.

³³Tsi' c'ʌñʌyob olivote' cha'an i chumte'lel i ti' Templo.

³⁴An cha'q'uejl i puertajlel Templo melbil ti cipreste'. An bisagre ti jujunq'uejl i ti'.

³⁵Ya' ti' puertajlel Templo tsi' meleyob i yejtal tac ángel yic'ot bonxan, yic'ot i nich pimel. Tsi' laj tep'eyob ti oro.

³⁶Uxlajm i pimlel i ts'ajquil jini patio yic'ot junlajm ch'ujte'.

³⁷Tsi' ts'ʌlʌyob letsel i yebal Templo che' ti mayo che' wolix i majlel ti chʌmp'ejl jab i ye'tel Salomón.

³⁸Tsa' ujti i melob Templo che' ti noviembre che' ti junlujump'ejl jab i ye'tel Salomón. Tsa' ñumi wucp'ejl jab ti melol.