Read Chol 1 Reyob 8 Bible Online

1 Reyob 8 - Chol bible

1 Reyob 8

¹Salomón tsi' tempa tilel ti Jerusalén pejtelel jini xñoxob yic'ot ñuco' bʌ i ye'tel ti' tojlel israelob cha'an mi' loc'sañob jini Arca ba' lotol jini Xuc'ul bʌ i T'an lac Yum ya' ti Tabernáculo am bʌ ti Sion, i tejclum David, cha'an mi' c'axtesañob ti Templo.

²Pejtelel jini israelob temel tsa' c'otiyob ba'an Salomón che' i yorajlel mi' melob jini q'uin cha'an Tabernáculo che' ti octubre.

³Che' jini tsi' cha'leyob q'uiñijel. Jini motomajob tsi' ch'ʌmʌyob tilel jini Arca yic'ot pejtel jini ch'ujul bʌ e'tijibʌl tac am bʌ ti' mal jini Tabernáculo.

⁴

⁵Jini rey Salomón yic'ot pejtelel israelob tsi' tempayob i bʌ ya' ti' tojel jini Arca. Tsi' tsʌnsayob cabʌl tiñʌme' yic'ot wacax cha'an i majtan Dios. Ma'anic tsa' mejli ti tsicol jini alʌc'ʌl, come c'ax cabʌl.

⁶Jini motomajob tsa' c'oti i yotsañob jini Arca ya' ti' mal jini Ch'ujul bʌ Templo ya' ti C'ax Ch'ujul bʌ Ajñibʌl. Tsi' yʌc'ʌyob jini Arca ti ojlil i mal, ti' yebal i wich' jini ángelob.

⁷Come laj bʌ lich'il i wich'ob ya' ti pam jini Arca. Ya' tsa' ajni jini Arca yic'ot jini cha'ts'ijt q'uechlintib ti' yebal i wich' ángelob.

⁸Wen tam jini cha'ts'ijt te'. Tsa' ts'ita' tsictiyi i ñi' i te'el Arca ya' ti Ch'ujul bʌ Ajñibʌl, pero mach tsiquilic ti jumpat. Ya'to an wʌle che' woli' ts'ijbuntel ili jun.

⁹Ma'anic yambʌ i bʌl jini Arca. Cojach an jini cha'q'uel xajlel tsa' bʌ i yotsa Moisés che' bʌ tsi' yʌc'ʌ xuc'ul bʌ i t'an lac Yum ti Horeb ti' tojlel jini israelob che' loq'uemobix ti' lumal Egipto.

¹⁰Che' bʌ tsa' loq'uiyob jini motomajob ya' ti Ch'ujul* bʌ Ajñibʌl, tsa' bujt'i ti tocal i yotot lac Yum.

¹¹Jini cha'an jini motomajob ma'anic tsa' mejli i chʌn cha'leñob i ye'tel ti mal cha'an jini tocal. Tsa' loq'uiyob ti jumpat, come tsa' wen bujt'i otot ti' ñuclel lac Yum.

¹²Salomón tsi' cha'le oración: C Yum, a melbalʌch jini q'uin ti panchan, pero tsa' wʌlʌ jiñʌch a wajñib jini pim bʌ tocal. C Yum, tsa'ix c wa'chocobeyet wen uts'atax bʌ a wotot, a wajñib ba' mi mejlel a chumtʌl ti pejtelel ora. Che' tsi' cha'le oración Salomón.

¹³

¹⁴Tsi' sutq'ui i bʌ jini rey ba' wa'alob winicob x'ixicob. Tsi' yʌq'ueyob i yutslel i t'an pejtelel israelob.

¹⁵Tsi' yʌlʌ: La' sujbic i ñuclel lac Yum i Dios israelob tsa' bʌ i pejca c tat David. Cha'an ti' p'ʌtʌlel tsa'ix ts'ʌctiyi pejtel iliyi. Dios tsi' sube c tat David:

¹⁶“C cha'añob jini israelob. Che' bʌ tsac loc'sayob ya' ti Egipto, ma'anic tsac yajca i yajñib c Templo, pero tsac yajca winic cha'an mi' yochel ti' yum israelob”, che'en lac Yum.

¹⁷Jini c tat David tsi' wʌn ña'ta ti' pusic'al i wa'chocoben i yotot lac Yum i Dios Israel.

¹⁸Pero lac Yum tsi' sube c tat David: “Uts'at a pusic'al cha'an tsa' ña'ta a wa'chocobeñon cotot.

¹⁹Pero yambʌ mi caj i wa'chocobeñon cotot, mach jatetic. Jini a walobil mi caj i wa'chocobeñon cotot”, che'en lac Yum.

²⁰Lac Yum tsa'ix i mele che' bajche' tsi' yʌlʌ, come tsac taja que'tel ti' q'uexol c tat David cha'an mic cha'len yumʌl ti' tojlel israelob. Tsa'ix ujti c melben i yotot lac Yum i Dios israelob.

²¹Tsa'ix c mele ja'el i yajñib Arca ba' lotol jini xuc'ul bʌ i t'an lac Yum tsa' bʌ i yʌq'ue lac ñojte'elob che' bʌ tsi' loc'sayob ya' ti Egipto. Che' tsi' yʌlʌ Salomón.

²²Tsa' wa'le Salomón ti' tojel jini pulʌntib i cha'an lac Yum. Ti' wutob pejtelel israelob tsi' letsa i c'ʌb ti panchan. Tsi' yʌlʌ: C Yum i Dioset israelob, ma'anic yambʌ Dios che' bajche' jatet, mi ti panchan mi ti' yebal panchan. Come xuc'ulet yic'ot a t'an. Ma' chʌn c'uxbin a cha'año' bʌ mu' bʌ i chʌn tsajcañetob ti pejtelel i pusic'al.

²³

²⁴Tsa'ix a ts'ʌctesa a t'an ti cabʌl a p'ʌtʌlel che' bajche' tsa' sube c tat David. Wolij q'uel lojon ti ili ora.

²⁵Wʌle, c Yum i Dioset bʌ israelob, ts'ʌctesan ja'el yambʌ a t'an tsa' bʌ a sube c tat David, come tsa' sube: “Mi xuc'ul mi' chʌn jac'ob c mandar a walobilob mi caj cʌq'ueñet a q'uexol mu' bʌ caj i cha'len yumʌl ti pejtelel ora ti' tojlel israelob. Yom xuc'ul mi' ñopoñob che' bajche' tsa' ñopoyon”, che'et.

²⁶Jini cha'an wʌle, c Yum, i Dioset bʌ israelob, ts'ʌctesan a t'an tsa' bʌ a sube a winic David.

²⁷¿Isujm ba mi' caj ti ajñel Dios ti pañimil? Awilan mach ñuquic ma' q'uel panchan cha'an ya' ma' chumtʌl. Ch'o'ch'oc jax jini otot tsa' bʌ c wa'chocobeyet.

²⁸Ubibeñon coración ti' yutslel a pusic'al, c Yum Dios, come a winicon. Ti wocol t'an mic pejcañet.

²⁹Q'uele ili Templo ti q'uiñil ti ac'ʌlel, come tsa' wʌlʌ mi caj a wajñel ilayi. Jini cha'an yom ma' wubibeñon coración wʌ' ti' tojel a wotot.

³⁰A cha'añon. A cha'añob ja'el pejtelel israelob. Jini cha'an yom ma' wubibeñon lojon coración che' an chuqui mij c'ajtibeñet lojon ti' tojel a wotot. Ya' ba' chumulet ti panchan yom ma' ñich'tañon lojon. Che' ma' wubiñon lojon yom ma' ñusʌbeñon lojon c mul.

³¹Che' an juntiquil mu' bʌ i taj i mul ti' tojlel i pi'ʌlob, mi tsa' tili i tsictesan i bʌ ti' tojel a pulʌntib, mi tsi' yʌc'ʌ i t'an ti a tojlel cha'an ma'anic i mul,

³²che' jini yom ma' ñich'tʌben i t'an ti panchan. Yom ma' mel che' bajche' an i melbal. Mi an i mul jini winic, la' ajnic ti' wenta cha'an mi' toj. Mi isujm ma'anic i mul, la' ajnic ti uts'at.

³³Che' mi' yubiñob wocol a cha'año' bʌ ti' tojlel i contrajob cha'an tsi' ñusayob a t'an, mi tsi' cha' sutq'uiyob i bʌ ti a tojlel cha'an mi' c'ajtiñob i ñusʌntel i mul wʌ' ti' tojel a wotot, yom ma' ñich'tʌbeñob i t'an ya' ti panchan. Yom ma' ñusʌbeñob i mul. Cha' pʌyʌyob tilel ti jini lum tsa' bʌ a wʌq'ueyob i ñojte'elob.

³⁴

³⁵Mi tsa' mʌjqui jini panchan cha'an ma'anic mi' chʌn tilel ja'al ti' caj i mul, p'untañob che' mi' cha' sutq'uiñob i bʌ ti' tojel ili Templo cha'an mi' pejcañetob ti wocol t'an. Mi tsi' cʌyʌyob i mul che' bʌ tsa' ju'sʌbeyob i pusic'al,

³⁶ñich'tʌbeñob i t'an ya' ti panchan. Ñusʌbeñob i mul a winicob israelob. Cʌntesañob ti jini wen bʌ bij. Cha' choco tilel ja'al ti ili lum tsa' bʌ a wʌq'ueyob.

³⁷Che' an wi'ñal ila ti pañimil, o mi jontol tac bʌ c'amʌjel, o mi i chʌnil pʌc'ʌbʌl che' bajche' jini sajc' mu' bʌ i mʌctan pañimil, o mi an i tic'lʌntel a cha'año' bʌ ti jump'ejl tejclum cha'an i contrajob, o mi tal bʌbʌq'uen bʌ c'amʌjel,

³⁸che' jini yom ma' ñich'tʌbeñob i yoración majqui jach mi' pejcañet che' mi' yubin i ñijcʌntel i pusic'al. Mi tsi' sʌts'beyet i c'ʌb ti tojel ili Templo,

³⁹yom ma' ñich'tʌben i t'an ya' ti panchan. Yom ma' ñusʌben i mul. Aq'uen che' bajche' yom i melbal, come jatet ma' cʌmbeñob i pusic'al pejtelel winicob x'ixicob ti pañimil.

⁴⁰Che' jini mi caj i bʌc'ñañetob ti pejtelel ora ti jini lum tsa' bʌ a wʌq'ue c ñojte'el lojon.

⁴¹Jini ñajt bʌ chumulob mach bʌ israelobic mi caj i yubiñob wen ñucʌch a c'aba', ñuc a melbal. Che' mi' tilelob i pejcañetob ti' tojel ili Templo,

⁴²

⁴³yom ma' q'uelob ya' ba' chumulet ti panchan. Ubibeñob i t'an jini ñajt bʌ chumulob. Mele che' bajche' mi' c'ajtibeñet cha'an mi' laj cʌñob a c'aba' ti pejtelel pañimil cha'an mi' bʌc'ñañetob che' bajche' mic bʌc'ñañet lojon. La' i ña'tañob ma' wʌc' a bʌ ti cʌjñel wʌ' ti Templo tsa' bʌ c wa'choco.

⁴⁴Che' ma' subeñob majlel ti guerra jini israelob ti' tojlel i contrajob, mi tsi' sutq'uiyob i wut ti' tojel a tejclum Jerusalén, ti' tojel ili Templo tsa' bʌ c wa'choco cha'an i c'uxbintel a c'aba', mi tsi' pejcayetob ti oración,

⁴⁵yom ma' wubibeñob i yoración ya' ti panchan. Coltañob ti jini wocol.

⁴⁶Mi tsi' cha'leyob mulil ti a tojlel, come an lojon c mul tic pejtelel lojon, mach ma' cʌyob che' mich'et che' ma' wʌc'ob ti' c'ʌb i contrajob cha'an mi' cʌjchelob majlel ti yambʌ lum, mi ti ñajt mi ti lʌc'ʌl.

⁴⁷Mi tsa' caji i cha' ña'tañetob ya' ti yambʌ lum baqui mi' majlelob, mi tsi' cha' sutq'uiyob i bʌ cha'an mi' pejcañetob ti oración, mi tsi' yʌlʌyob: “Tsac cha'le lojon mulil ti a contra. Tsac mele lojon chuqui jontol”, mi che'ob,

⁴⁸ubibeñob i t'an che' mi' cha' sutq'uiñob i bʌ ti a tojlel ti pejtelel i pusic'al. Mi tsi' pejcayetob ti oración che' woli' ñajti q'uelob jini lum tsa' bʌ a wʌq'ue i ñojte'elob, yic'ot jini tejclum tsa' bʌ a yajca, yic'ot a wotot tsa' bʌ c wa'choco,

⁴⁹yom ma' ñich'tʌbeñob i t'an ya' ba' chumulet ti panchan. Yom ma' wʌq'ueñob chuqui woli' c'ajtiñob.

⁵⁰Ñusʌbeñob i mul jini winicob tsa' bʌ i cha'leyob mulil ti a tojlel yic'ot jini tsa' bʌ i ñusʌbeyetob a t'an. Cha' utsesʌbeñob i pusic'al i yumob tsa' bʌ i cʌchʌyob majlel, cha'an mi' p'untañob.

⁵¹Come i p'olbalobʌch jini tsa' bʌ a loc'sayob ti Egipto ba' tsi' yubiyob cabʌl wocol.

⁵²Ubin coración yic'ot i yoración a tejclum Israel. Ubibeñob i t'an che' mi' pejcañetob ti wocol t'an.

⁵³Come tsa' yajcayob ti' tojlel pejtel winicob, c Yum Dios, cha'an a cha'añʌch mi' yajñelob che' bajche' tsa' sube Moisés che' bʌ tsa' loc'sa c ñojte'el lojon ti Egipto.

⁵⁴Tsa' ujti ti oración Salomón. Tsa' ch'ojyi ya' ba' ñocol ti' t'ejl jini pulʌntib i cha'an lac Yum, sʌts'ʌl i c'ʌb ti' tojel panchan.

⁵⁵Ti c'am bʌ t'an tsi' yʌq'ue i yutslel i t'an pejtelel israelob:

⁵⁶La' sujbic i ñuclel lac Yum, come tsi' yʌq'ueyob i ñʌch'tʌlel i pusic'al israelob che' bajche' tsi' subeyob. Ma'anic mi jump'ejlic i t'an mach bʌ ts'ʌctʌyemic ti pejtelel i t'an tsa' bʌ i sube Moisés i yaj e'tel.

⁵⁷La' ajnic lac Yum Dios la quic'ot che' bajche' tsa' ajni yic'ot lac ñojte'elob. Mach yomic mi' cʌyonla ti pejtelel ora.

⁵⁸La' i ñijcʌbeñonla lac pusic'al che' bajche' tsi' melbeyob lac ñojte'elob cha'an mi lac chʌn cha'len xʌmbal ti' tojlel, cha'an mi lac jac'ben i mandar yic'ot i t'an yic'ot i cʌntesa.

⁵⁹Jini cha'an la' i ch'ʌm ti' wenta lac Yum ti q'uiñil ti ac'ʌlel pejtel chuqui tsaj c'ajtibe cha'an mi' chʌn coltañon yic'ot pejtelel israelob.

⁶⁰Che' jini pejtel winicob ti pañimil mi caj i ña'tañob Yumʌlʌch Dios. Ma'anic yambʌ Dios.

⁶¹Jini cha'an yom jump'ejl jach lac pusic'al ti' tojlel lac Yum Dios cha'an mi lac chʌn jac'ben pejtel i t'an yic'ot i mandar che' bajche' woli lac mel wʌle. Che' tsi' yʌlʌ Salomón.

⁶²Jini cha'an jini rey yic'ot pejtelel israelob tsa' caji i tsʌnsʌbeñob i majtan lac Yum cha'an mi' ch'ʌm ti wenta jini Templo. Jiñʌch majtañʌl tac mu' bʌ i yʌc' i ñʌch'tilel lac pusic'al. Tsi' tsʌnsayob cha'p'ejl i cha'c'al mil tat wacax (22,000) yic'ot wʌcc'al mil (120,000) tiñʌme'. Che'ʌch tsi' meleyob i q'uiñilel i yotot lac Yum jini rey yic'ot pejtelel israelob.

⁶³

⁶⁴Ti jini jach bʌ q'uin jini rey tsi' yʌq'ue lac Yum jini patio am bʌ ti' tojel i yotot lac Yum cha'an ya' mi' pulbentel i majtan, come ch'o'ch'oc jax jini pulʌntib melbil bʌ ti bronce am bʌ ti' tojel lac Yum. Mach ochic ti pejtelel. Tsi' yʌq'ue lac Yum ja'el jini majtañʌl melbil bʌ ti trigo, yic'ot cha'an i ñʌch'tilel i pusic'al. Wen on jini majtañʌl.

⁶⁵Ti jim bʌ ora Salomón tsi' mele ñuc bʌ q'uiñijel temel yic'ot pejtelel israelob. Cabʌl winicob tsi' tempayob i bʌ tilemo' bʌ ti' joytilel Israel. Cha'p'ejl semana tsi' cha'leyob q'uiñijel ti' tojlel lac Yum Dios cha'an jini Templo.

⁶⁶Che' ti' waxʌcp'ejlel q'uin Salomón tsi' subeyob sujtel jini israelob ti' yotot. Pejtelel jini israelob tsi' yʌq'ueyob i yutslel i t'an jini rey. Wen tijicñayob i pusic'al tsa' sujtiyob majlel ti' yotot, come tsi' q'ueleyob i yutslel i pusic'al lac Yum ti' tojlel David yic'ot pejtelel israelob.